Luk 4

Sayɗanu a slanza Yesu

A dəwze maa Yesu a lem baptəysma aza ŋ lakwat maa əy kayaɓa Urdun wese ca, a zenha aka mbəy ghef a Zəwet Gazlavay ma keweɗ. Aya, Zəwet wese a jeɓza ata darzlam, 2 wan raŋfaɗ Sayɗanu a kabaɗza. Ata vah anta ege tewtew ca, kaw a kazam səkan askwaw. A dəwze anta, metes a jaw. 3 Aya, Sayɗanu wese a zlepene, a ŋgaya: «Mada hwa mba Gazlavay ca, bawza ŋkəɗaŋ ŋghe aza, ŋ uda,». 4 Yesu a zenene, a ŋgaya: «Kéŋtereye ŋ ɗerewel Gazlavay, a ŋgaya: “Ɗala a nanja ca, a səkan ta zam gagaha səkwaw.”»

5 Aya, Sayɗanu wese, a tevza mgba, a təwse ca, kəcaŋ a ghwelzene hayak ege maa bay ege əy kazam bay ata tata ŋ manhayak tewtew. 6 Aya, a zlepene, a ŋgaya: «Sa navalahwaw ɓardakw ŋ gar ata ha hayak ŋghe ege tewtew, zlaɓa taŋtaŋ səkan ege ma ŋ hayak anta ege tewtew. Ca, səkan ŋghe anta ege ca, tewtew əy kéveleye asa ra naka, sa yam, sa kula ŋ valzata aza ŋ kaw vayay maa sa kaɗawaw. 7 Ana ebe ŋghe, hwa ca, mada hwa kégəleɓ a tama naka, hwa kéhəmenzekey ca, səkan ŋghe ege tewtew, sa navalahwata.» 8 Yesu a zenzene, a ŋgaya: «Kéŋtereye ŋ ɗerewel Gazlavay, a ŋgaya: “Səy hwa nahəman ca, Gazlavay Madakal ŋkwa, hwa nelene zlan ca, a mbe teŋguleŋ anta”»

9 A zeney, Sayɗanu a jeɓza ŋ Urusaləyma, a tevenza mgba ata ha ujek kwakwas, aya, a zlepene, a ŋgaya: «Mada hwa mba Gazlavay ca, mber ata ha ujek ŋghe kəɗe ata hayak, 10 mavəday, kéŋtereye ŋ ɗerewel Gazlavay, a ŋgaya: “Gazlavay a nezlepetene ŋ malaɓ anta ege ŋ həbarahwaw”, 11 kéŋtereye zeney, a ŋgaya: “Əy neslewahwaw asa ra tata ege ndar kaw ŋgas ŋkwa a ɗaw ŋ gurat ata ŋkəɗaŋ səkwaw.”» 12 Yesu a zenene, a ŋgaya: «Kéŋtereye ŋ ɗerewel Gazlavay, a ŋgaya: “Hwa ɗaw ŋ slanza Bay Madakal, Gazlavay ŋkwa səkwaw.”»

13 A dəwze maa Sayɗanu, kélem ma maa ata slanza Yesu wese askwaw ca, tel a nda anta, a yakza Yesu aka, səy a pes matakan zeney.

Yesu a mar zlan anta ŋ hayak Galəyləy

14 Yesu a zenha ŋ hayak Galəyləy, ɓardakw a Zəwet Gazlavay ma keweɗ mbəy a mbe dakala. Hejəye əy kaya zlam anta ŋ hayak anta tewtew. 15 A təwse ca, a kasasərakzata hejəye a ujek ma ata rak Gazlavay a Yahudu ege. Hejəye tewtew əy kahəmanza.

Hejəye ma a uzam Nasaratu ege əy kaɗaw ma Yesu səkwaw

16 Aya, Yesu a ndaha ŋ uzam Nasaratu ata la maa a galha. A pes ma ata zazak, a dam ŋ ujek ma ata rak Gazlavay a Yahudu ege ana ma a mpat a mpat. A təwse a gwarzam, a nda a tama hejəye ŋ jəŋge ɗerewel Gazlavay. 17 A təwse ca, əy velene ɗerewel mapaɗapaɗ a Esaya, mba ma zlap ma a Gazlavay. Aya, a palaw, a ndewzene kéŋtereye ata la anta, ana ebe ŋghe:

18 «Zəwet Gazlavay Madakal mbəy ata sa,

mavəday kémeyekey aza ŋ ghwelzetene Ma Mewe ma Taŋtaŋ ŋ hejəye metetekw ege.

A leɓekey ŋ ghwelzetene ŋ hejəye mambalambal ege, əy képeleye,

ŋ zlerzetene nje ŋ ulaf ege,

ŋ rehzata hejəye ma kaŋgwav ege.

19 A leɓekey ŋ ghwalza va taŋtaŋ a Gazlavay Madakal maa a neletene ŋ hejəye, hwas.»

20 Aya, a paɗ ɗerewel wese ka, a velene ka ŋ ɗala mala zlan a ujek anta. A dəwze anta, a nda, a nja ka a tama hejəye ŋ ghwelzetene ma anta. Hejəye tewtew ma a ujek ma ata rak Gazlavay anta, əy kasarza. 21 A təwse ca, a mar ŋ zlepetene, a ŋgaya: «Zlap meŋtereŋter maa hune zləme ŋghe ca, kála anta na ŋgha a tambaca, ŋ hune ma zləme ma anta.»

22 Hejəye tewtew əy kazlap ŋ taba tata, əy kedeŋ ŋkwaɓ ata zlap anta ege ma tuwah tuwah, əy ŋgaya: «Heje ŋghe ca, ara mba Yusufu səkwaw aza vaw?» 23 A təwse, a zlepetene, a ŋgaya: «Njəwen, hune nezlepekey a laslaŋgal ma ŋgha: “Hwa ca, hwa maval menjevek ma ata reh hejəye, rehza ha ŋkwa”. Hune nezlepekey zeney: “Nene kézləme səkan ege tewtew maa hwa lata ŋ Kafarnahum, cemey, lata səkan anta ege ete ŋghe ana mbe ŋ uzam ŋkwa yam may.”» 24 A zeney, a ŋgaya: «Sa kazlapahune njenjəwen, mba ma zlap ma a Gazlavay kaw vekey ca, əy kalamza kadak kadak ŋ uzam maa a mbawha ŋma ca, askwaw. 25 Hune deŋza ata Eləya, mba ma zlap ma a Gazlavay. A vah maa mbəy a manhayak ca, va mahkaɗ a ŋtəra ŋkwah, kaw van káɗa askwaw. Metes kála dakala ŋ hayak anta. Sa kazlapahune njəwen, weləye mce ege vəram ŋ Əysrayəyla aka, 26 cemey, Gazlavay kálaɓza Eləya ara wala kaw teŋguleŋ ŋ taba weləye wese ege ŋ cekzene askwaw, a laɓza ca, səy ara wala mbəlam wende aka ma ŋ uzam Sarepta ŋ hayak Səydawn gagaha. 27 A zeney, hune deŋza ata Eləysa, mba ma zlap ma a Gazlavay. A vah maa mbəy a manhayak ca, hejəye fagwalakw ege vəram ŋ hayak Əysrayəyla aka. Cemey, kérehza ɗala kaw teŋguleŋ ŋ taba hejəye fagwalakw ege wese askwaw. Səy a reha ca, Naman, ɗala ma ŋ hayak Səyrəya teŋguleŋ anta gagaha.»

28 Aya, maa hejəye tewtew ma a ujek ma ata rak Gazlavay ege wese, əy zləme ma ŋghe anta ca, əy kághwaɗ tata dakala mambaza ata Yesu. 29 A təwse ca, əy gwarzam, əy njewaza aza ŋ uzam wese, əy jeɓza kəɗa mgba ata dawan maa uzam tata wese, kélemeye a heɗe, ndar əy ŋcakwza kəɗa uza ŋ lalahw. 30 Cemey, Yesu pet a dam aza ŋ taba tata, tel a nda anta.

Yesu a gam zəwet malula ma ŋ ha ɗala

31 A dəwze anta, Yesu a nda ŋ Kafarnahum, uzam ma ŋ hayak Galəyləy. A təwse, a sesərekzetene zlap a Gazlavay ŋ hejəye a pes ma ata zazak. 32 A təwse ca, hejəye kédeŋ ŋkwaɓ dakala mambaza ata lasasərak zlap anta, mavəday a zlap a ɓardakw maa Gazlavay a velene. 33 Aya, a ujek ma ata rak Gazlavay wese, heje wende aka, maa zəwet malula a heɗe, a ja ula a mazlazlay, a ŋgaya: 34 «Hey! Yesu Nasaratu, hwa ɗaw ara nene vemey? Hwa nda ca, ŋ fətekzeney vaw? Sa kasanahwaw, hwa ca, hwa ɗala ma keweɗ maa Gazlavay a laɓaza.» 35 Aya, Yesu a bebecza zəwet malula wese, a ŋgaya: «Nja ka ɗekɗek, damha aza ŋ heje wese!» A təwse ca, zəwet malula wese nah a nahza heje wese ata hayak a tama hejəye. Cemey, a damha aza ŋ heje wese, a yakza ka, kaw kélene səkan wende askwaw. 36 Ma anta kéŋgetene ŋkwaɓ aza dakala mambaza ŋ hejəye tewtew. Əy zlap ŋ taba tata, əy ŋgaya: «Gwala! Ma ŋgha ca, ara ŋseŋ ma vekey! Ŋseŋ heje maa, a zlepetene ŋ zəwet malula ege a ɓardakw, əy damha aza ŋgha!» 37 A təwse ca, zlam Yesu a kaya ŋ hayak anta tewtew.

Yesu a rehzata hejəye dawar ege vəram

38 Yesu a damha aza a ujek ma ata rak Gazlavay, a nda a wata Səymawn. A təwse ca, man wala Səymawn anta mbəy werwer askwaw, hendərey kámbalza, kwahwaw ata kusam dakala. Aya, əy rak Yesu ndar a rehza ŋ dawar anta. 39 A təwse ca, a ŋteɓaha ata wala wese, a bebecza dawar wese, aya dawar anta dam a damha aza. A təwse a təwse, perce a gwarzam, mbəy werwer, a letene səkan ŋ zam.

40 Ca, maa pes a kandav ca, əy dene hejəye ma kadawar ege, kaw ŋseŋ dawar ege vekey vekey. Aya, a ca ra anta ata tata teŋguleŋ teŋguleŋ tewtew tata, a rehzata aza. 41 A təwse zeney ca, zəwet malula ege əy damha aza ŋ hejəye ma kadawar ege wese vəram, əy ja ula a mazlazlay, əy ŋgaya: «Hwa ca, hwa mba Gazlavay!» Cemey, Yesu a bebeczata zəwet malula ege wese, tak a takata ka ŋ zlap, mavəday əy kasan mbe ca, ara Kərəystu, ɗala ma Gazlavay a laɓaza ŋ rehzata hejəye.

Yesu a ghwal Ma Mewe ma Taŋtaŋ a Gazlavay ŋ hayak Yahudəya

42 Maa mapat a la anta ca, Yesu a damaha aza ŋ uzam wese, tel a nda anta a mazlam ata la maa ujek ege a təwse askwaw. Cemey, hejəye vəram əy kampamaw, aya, ndew əy ndewzene aza. Maa əy kéndewzene aza ca, əy kaɗaw a geɓza ka, a nda anta zeney səkwaw. 43 Cemey, a zlepetene, a ŋgaya: «Səy sa nda ŋ ghwalza Ma Mewe ma Taŋtaŋ mala bay mala Gazlavay ata hejəye ŋ uzam ege vedəye yam. Ayaw, Gazlavay a leɓekey ca, mavəday anta.» 44 Aya, a yakza uzam wese ka, a nda anta, ŋ ghwal Ma Mewe ma Taŋtaŋ a ujek ege vedəye ma ata rak Gazlavay ŋ hayak Yahudəya.