Luk 7

Yesu a rehza mala zlan a madakal sawje ege mala hayak Rawma

A dəwze maa Yesu kághwalza zlap anta aza kəɗaŋ ŋ hejəye ca, aya, tel a nda anta ŋ uzam Kafarnahum. 2 A təwse ca, heje Rawma wende aka, ara madakal ma ata ha sawje ege temere. Heje anta a kaɗaw mala zlan anta wende aka dakala mambaza. Cemey, mala zlan anta anta, mbəy werwer askwaw, slaɓ ŋ mac. 3 Maa heje ŋghe wese a zləme Yesu kérehzata hejəye dawar ege aza ca, a laɓzata hejəye ma dakal dakal Yahudu ege vedəye ara mbe ŋ jene mbahw, ŋ ndaha ŋ rehza mala zlan anta. 4 A təwse ca, əy ndaha ara mbe, əy jene mbahw dakala, əy ŋgaya: «Kadak ca, hwa cekzene ŋ heje anta! 5 Mavəday, a kaɗawaheje, heje Yahudu ege dakala, mbəy ma lam ujek ma ata rak Gazlavay ŋcene.»

6 Maa Yesu a zləme zlap ŋghe wese ca, aya, tel əy nda tewtew. Cemey, maa Yesu slaɓ ŋ hwas a wata anta ca, madakal sawje ege wese a laɓzata ŋgama anta ege ŋ zlepene ca: «Bay Madakal, hwa saɓa gef aka ŋ vaŋha a wata naka ŋ vay, mavəday sa ca, sa káhwas hwa damha a wata naka səkwaw. 7 Mavəday anta yam, sa sarza ha naka yam ca, sa káhwas ŋ gwar a tama ŋkwa səkwaw. Cemey, mada hwa kazlap ma ŋkwa teŋguleŋ ca, ga ŋ rehza mala zlan naka. 8 Sa zlap ana ebe ŋghe ca, mavəday, madakal dakal ege ata ha naka aka, sawje ma asa ra naka ege aka yam. Mada sa zlepene ŋ wende: “Nda”, a nda. Sa zlepene ŋ wende zeney, “Ndaha”, a ndaha. Mada sa zlepene ŋ mala zlan naka: “La səkan ŋgha ende ŋghe!”, a law.»

9 Maa Yesu a zləme ma mala madakal sawje ege wese ca, ma anta kéndəremzene aza. Aya, a bawaha tama kəɗe aha hejəye ma kasəbar ege, a zlepetene, a ŋgaya: «Sa kazlapahune, kaw ŋ hayak Əysərayəyla tewtew ca, sa kéndew ata ɗala ma lemzekey aza a unaf anta tewtew ana heje ŋghe ca, askwaw!» 10 Aya, hejəye maa madakal sawje ege a laɓata ara mbe wese, əy zen tata a wata, əy ndewzene a mala zlan wese, mbəy werwer.

Yesu a gwarzamaza mba a wala mce ata lamac

11 A dəwze anta, Yesu a kanda kəɗa ŋ uzam Nayəyn. Madarlaŋw anta ege ey hejəye vəram, əy kasəbar ara. 12 Cemey, maa mbəy slaɓ ŋ vaŋ a uzam wese ca, əy ŋgel ma a hejəye, əy ketewha mce ŋ jeɓ. Ma mac anta ca, ara malay a wala maa mawal anta a mecene aza. A təwse, hejəye vəram ma ŋ uzam Nayəyn anta, əy kecene ma a wala anta. 13 Maa Bay Madakal Yesu a gəre wala wese ca, kásan hahar dakala a heɗe, aya, a zlepene, a ŋgaya: «Mbal unaf ŋkwa aka, hwa han səkwaw!» 14 A dəwze zlap anta wese ca, a nda, a ca ra anta ata lambaŋ mce wese. A təwse ca, hejəye ma ketew mce ege wese, gar əy gar aka. Aya, Yesu a ŋgaya: «Mba darlaŋw, sa ma kazlapahwaw, gwarzam!» 15 A təwse ca, mba ma mac anta wese, perce a gwarzam, nja a nja ka, a mar ŋ zlap. Aya, pa a velene mba anta ka ŋ maman.

16 Kəɗe ca, hejəye ma a təwse ege tewtew əy kálalak tata dakala, əy həmanza Gazlavay, əy ŋgaya: «Mba ma zlap ma a Gazlavay ma dakal, kándaha ŋ taba ŋtakwaw!» əy ya. Əy zlap zeney, əy ŋgaya: «Gazlavay kándaha ŋ cekzetene ŋ hejəye anta ege!» 17 Hejəye əy kaslap ma Yesu anta kaw a katay tewtew ŋ hayak Yahudəya leŋ ŋ uzam ma mazlam anta ege tewtew ata səkan maa a law.

Yesu a zenetene zlap ŋ madarlaŋw Yuhana mala baptəysma ege gbak

18 Maa Yuhana mbəy a ujek daŋgay ca, madarlaŋw anta ege əy ghwelzene səkan ma laha ege tewtew. A təwse ca, Yuhana a yata madarlaŋw ege gbak ŋ taba tata. 19 Aya, a laɓzata ara Bay Madakal Yesu, ŋ ɗawza: «Hwa ca, hwa Kərəystu maa nene kaŋkap ŋ ndaha ŋ rehzeney wese vaw? Akwaw ca, nene ŋkap ɗala matakan vaw?» a ya. 20 A təwse, əy nda ara Yesu, əy zlepene, əy ŋgaya: «Yuhana mala baptəysma, a leɓene ara hwa ŋ ɗawzahwaw, a ŋgaya: “Hwa ca, hwa Kərəystu maa nene kaŋkap ŋ ndaha ŋ rehzeney wese vaw? Akwaw ca, nene ŋkap ɗala matakan vaw?”»

21 A təwse ca, Yesu a kerehzata hejəye vəram ŋ dawar tata ege parpar parpar. A kagamata zəwet malula ege ma ŋ hejəye, a zeney, a kezlerzetene nje ŋ ulaf ege vəram. 22 Aya, a zenetene zlap ŋ madarlaŋw Yuhana ege wese, a ŋgaya: «Hune nda, hune ghwelzene səkan ege maa hune gəreta a nje ŋkune ey maa hune zləme ŋ zlam ŋkune, ŋ Yuhana. Hune zlepene ca: “Ulaf ege əy kegəre la, hejəye ma ŋgas tata ege əy kámac tata, əy kanda kadak kadak, hejəye ma fagwalakw ata tata ege əy kasaɗ tata, madaŋgazlam ege əy kezləme zlam, hejəye ma mac tata ege əy kágwarzamha aza ata lamac tata, metetekw ege əy kézləme Ma Mewe ma Taŋtaŋ a Gazlavay aza. 23 Zəhay a Gazlavay mbəy ata ɗala ma kaw kégeɓza lalam unaf anta aka a sa askwaw!”»

Yesu a zlap ata Yuhana

24 A dəwze maa madarlaŋw Yuhana ege əy nda tata ca, Yesu a mar ŋ zlap ata Yuhana ŋ hejəye ma ɓecha vəram a həzlar ege, a ŋgaya: «Hune nda ŋ saraha a damaw ca, vemey? Ŋgeŋge maa tatəɗam a kahəɓalza vaw? 25 Mada mbe səkwaw ca, hune nda ŋ sarha vemey? Ɗala ma caha rəgwac ma tuwah ata kusam vaw? Cemey, hejəye ma caha rəgwac ma tuwah tuwah ege ey maa əy ŋ zəhay ege ca, ara hejəye ma kanja a wata bay ege. 26 Ca, hune nda ŋ saraha ca, vayay? Mba ma zlap ma a Gazlavay vaw, sa ya? Ayaw, njenjəwen, sa kazlapahune, mbəy day aha mba ma zlap ma a Gazlavay. 27 Cemey, Yuhana ca, ara ɗala maa zlap a Gazlavay kéŋtereye a heɗe, a ŋgaya:

“Gazlavay a zlepene ŋ mba anta:

Ŋghe, sa kalaɓza malaɓ naka mpar aha hwa

ŋ lamzahwaw taf aka.”»

28 Yesu a zlepetene zeney, a ŋgaya: «Sa kazlapahune, njenjəwen, Yuhana ca, mbəy pa ma day aha hejəye tewtew ma mbawha ŋ manhayak ete ŋghe. Cemey, ɗala ma pa ma pəzekw ŋ bay mala Gazlavay ata hejəye ca, mbəy pa ma day aha mbe.»

29 «A təwse ca, hejəye tewtew zlaɓa macak budaw ege əy ketehzene zlam ŋ Yuhana, əy kasan taf a Gazlavay ca, mbəy tuwah, əy kélem baptəysma aza ara mbe. 30 Cemey, Farəysa ege ey maghwal ma maŋkanaŋkan ege ca, əy kásan taf a Gazlavay maa a kaɗaw əy səbaraw, askwaw. Əy kálamza ŋ ban a yam baptəysma ara Yuhana askwaw.»

31 Yesu a zlap zeney, a ŋgaya: «Sa naslaŋgalata hejəye ma ata vah ŋtakwaw ma na ŋgha ca, a vemey? Əy nja ana vayay? 32 Əy nja ana uzəye maa əy kénjeye ŋ hubakw, əy kaya kusam, əy ŋgaya: “Nene kámbazahune talgway, cemey, hune kádəmas askwaw. Nene kálahune dəraf mce, cemey, hune káhan askwaw.” 33 Sa zlapahune ana ebe ŋghe ca, mavəday, Yuhana mala baptəysma kándaha ŋ ghwalza zlap a Gazlavay, a kazam uda ana hejəye vedəye askwaw, a kasa mavaw askwaw. Hune ŋgaya: “A kawak!” 34 Sa, sa Mba Ɗala, sa ndaha, sa kazam uda, sa kasa mavaw. Hune ŋgaya: “Heje anta a zam uda dəydey, a sa mavaw dəydey. A zeney, ara ŋgama macak budaw ege ey hejəye mala gay ege!” 35 Cemey, sa kazlapahune, kəleŋ a Gazlavay a ghwalha tuwah ca, ta ŋ hejəye ma lamza kəleŋ anta ege aza.»

Yesu mbəy a wata Səymawn, ɗala Farəysa

36 Ɗala Farəysa wende aka, a yaɓa Yesu a wata anta ŋ zam uda ŋ la anta. Aya, Yesu a dam a wata anta anta, a nja ŋ zam uda anta. 37 Wala wende ŋ uzam anta aka, a kala gay dakala. Maa a zləme Yesu a kazam uda a wata Farəysa wese ca, a ndaha, a daha gajak ŋkəɗaŋ maghwarakwaghwarakw maa əy kayaɓa «albatəra», mel ma kenjef feŋfeŋ ghef ŋma. 38 A ndaha, a gəleɓ aka a dəwze Yesu, mbermber ara ŋgas anta. A han ha lahan anta ma kwayha, a benene ŋgas anta aza. Aya, tukwaɗ a tukwaɗ lahan anta wese aza a jukwaɗ ha anta, səkaw a səkawaw, ŋ ŋgas anta, a temzene mel ma kenjef feŋfeŋ wese a heɗe. 39 Ɗala Farəysa ma yaɓa Yesu a wata anta wese, maa a gəre səkan ma wala ŋghe wese a la cemey, a zlap ŋ ha anta a ŋgaya: «Njenjəwen ca, mada heje ŋghe, ara mba ma zlap ma a Gazlavay ca, a nasan wala ma kaca ra a heɗe ŋghe ca, ara wala ma kala gay dakala.» 40 Cemey, Yesu a zlepene ŋ Farəysa wese a ŋgaya: «Səymawn, sa kaɗaw ŋ zlapahwaw ma wende aka.» Səymawn wese a zenene, a ŋgaya: «Zlapaza, Bay Madakal.»

41 Aya, Yesu a zlepene, a ŋgaya: «Hejəye vedəye gbak aka, əy ja duwa ara ɗala wende aka. Heje anta a kasəbar ɗala wende a səlay bakatar temere jaɓan, ɗala wende zeney a səlay bakatar rajaɓan. 42 Cemey, hejəye anta ege gbak tata, əy kula ŋ ŋterene duwa anta səkwaw, mavəday anta, heje ma jetene duwa wese, képelzetene ka. Ŋ taba hejəye ŋghe anta ege ca, ma kanaɗaw heje anta day ca, vayay?» 43 A təwse ca, Səymawn a zenene, a ŋgaya: «Sa deŋza ŋ ha naka ca, ɗala ma kanaɗaw pa ma day ca, ara ɗala maa a pelzene duwa ma pa ma day a heɗe wese.» Yesu a zlepene, a ŋgaya: «Hwa zlapaha a heɗe a heɗe.»

44 A dəwze anta, Yesu a bawha tama anta kəɗe aha wala wese, a zlepene ŋ Səymawn, a ŋgaya: «Hwa kegəre wala ŋgha vaw, sa ya? Sa ndaha ca, a wata ŋkwa, hwa kétemzekey yam ata ŋgas naka askwaw. Cemey, mbe ca, kébenekey ŋgas naka aza a lahan anta, kátukwaɗza a jukwaɗ ha anta. 45 Sa ndaha a wata ŋkwa, hwa késəkewekey askwaw, cemey, a wala ŋghe anta ca, mar aka ma sa damaha aka ete ŋghe ha ma na ŋgha, kéyekzekey ŋ səkewekey a ŋgas askwaw. 46 Hwa kétemzekey mel ata ha naka askwaw, cemey, mbe ca, kétemzekey mel ma kenjef feŋfeŋ ata ŋgas naka.

47 «Sa kazlapahwaw: A ɗewekey dakala ana ebe ŋghe ca, a ghwalza ca, kaw kála gay dəydey, cemey, gay anta ege tewtew əy képeleye aza. Cemey, a ɗala maa əy pelzene gay anta ege aza cekuɗe ende ŋghe ca, laɗaw anta cekuɗe ende ŋghe yam.» 48 Aya, a zlepene ŋ wala wese, a ŋgaya: «Gay ŋkwa ege əy képeleye aza.» 49 Cemey, hejəye maa əy kazam uda ege tewtew ŋ la anta ata Yesu wese, əy ɗawza ha tata ege, əy ŋgaya: «Heje ŋghe anta ca, ara heje vayay? Ma kula ŋ pal kaw gay a ɗala ŋgha!» 50 A təwse ca, Yesu a zlepene ŋ wala wese, a ŋgaya: «Hwa kéreh ŋkwa mavəday maa hwa kélemzekey aza a unaf ŋkwa, nda a zəhay!»