Ainaina ^disanawakai ra sadia wea b̄a Allah Ta'ala
4:1-13
4
Au ra sake b̄a Allah Ta'ala nangge'e mpa warana, ro ndai d̄imbei hid̄i ^disanawakai b̄une ra sake-Na. Ndad̄i, ndai pab̄uaku sandaka loakud̄u aina wara kone sab̄ua dou rau d̄i ade weki nggomid̄oho ma wati iu hid̄i sanawakai ra sake ede. 2 B̄a one haba ^disanakai ede wa'ura ngoa ro kahaba d̄i ndaita sama b̄une d̄i siad̄oho ntoina. Pala d̄i ru'u b̄a siad̄oho, haba ede wati wara onena. B̄a one wakatu siad̄oho ringana, siad̄oho wati imbina. 3 Pala ndai ma imbi matarima hid̄i sanawakai ra sake b̄a Allah Ta'ala ede. Ede ncihi ncao b̄une ra ranggahi ndake b̄a Allah Ta'ala,<<Nahu kambani ro kasumpa,
<Siad̄oho wati ^dimalu'u
d̄i dana ro rasa ede ^diloakaina sanawa sama-sama lab̄o Nahu.> >>
Allah Ta'ala nggahi ndedekaina kone karawi-Na wa'ura nggori ra'aipu Sia kandad̄ina dunia ake. 4 B̄a one mab̄oha ainaina kapidukaina, wara ratunti ndake ade Kitab Suci, <<D̄i ainaina kapidukaina Allah Ta'ala sanawana ra d̄i samenana karawi-Na.>> 5 Mab̄oha lampa rawi ede ratunti ndake wali, <<Siad̄oho wati ^dimalu'u d̄i dana ro rasa ede d̄i rakakaina hid̄i sanawakai sama-sama lab̄o Nahu.>> 6 Ndad̄i siad̄oho ma saramba-rambakaina ma ringa haba mab̄oha haba ^disanakai ede, wati tarimana hid̄i sanawakai ede b̄ara siad̄oho wati imbina. Nggara ndedesi wa'ura tada poda b̄a one wara dou-dou makalai ma loa tarima hid̄i sanawakai ede. 7 B̄a one Allah Ta'ala wa'ura katantuna sab̄ua ainaina ma kalai wali, ra pehekai <<Ainaina Ake>>. Pila-pila mba'a sawa'u b̄a ede Allah Ta'ala manuntu mab̄oha lampa rawi ede kai ncai la Daud, d̄i ade ayat raweha akande,
<<Nggara d̄i ainaina ake nggomi maringasi eli Allah Ta'ala,
nggomi aina kateramu tuta.>>
8 Nggara misakai la Yosua wa'ura mbeina dou-dou ede hid̄i sanawakai ra sake b̄a Allah Ta'ala, ndad̄i Allah Ta'ala wati ^dimanuntu wali mab̄oha sab̄ua ainaina ma kalai. 9 Ndad̄i, d̄i ru'u b̄a ela Allah Ta'ala mbuipu wara sake ^disanawakai b̄une Allah Ta'ala masanawa d̄i ainaina kapidukaina ede. 10 B̄ara dou ma tarima hid̄i sanawakai ra sake b̄a Allah Ta'ala d̄i sia ede, ^dimasanawa rau ra d̄i samenana karawikaina, sama b̄une Allah Ta'ala. 11 B̄ara ndedena, maira ndai ta'usaha kapodaku d̄i tarimakaita hid̄i sanawakai ra sake b̄a Allah Ta'ala ede. Ai to'ina kone sab̄ua dou rau ra d̄i ndaita ma wati raka hid̄i sanawakai b̄une siad̄oho ntoina, b̄ara wati imbina d̄i Allah Ta'ala.
12 Nggahi ro eli Allah Ta'ala eded̄u nggahi ro eli ma mori ro tenggo; nancewi ngaha ntewikaisi lab̄o peda mantau woi ^bali ^bae. Nggahi ro eli ede nacaki ipi ^dei, ndad̄ina nacenggaku nawa lab̄o roh, puru ro peke lab̄o sambadi, ndad̄ina d̄i ^badekai sa^dei-^deina fiki ro kananu ro nia b̄a ade manusia. 13 Wati wara kone sab̄ua mahluk rau ma loa cili weki ra d̄i ntanda b̄a Allah Ta'ala. Samenana naronda ro nahengga weki d̄i tando-Na. Ro ndaita pab̄uaku mbei su'u ro tundu ndai d̄i Sia.
Isa Al Masih eded̄u Imam Agung
4:14–5:10
14 B̄ara ndedena ndaita pab̄uaku nenti kacia d̄i au ra imbikai b̄a ndai. B̄a one ndaita ntau Imam Agung Ma ^Dese Ro Ntasa, ma wa'ura lu'u sampe d̄i tando Allah Ta'ala – Siaku Isa Al Masih Ana Allah.1 15 Imam Agung ndaita ede laina imam ma wati loa iu wea mapu ro rome ndai. Pala, Sia wa'ura b̄oha b̄a coba'an d̄i ade samenana lampa rawi, sama b̄une ndaita; pala Sia wati karawina dosa! 16 B̄ara ndedena, maira ndai kai disa poda lao satando Allah Ta'ala ma parenta kai taho ade. Allah Ta'ala ^dimakasi ade d̄i ndaita ro nambeiku bareka d̄i ndaita loakud̄u ndaita raka bantu mancihi ncao nggara rakasira wakatuna.