Luk 5

Yesu a yahata madarlaŋw anta ege ma mpar ege

A pes wende aka, Yesu kédeŋeye a ma ŋtele Genesaret. Hejəye əy kéɓecha vəram ara mbe, əy kaŋgwaŋgwat kusam ŋ zləme zlap Gazlavay. 2 Ca, a gəre kwambawal ege gbak a ma ŋtele wese. Hejəye ma mbal ŋkəlef ege əy tadakwha aka ŋ kwambawal ege wese, əy kayaɓ taba tata ege. 3 Cemey, kwambawal wende ca, ara mala Səymawn. A tev ŋma, aya a zlepene ŋ Səymawn anta ŋ zenza kwambawal anta wese kəɗa ŋ yam cekuɗe. A təwse ca, a nja ka ŋ kwambawal anta, a kasasərakzata hejəye vəram.

4 A dəwze maa káŋtakwza ŋ ghwal zlap a Gazlavay wese aza ca, a zlepene ŋ Səymawn, a ŋgaya: «Zenza kwambawal kəɗe ata la yam ma pəɗem. Hune cata taba ŋkune ege ŋ yam ŋ mbalaha ŋkəlef.» 5 A təwse ca, Səymawn a zenene, a ŋgaya: «Bay ŋcene, nene kála zlan zaɗaw zaɗaw, kaw nene kélemha səkan askwaw. Cemey, mavəday maa hwa ma zlepekey ŋghe ca, sa nacata taba anta ege ŋ yam anta.»

6 Aya, əy cata taba tata ege wese ŋ yam eze, kəɗe ca, dəmbaɗ əy zlaɗaha ŋkəlef dakala mambaza. Taba tata ege wese əy kamar ŋ slah tata mavəday ŋkəlef anta dəydey mambaza. 7 A təwse ca, əy vetata hejəye tata ege ma ŋ kwambawal wende wese, ŋ ndaha ŋ cekzetene. Aya, hejəye wese ege əy ndaha, əy ghefzata kwambawal ege wese gbak tata a ŋkəlef dəydey mambaza. Amba kwambawal anta ege əy kadam tata uza asa yam. 8 Aya, maa Səymawn Pəyer a gəre səkan ma laha ana ebe ŋghe wese ca, a gəleɓ a tama Yesu, a zlepene, a ŋgaya: «Kes ŋkwa a həzlar sa, Bay Madakal, mavəday sa ca, sa ɗala ma kala gay!» 9 Ata Səymawn anta ey hejəye anta ege wese ca, əy kálalak tata, mavəday ŋkəlef maa əy mbalaha dakala wese. 10 Ata Yakuba ey Yuhana, uzəye Jebede ege maa əy kala zlan tewtew ata Səymawn wese, əy kálalak tata yam. Aya, Yesu a zlepene ŋ Səymawn, a ŋgaya: «Hwa lalak səkwaw, mar aka na ŋgha ca, hwa neɓecata hejəye ŋ səberekey.» 11 A təwse ca, zen əy zenata kwambawal tata ege aza a mazlam yam, yak əy yakzata səkan tata ege ka tewtew, aya, tel əy səbar Yesu.

Yesu a rehza ɗala maa fagwalakw a heɗe

12 Aya, Yesu mbəy a uzam wende aka. Ɗala maa fagwalakw kégeyzene kusam aza tewtew, a ndaha a təwse. Heje anta a gəre Yesu ca, kuraɓ a ndav a tama anta, mananakw dac ata hayak. A təwse ca, a rakaw, a ŋgaya: «Bay Madakal, mada hwa kaɗaw ca, hwa kula ŋ rehzekey aza ŋ fagwalakw naka ŋgha, ŋ benekey aza!» 13 A təwse ca, Yesu a kafza ra anta, a ca a heɗe, a ŋgaya: «Sa kaɗawaw, saɗ ŋkwa ŋ fagwalakw ŋkwa, baw ŋkwa ŋ ɗala mabanaban!» Aya, a təwse a təwse ca, fagwalakw ma ata heje wese, saɗ a saɗ anta. 14 Aya, Yesu a ŋgazaw, a zlepene, a ŋgaya: «Hwa ɗaw ŋ ghwalza səkan maa sa lahwaw ŋgha anta ŋ kaw vayay səkwaw. Cemey, nda ghwalza ha ŋkwa a tama mala kwakwas ca, hwa kásaɗ ŋkwa. A dəwze anta, hwa valza səkan ma ata la kwakwas ana laŋkan ma mala Musa, ndar hejəye əy san ca, fagwalakw ŋkwa kásaɗ anta.» 15 A təwse ca, hejəye əy kavas ŋ ya zlam Yesu a tama a tama ata səkan maa a kalata ege. Aya, hejəye vəram əy ndaha ara mbe ŋ zləme zlap anta leŋ ŋ lem lereh ŋ dawar tata ege. 16 Cemey, a mbe anta tewtew ca, Yesu a yakzata aka, tel a nda anta teŋguleŋ anta ata la maa hejəye əy a təwse askwaw, a karak Gazlavay.

Yesu a rehza ɗala ma halɓaya

17 A pes wende aka, Yesu a kasasərakzata hejəye. Farəysa ege ey maghwal ma maŋkanaŋkan ege əy kénjeye a həzlar. Əy ndaha aka ta ŋ uzam ege vedəye vedəye ma ŋ hayak Galəyləy ey Yahudəya leŋ ma ŋ Urusaləyma. Cemey, ɓardakw a Gazlavay mbəy a mbe ŋ rehzata hejəye ma kadawar ege. 18 Aya, hejəye vedəye aka, əy ndaha, əy tewaha ɗala ma halɓaya ata lambaŋ anta. Əy mpam taf ŋ damza a ujek maa Yesu mbəy ŋma, ŋ wanza aka a tama anta. 19 A təwse ca, əy kélem taf ŋ gwar ara Yesu askwaw, mavəday hejəye dəydey. Aya, əy tev a heje wese mgba ata ha ujek anta, əy gbav uley, amba əy lem taf, əy tadakwza ata lambaŋ anta ŋ taba hejəye a tama Yesu anta. 20 Ca, maa Yesu a gəre maa əy lamza aza a unaf tata ana ɗala ma kula ŋ rehza heje tata aza wese ca, a zlepene ŋ heje ma halɓaya wese, a ŋgaya: «Ŋgama naka, gay ŋkwa ege əy képeleye aza.»

21 Aya, maghwal ma maŋkanaŋkan ege ey Farəysa ege wese, maa əy zləme ma ŋghe ege ca, əy ulakza, əy zlap, əy ŋgaya: «Heje ma ca ha anta aza ana Gazlavay ŋgha ca, ara heje vayay? Ɗala ma kula ŋ pal gay a hejəye ca, vayay? Səy Gazlavay teŋguleŋ anta ma kula!» 22 Cemey, Yesu a kasan ledeŋ ŋkwaɓ tata ege, aya, a ɗawzata, a zlepetene, a ŋgaya: «Hune deŋ ŋkwaɓ ana ebe ŋghe ca, ŋ vay? 23 Sa kula ŋ zlap aza: “Gay ŋkwa ege əy képeleye aza”, akwaw ca: “Gwarzam, nda”. Ŋ taba zlap ŋghe ege ca, ma ma kenelekey aza ndeɓndeɓ ŋ zlap ca, vekey? 24 Cemey, sa kaɗaw ca, hune san ka, sa, sa Mba Ɗala, sa a ɓardakw ma ata pal gay hejəye ma ŋ manhayak ege.» A təwse ca, a zlepene ŋ heje ma halɓaya wese, a ŋgaya: «Sa ma kazlapahwaw, gwarzam, ŋta lambaŋ ŋkwa, nda a wata!»

25 A təwse a təwse ca, heje wese perce a gwarzam ata nje hejəye tewtew. Aya, kpaŋ a ŋta lambaŋ anta maa əy tewaza a heɗe wese, tel a nda anta a wata, a kahəmanza Gazlavay ara. 26 Hejəye wese ege tewtew əy kedeŋ ŋkwaɓ dakala mambaza, əy həmanza Gazlavay. A təwse ca, ŋgəzleŋ kájata aza dakala, əy ŋgaya: «Nja ŋtakwaw, kaw heje kegəre ŋseŋ səkan maa heje gəre a tambaca ŋgha, askwaw.»

Yesu a yaɓa Lewəy ŋ səbaraw

27 A dəwze maa Yesu a la zaɓəla ŋgha aza ca, a damha aza a bəza, kəɗe a sar la ca, a gəre ɗala ma cak budaw, zlam anta Lewəy, kénjeye a ujek ma ata cak budaw. Aya, a zlepene, a ŋgaya: «Səberekey.» 28 A təwse ca, Lewəy wese gwarzam a gwarzam, yak a yakzata səkan ege ka tewtew, a səbaraw.

29 Aya, Lewəy wese, a jene gwaygwaya ma dakal, a səkan ma ata zam dakala a wata anta. Hejəye ma cak budaw ege vedəye vəram leŋ hejəye vedəye yam əy zam uda anta tata tewtew tata ŋ la anta. 30 Kəɗe ca, Farəysa ege ey maghwal ma maŋkanaŋkan ege ca, əy ŋgwaŋgwar, əy zlepetene ŋ madarlaŋw Yesu ege, əy ŋgaya: «Hune zam uda ey hune sa səkan ŋ la anta zlaɓa hejəye ma cak budaw ege, leŋ hejəye ma la gay ege ca, ŋ vay?» 31 A təwse ca, Yesu a zenzetene, a ŋgaya: «Hejəye ma werwer ege ca, ma tata a ɗala ma val menjevek ma ata reh hejəye ca, askwaw. Cemey, ma kaɗaw ma anta ca, hejəye ma kadawar ege. 32 Hejəye ma kedeŋza ŋ ha tata ege, tata hejəye ma taŋtaŋ ege a tama Gazlavay ca, Gazlavay kéleɓekey ŋ yahata askwaw. Cemey, a leɓekey ca, ŋ yahata hejəye ma kala gay ege, ndar əy ja mbahw, əy bawza unaf tata ege aza, əy səbar Gazlavay.»

Laɗaw ata vah ma ata zam səkan səkwaw

33 Farəysa ege wese, əy zlepene ŋ Yesu, əy ŋgaya: «Madarlaŋw Yuhana ege, ata vah vedəye ca, əy kazam səkan askwaw, əy karak Gazlavay. A zeney, madarlaŋw ŋcene ege əy kala andəwse yam. Ca, a madarlaŋw ŋkwa ege ca, əy kazam səkan, əy kasa səkan ca, ŋ vay?» 34 Aya, a zenzetene a laslaŋgal ma, a ŋgaya: «Ata vah gwaygwaya ma ata ca dəma ca, hune kula ŋ takata hejəye mayaya ege ka ŋ zam səkan, mada mawal dəma anta mbəy ara tata kwagwa vaw? 35 Cemey, vah maa əy keneŋtetene mawal dəma aza ca, a nandaha. Aya ata vah anta ca, əy kanazam səkan askwaw.»

Laslaŋgal ma ata səkan mavava ey səkan mewe

36 Yesu a zlepetene a laslaŋgal ma ŋgha, a ŋgaya: «Ɗala kula ŋ slah rəgwac mewe aza ŋ tay rəgwac mavava a mbe səkwaw! Mada a la ende ŋghe ca, rəgwac mewe a gay anta, maslaga rəgwac mewe anta əy kanajav a rəgwac mavava səkwaw. 37 A zeney, ɗala kula ŋ ɗeɗe mavaw mewe ma kamar ŋ na ŋ gajak bukəla ege mavava səkwaw. Mada a la ende ŋghe cemey, mavaw mewe ma kamar ŋ na wese, a naɓərahwata gajak bukəla mavava ege wese aza. A təwse ca, mavaw anta a nazaha aza ata hayak, aya, gajak bukəla ege wese yam əy nagay tata. 38 Cemey, əy ɗeɗe mavaw ma kamar ŋ na ca, ŋ gajak bukəla mewe ege. 39 Kaw vayay ma kásaza mavaw manana aza ca, a kaɗaw mavaw ma kamar ŋ na zeney səkwaw, mavəday, əy kazlap, əy ŋgaya: “Mavaw manana pa ma ndəram aha ma tak ŋ na!”»