Hi^di ma raso d̄i dunia ro d̄i saroga
9:1-22
9
Sake ma sarambakaina nantau atoran-atoran sambea ro ibada, ro nantau rau hid̄i sambeakai ra ndawi b̄a manusia. 2 Sab̄ua kema ra tu'u eded̄u ma wara ta wela tandona tangara kai ^Bili Raso. Ta ede wara ed̄i ilo d̄iwi'ikai ilo, ro wara rau meja hid̄i wi'ikai roti ^di^donggo ro mbei d̄i ru'u b̄a Allah Ta'ala. 3 Ta wela ^deina, eded̄u d̄i kontu satampa ma ka^duakaina, wara ^bili ^ditangarakai ^Bili Mawancu Raso. 4 Ta d̄ei ^bili ede wara mezba ra ndawi kai masa ^dika'a kai ^dupa, ro wara rau Peti Sake ra peta kai masa. Ta d̄ei Peti ede wara katoa masa isina manna, tiki la Harun ma wa'ura ncuri, ro d̄ua lompe wadu wara ratunti 10 mbua parenta Allah Ta'ala. 5 Ta ese wawo Peti ede wara d̄ua mbua Kerub, eded̄u mahluk mantau kalete d̄ikatandakai wara maina Allah Ta'ala. Kalete d̄ua mbua mahluk ede nawira wekina ese wawo ^bonto Peti, eded̄u hid̄i kangampu kai dosa. Pala sara'ana ede wati loa d̄i ngoa kab̄ae ake.6 Ndedeku cara atona hid̄i ma raso ede. Sanikina ainaina imam-imam lu'una ta wela tando d̄i kema ede d̄ikalampakaina taki ro puta siad̄oho. 7 Ma loa lu'u ta wela ma d̄ei poda d̄i kema ede eded̄u imam agung mpa. Sia karawina ede sakali mpa samba'a. Sia kalampana ede kai wa'ana ra'a ^di^donggo ro mbei d̄i Allah Ta'ala d̄i ru'u b̄a weki ndaina ro d̄i ru'u b̄a ela Ruma b̄ara karawina dosa kai wati ra^baekai b̄a adena. 8 Kai atoran ede, Roh Allah nakatadaku, b̄a one santoi kema wela tandona ede mbuipu mpendena, ncai lu'ukai d̄i ade ^Bili Mawancu Raso ede watipu henggana weki. 9 Ake ma ndad̄i tanda jaman ake; aona b̄a one d̄onggo ro mbei-^donggo ro mbei ro koroba-koroba binata ra^donggo ro mbei d̄i Allah Ta'ala, wati loana kampuruna ade mpida dou ma wa'a d̄onggo ro mbei. 10 B̄a one upacara-upacara ede nandapo angina lab̄o ngaha ro nono mpa, ro mboto pahu upacara karasokai. Samenana ede atoran-atoran ma tada mpa ma lampa saraka wakatu Allah Ta'ala kandad̄i sara'ana ndad̄i ^bou.
11 Pala Al Masih wa'ura mai kai Imam Agung ra d̄i lampa rawi-lampa rawi ma taho ma wa'ura wara.g Kema Ruma hid̄i ^dikalampakai b̄a Sia taki ro puta-Na kai Imam Agungkaina eded̄u kema mancewi d̄ese ro ntasa ro ma ncewi mpuruna. Ede laina ra ndawi b̄a manusia; aona laina ra maina ra d̄i dunia rakandad̄i ake. 12 Al Masih lu'una d̄i ^Bili Mawancu Raso d̄i ade kema ede sakali mpa d̄i ru'u b̄a santoi-ntoina. D̄i wakatu ede Sia wati wa'ana ra'a mbe'e rangga atao ra'a ana capi ^di^donggo ro mbeikaina; Sia wa'ana ra'a ndai-Na, ro kai ede Sia hori kalosana ndai ru'u santoi-ntoina. 13 Ra'a mbe'e ro capi rangga ro kalu^bu ra d̄i koroba ana capi, ^dikani ^dikaretekai d̄i dou-dou ma najis b̄atu atoran agama loakud̄u siad̄oho ndad̄i raso. 14 Nggara naloasi ra'a ro kalu^bu ede karaso dou-dou ma najis ede, au walipu ra'a Al Masih! Kai ncai Roh ma ede ro hi^di, Al Masih d̄onggo ro mbeina weki ndai-Na d̄i Allah Ta'ala ma ndad̄i koroba ma mpuruna. Ra'a-Na makaraso ade mpida ndai ra d̄i upacara agama ma wati wara onena, loakud̄u ndai loa karawi wea Allah Ta'ala ma mori.
15 B̄ara ndedena Al Masih mandad̄i Ncai d̄i ru'u sab̄ua sake ma b̄ou, loakud̄u dou ma wa'ura kad̄ale b̄a Allah Ta'ala naloa tarima bareka-bareka ma ede ro hid̄i ra wa'u sake b̄a Allah Ta'ala. Samenana ede naloa ndad̄i b̄ara wa'ura wara ma made, eded̄u Al Masih; ro made-Na ede mahori kalosana dou ra d̄i ncara ro kancaru ra karawi b̄a siad̄oho ra aipu wakatu sake ma sarambakaina mbuipu ^dikani.
16 Nggara warasi sura pasaka, pab̄ua rauku wara bukutina b̄a one dou ma randawi sura ede nawa'ura made. 17 B̄a one sura pasaka wati ^dikani nggara dou ma randawina mbuipusi morina. Sura ede ^dikani sawa'u b̄a made dou ede mpa. 18 B̄ara ndedena sakeh ma sarambakaina pab̄ua rauku ^dikasaha kai ra'a. 19 Saramba-rambakaina la Musa karongga sara'ana parenta Hukum Taurat d̄i bangsa Israel. Sawa'u b̄a ede la Musa wehana ra'a ana capi ro ra'a mbe'e rangga, edempara kacampona lab̄o oi, sawa'u b̄a ede karetena d̄i Kitab Taurat ede ro d̄i sara'a bangsa Israel kai kanina mpori-mpori hisop ro kere jimba ma kala tua. 20 Wunga kalampana rawi ede nggahi la Musa, <<Akeku ra'a ma kasahana sake d̄i Allah Ta'ala ma pab̄ua ^dito'akai b̄a nggomid̄oho.>> 21 Edempara kai cara ma sama, la Musa karetena ra'a ede rau d̄i Kema Ruma ro d̄i samenana tau ro tu'i d̄i sambea ro ibadakai. 22 Ncihi romo nggara ^batusi hukum Taurat, ne'empara samenana au-au ^dikaraso kai ra'a; ro dosa loa ^dikangampu wea nggara warasi ^boho ra'a.
Koroba Al Masih mafurana dosa
9:23-28
23 Kai cara b̄une edeku tau ro tu'i ma ndad̄i tanda lampa rawi-lampa rawi b̄une d̄i saroga, paralu ^dikaraso. Pala d̄i ru'u b̄a lampa rawi-lampa rawi ma wara d̄i saroga ede paraluku koroba ma d̄o'o ncewi taho. 24 B̄a one Al Masih wati lu'una d̄ei ^Bili Maraso ra ndawi b̄a manusia eded̄u conto mpa ra d̄i ^Bili Maraso ma sapodakaina. Al Masih lu'u kesena d̄i saroga; ake Sia satandona Allah Ta'ala ^dikapentikaina ndaita. 25 Imam agung Yahudi d̄i sanikina mba'a lu'u d̄ei ^Bili Mawancu Raso d̄i ade Uma Ruma kai wa'ana ra'a sab̄ua binata. Pala Al Masih wati lu'u ntuwuna ^di^donggo ro mbeikaina weki ndai-Na. 26 B̄a one nggara nalu'u ntuwusi, ede aona Sia nasusa ro ncoki ncau ra tampu'u aipu ra kandad̄i dunia ake. Pala ma sapodakaina, ake wakatu jaman cumpukaina ake, Sia maina sakali mpa ^dimafura karaso dosa kai korobana weki ndai-Na. 27 Allah Ta'ala wa'ura katantuna b̄a one manusia sakali mpa madena ro sawa'u b̄a ede d̄iparesa ncihi ro ncarana b̄a Allah Ta'ala. 28 Ndede rau Al Masih sakali mpa d̄onggo ro mbeina koroba ^difurakaina dosa mboto dou. Sia d̄imamai wali ru'u kad̄ua kalikaina, laina d̄imakanggori masa'ala dosa, pala d̄ikasalamakaina dou-dou ma ngena mai Sia.