Mab̄oha Imbi
11:1-40
11
Imbi eded̄u dasa d̄i sara'a au-au ra pamao b̄a ndai ro bukuti d̄i sara'a au-au ra ma wati loa ^di'eda b̄a ndai. 2 B̄ara ntauna imbi, ndad̄i dou-dou d̄i jaman ma'ulu sanakai b̄a Allah Ta'ala.3 B̄ara imbita, ndad̄i ndai taloaku ka'ao b̄a one dunia ake rakandad̄i kai nggahi ro eli Allah Ta'ala; ndad̄i, au ma loa ^di'eda, ndad̄ina ra d̄i au ma wati loa ^di'eda.
4 B̄ara imbina, ndad̄i la Habel d̄onggo ro mbeina d̄i Allah Ta'ala koroba ma ncewi taho ntewikaisi lab̄o koroba la Kain. B̄ara imbina ede, la Habel tarima b̄a Allah Ta'ala kai dou ma taho, b̄ara tadana b̄a one Allah Ta'ala matarima d̄onggo ro mbeina. La Habel nawa'ura made, pala b̄ara imbina ede, ndad̄i sia mbuipu nuntu ro nggahina saraka ake.
5 B̄ara imbina, ndad̄i la Henokh wati madena, malaisi ra hanta ro rawa'a aka Allah Ta'ala. Wati wara kone sab̄ua dou rau ma rumpana sia, b̄ara sia wa'ura hanta b̄a Allah Ta'ala. Ade Kitab Suci ratunti b̄a one sawatipu hanta la Henokh, sia kasana weana ade Allah Ta'ala. 6 Nggara watisi imbina, wati kone sab̄ua dou rau maloa kasana wea ade Allah Ta'ala. B̄a one dou ma loa mai d̄i Allah Ta'ala pab̄uaku imbina b̄a one Allah Ta'ala wara, ro b̄a one Allah Ta'ala ma cola cepena d̄i dou ma ngupa Sia.
7 B̄ara imbina, ndad̄i la Nuh ngoa b̄a Allah Ta'ala mab̄oha lampa rawi-lampa rawi d̄imandad̄i kento, ma wati loa ^di'eda b̄a sia. La Nuh to'a ro b̄atuna nggahi Allah Ta'ala ndad̄ina sia ndawina sab̄ua lopi, palasi lopi ede makasalamana ndai sia ro iwa ro wekina. Kai ndedena dunia ^dihukum, pala ndai la Nuh b̄ara imbina, ndad̄i Allah Ta'ala nggahina b̄a one la Nuh eded̄u dou ma taho.
8 B̄ara imbina, ndad̄i la Ibrahim to'ana d̄i Allah Ta'ala wakatu Allah Ta'ala ouna ro kauna sia lao aka dana ro rasa ra sake b̄a Allah Ta'ala d̄i sia. Edempara la Ibrahim laona kai wati b̄adena ta b̄e d̄i laokaina. 9 Kai imbina, la Ibrahim ngge'ena kai dou lai rasa d̄i dana ro rasa ra sake b̄a Allah Ta'ala d̄i sia ede. La Ibrahim ngge'ena ta ede d̄i ade kema. Ndede rau la Ishak ro la Yakub tarimana sake ma sama ra d̄i Allah Ta'ala. 10 B̄a one la Ibrahim wunga ngena-ngenana kota ra nia ro ra tu'u b̄a Allah Ta'ala kai dasa ma tenggo.
11 B̄ara imbina, ndad̄i la Ibrahim naloa raka ana ra d̄i la Sarah, konena la Ibrahim nawa'ura ipi tua, ro ndai la Sarah nambonggi. La Ibrahimi na'imbiku b̄a one Allah Ta'ala d̄imambei au ra sake-Na. 12 Konena la Ibrahim d̄i wakatu ede b̄une dou ma wa'ura made sarumbuna, pala sia rakana mboto londo ro maina, mbotona wati wa'u ^direke – b̄une mboto ntara ese langi ro sarae d̄i kengge moti.
13 Samenana dou ede ngge'e mpa imbina sampe madena. Siad̄oho wati tarimana lampa rawi-lampa rawi ra sake b̄a Allah Ta'ala, pala hampa b̄a edana ro weha ao sando'ona mpa. Ro kai ede siad̄oho katadana b̄a one siad̄oho dou lai rasa mpa ro dou ma ngge'e ndanda d̄i dunia ake. 14 Dou ma nggahi ndede nakatada podaku b̄a one siad̄oho wunga ngupana dana ro rasa d̄imandad̄i dana ro rasa d̄i ru'u b̄a ndai siad̄oho. 15 Laina dana ro rasa ra wa'u tu'u wi'i b̄a siad̄oho ede d̄i kananu-kananu b̄a siad̄oho.B̄a one nggara nandedesi, ndad̄i nawa'ura mboto wakatu d̄i ru'u b̄a siad̄oho d̄i dula mbalikaina d̄i dana ro rasa ede. 16 Pala, siad̄oho sapodakaina nane'eku sab̄ua dana ro rasa ma ncewi taho, eded̄u dana ro rasa aka saroga. B̄ara ndedena Allah Ta'ala wati majana nggara siad̄oho pehena Sia, Allah Ta'ala siad̄oho, b̄ara Allah Ta'ala wa'ura sadia weana sab̄ua kota d̄i ru'u b̄a siad̄oho.
17 B̄ara imbi rauna, ndad̄i la Ibrahim d̄onggo ro mbeina la Ishak ndad̄i koroba wakatu la Ibrahim uji b̄a Allah Ta'ala. D̄i la Ibrahim, Allah Ta'ala mbeina au ra sake-Na, pala la Ibrahim nira adena d̄onggona anana ma sab̄ua mpa menana ede. 18 Allah Ta'ala wa'ura nggahina d̄i la Ibrahim, <<Kai ncai la Ishak akeku nggomi d̄imaraka londo ro mai ra sake b̄a Nahu d̄i nggomi.>> 19 La Ibrahim na'imbi podaku b̄a one Allah Ta'ala naloaku kamori mbali la Ishak ra d̄i madekaina – ndad̄i, loa ^dinggahi, la Ibrahim wa'ura tarima mbalina la Ishak ra d̄i madekaina.
20 B̄ara imbina, ndad̄i la Ishak sakena bareka-bareka d̄i la Yakub ro d̄i la Esau d̄i ru'u mori ro wokona makento.
21 B̄ara imbina, ndad̄i sawatipu b̄a made la Yakub, sia barekana ana-ana la Yusuf – kai nentina tuta tikina ro nembana Allah Ta'ala.
22 B̄ara imbina, ndad̄i la Yusuf – wakatu sia ne'era made – sia nuntuna mab̄oha losana dou Israel d̄i Mesir, ro ngoa wi'ina auku d̄ipab̄ua karawi mab̄oha pekena.
23 B̄ara imbina, ndad̄i sawa'u b̄a ra ngganana la Musa, dou matuana cilina la Musa tolu wura ntoina. Eda b̄a siad̄oho b̄a one la Musa sab̄ua ana dou to'i ma gaga, ro siad̄oho wati dahuna d̄i au ra parentakai b̄a sangaji.
24 B̄ara imbina, ndad̄i la Musa sawa'u b̄a na'ena, wati ne'ena ^dipehe kai ana ra d̄i ana siwe b̄a sangaji Mesir. 25 Sia nancewi ca'upu iuna susa ro ncoki sama-sama lab̄o ela Allah Ta'ala ntewikaisi d̄i ru'u samporo wakatu iuna sana ra d̄i mori ma dosa. 26 La Musa nawi'ikaiku kab̄awa ro katuna b̄ara Sangaji Makasalama nancewi ntau co'i ntewikaisi lab̄o raka sara'ana ntau ro wara ra d̄i dana ro rasa Mesir, b̄ara la Musa nane'eku raka ufa d̄i ainaina makento.
27 B̄ara imbina, ndad̄i la Musa tu'u wi'ina Mesir kai wati wara dahuna d̄i mbanikai b̄a sangaji. La Musa lao rakana au d̄i ne'ena b̄une-b̄une sia wa'ura edana Allah Ta'ala ma wati tada ede. 28 B̄ara imbina, la Musa katu'una ndiha Paskah ro parentana loakud̄u ta^da ncai uma dou Israel ^dikarete kai ra'a loakud̄u Mala'eka Mataki hinti nawa aina hadena ana-ana sasa'e siad̄oho.
29 B̄ara imbina, ndad̄i dou-dou Israel naloa sapa Moti Kala, b̄une-b̄une siad̄oho lampana ese wawo dana ma mango, pala dou-dou Mesir ono b̄a moti ede, wakatu siad̄oho sapa rauna moti ede.
30 B̄ara imbina, dou-dou Israel naloa ^dumba tembo-tembo Yerikho sawa'u b̄a lampa heko b̄a siad̄oho pidu nai ntoina. 31 B̄ara imbi rauna, ndad̄i la Rahab, dou siwe sunda ede, wati rahade sama-sama lab̄o dou-dou ma ao Allah Ta'ala; b̄ara sia tarima katahona dou-dou Israel malao nina.
32 Nahu kaloa mpa nuntu ncau-ncau, pala wati ncihi wakatu d̄i ru'u b̄a nahu. B̄ara nahu watipu pehe rauku la Gideon, Barak, Simson, Yefta, Daud, la Samuel, ro nabi-nabi. 33 B̄ara imbina, ndad̄i siad̄oho wa'ura kakoana karaja'an-karaja'an. Siad̄oho kalampana au ma ncihi, ndad̄i siad̄oho tarimana au ra sake b̄a Allah Ta'ala. Siad̄oho kapuna asa-asa singa, 34 kamadena afi ma kalea fampa, wati b̄oha b̄a peda. Siad̄oho namapu ro rome, pala nandad̄i tenggo; siad̄oho nadisa poda ade lewa ro lakakai ndad̄ina siad̄oho kakoana tentara-tentara bangsa lai rasa. 35 B̄ara imbina, ndad̄i dou-dou siwe raka mbalina dou-dou ra mecina, b̄ara siad̄oho ^dikamori mbali.
Wara rau kai nira adena ^dikancoki sampe madena, ro wati ne'ena d̄ihori kalosa, b̄ara ne'ena ^dikamori mbali ru'u mori ro woko ma ncewi taho. 36 Wara rasungge-sungge, racambo, randante ro rakalu'u d̄i ade uma bui. 37 Siad̄oho rato^ba kai wadu sampe madena, wara ra dompo kai garagaji, ro rahade kai peda. Siad̄oho laona d̄i dana ro rasa dou kai kanina kani ro lombo ra ndawi kai huri jimba atao huri mbe'e; siad̄oho ncoki morina, b̄ara rakancoki. 38 Dunia ake laina hid̄i ma patu d̄i ru'u b̄a siad̄oho.Siad̄oho nalampa d̄i so sarae ro d̄i doro-doro to'i, ro ngge'e d̄i ade karombo-karombo doro ro ade karombo-karombo dana.