SURA YAKUB
Salam
1:1
1
Salam nahu la Yakub ma karawi wea d̄i ru'u b̄a Allah Ta'ala ro d̄i ru'u b̄a Ruma Isa Al Masih ma ndad̄i Ruma b̄a ndaita. Nahu tuntiku sura ake d̄i ru'u b̄a sara'a ela Allah Ta'ala ma ngge'e kai dou lai rasa d̄i sara'a dunia.Imbipu d̄i Allah Ta'ala
1:2-8
2 Cina ro angi! Nggara nggomid̄oho ma'iusi mboto pahu coba'an, pab̄uapu nggomid̄oho sana ademu. 3 B̄a one nggomid̄oho ma^badeku, nggara nggomid̄oho mangge'e mpa imbisi d̄i Ruma d̄i wakatu iumu coba'an ndad̄i nggomid̄oho ^dimanaha lembo ade. 4 Sandakapu loakud̄u lembo ademu ^dimawara ntuwu sampe nggomid̄oho ndad̄i poda-poda mpuruna ro wati wara ma kura ade samenana lampa rawi. 5 Nggara nawarasi d̄i ade wekimu ma kura loa timba ro lemba, pab̄uaku sia rahona d̄i Allah Ta'ala, ndad̄i Allah Ta'ala d̄imambeina loa timba ro lemba d̄i sia; b̄a one d̄i sanikina dou, Allah Ta'ala d̄imambeina kai ncera ro mbura ade lab̄o kai iu kasi ade. 6 Pala dou ma raho, pab̄uaku imbina; sia wati loana mbali mbua adena. B̄a one dou ma mbali mbua adena eded̄u b̄une balumba d̄i moti ra ewu b̄a angi. 7 Dou ma b̄une ede aina kacaina, b̄a one sia d̄imatarima au-au ra d̄i Ruma. 8 B̄a one dou ma mbali mbua ade ^dimadarura ncau d̄i ade mori ro wokona.
Ncoki mori ro ntau ro wara
1:9-11
9 Dou ela Al Masih ma ncoki mori pab̄uaku neo adena, nggara ka^desesi b̄a Allah Ta'ala. 10 Ro ela Al Masih ma ntau ro wara pab̄uaku neo ade rauna, nggara ka^bawasi b̄a Allah Ta'ala. B̄a one dou mantau ro wara ^dimambora b̄une wunta mpori. 11 Wakatu wontu liro ma pana kancere, mpori ede ^dimamale ro wuntana ^dimahoro ro mbora rau ntikana. Ndede rauku lab̄o dou ma ntau ro wara; sia ^dimaleli wakatu sia wunga kalampana usaha.
Coba'an ro goda'an
1:12-18
12 Taho ro sanara d̄i ru'u b̄a dou ma lembo ade wakatu sia iuna coba'an. B̄a one sawa'u b̄a sia wa'una sia iu d̄i ade coba'an ede, sia d̄imatarima ufana, eded̄u mori ro woko ra wa'u sake b̄a Allah Ta'ala d̄i dou-dou mameci ro ca'u Allah Ta'ala. 13 Nggara dou na^bohasi b̄a goda'an b̄une ede, sia aina nggahina, <<Goda'an ake ramaina ra d̄i Allah Ta'ala,>> b̄ara Allah Ta'ala wati wa'u ^dicoba b̄a ma dab̄ae ro Allah Ta'ala wati cobana kone cou-cou rau. 14 Pala sanikina dou rab̄oha b̄a coba'an b̄ara kane'ekai b̄a ndaina ma da^bae. 15 Edempara, nggara na^batusi au ra kane'ekai b̄a ma dab̄ae ede, nakamaiku dosa; ro nggara dosa ede nawa'usira naha ipi, nakamaiku made.
16 Cina ro angiku, ai to'ina nggomid̄oho b̄oha b̄a tipu! 17 Sanikina rambei ma taho lab̄o hadia ma mpuruna ramaina ra d̄i saroga, rakalondo b̄a Allah Ta'ala, Marakandad̄ina samenana ma taroa d̄i langi. Sia edeku Allah Ta'ala ma wati rungka weki, ro wati kandad̄ina dou mori d̄i ade ma rindi. 18 Kai rakane'ekai b̄a ndai-Na, Sia kandad̄ina ndai ndad̄i ana-ana-Na kai ncai nggahi ro eli-Na ma poda. Sia karawi ndedekaina loakud̄u ndai rakata hid̄i ma taho poda d̄i ade sara'a rakanda^di-Na.
Dou ma ringa ro kade'e ro ma kalampa nggahi ro eli Allah Ta'ala
1:19-27
19 Cina ro angi meci b̄a nahu! Ringa ro kade'e kab̄aepu ake! Sanikina dou pab̄uaku ringa rocina, pala na'ahoku nuntu ro na'ahoku mbanina. 20 Dou ma ca'u mbani wati loana karawi ma taho, ma kasana wea ade Allah Ta'ala. 21 B̄ara ndedena, pakipu sanikina rawi ranginakai ma sampu ro mada^bae. Weha aopu kai ade mataho nggahi ro eli ranggud̄a b̄a Allah Ta'ala d̄ei ademu, b̄a one nggahi ro eli ede nantau tenggo ^dimakasalamana nggomid̄oho.
22 Pab̄uapu nggomid̄oho kalampamu au ra nggahi b̄a Allah Ta'ala, aina ringa mpoamu, kai ndedena nggomid̄oho matipuku weki ndaimu. 23 Dou ma ringa ro kade'e nggahi ro eli Allah Ta'ala, pala wati kalampana eded̄u b̄une dou ma wunga dodo pahu ndaina masapodakaina d̄i tando saninu. 24 Sawa'u b̄a sia tio ka^bae-^baena, sia laona ro nefa lalona b̄uneku pahuna ede. 25 Hukum Allah nampuruna ro nantau tenggo d̄ihori kalosakaina manusia. Ro dou ma paresa kab̄ae ro matio ka^bae-^bae ro makalampa hukum-hukum ede, ro laina ringa mpoana edempara nefana, dou ede ^dibareka b̄a Allah Ta'ala d̄i ade sanikina lampa rawi ra karawina.
26 Nggara warasi dou ma iu wekina kai dou ma to'a d̄i agama, pala sia wati jaga ro sandakana lerana, ndad̄i sia natipuku weki ndaina; ndad̄i sambea ro ibadana wati wara onena. 27 To'a kalampa agama ma poda ro ma sapodakaina ra ntanda b̄a Allah Ta'ala, Ama ndaita eded̄u: ma bantu d̄ambe-d̄ambe to'i ma kasi pahu ro dou-dou siwe mbaru mboha ma susa ro ncoki, ro majaga weki ndaina loakud̄u aina ka'iha b̄a dunia ake.