Ruma Isa nancewi na'e ntewikaisi lab̄o la Musa
3:1-6
3
Cina ro angi masama-sama ela Al Masih ra wa'u kad̄ale rau b̄a Allah Ta'ala! Kananu kataho-tahopu mab̄oha Isa Al Masih ake! Allah Ta'ala nggaduna Sia d̄imandad̄i Imam Agung ade agama ra imbikai b̄a ndaita. 2 Sia nato'a d̄i Allah Ta'ala ma rahanta Sia ^dimakalampana rawi ede, b̄une la Musa rau ntoina nato'a kalampa taki ro putana d̄i Uma Allah Ta'ala. 3 Pala Isa patu d̄imaraka lia ro horoma ma ncewi na'e ntewikaisi lab̄o la Musa. B̄a one dou ma ratu'u uma pab̄uaku rakana lia ro horoma ma ncewi na'e ntewikaisi lab̄o uma ratu'una ede. 4 Ncihi romo sanikina uma tantu wara dou ma tu'una, pala ma ratu'u samenana au-au eded̄u ndai Allah Ta'ala. 5 La Musa nato'a kai dou makarawi d̄i ade Uma Allah Ta'ala ro makarongga lampa rawi-lampa rawi d̄i au ra karongga b̄a Allah Ta'ala mab̄oha wakatu ma mai kento. 6 Pala Al Masih nato'a kai Ana ma ntau su'u ro tundu d̄i Uma Allah Ta'ala. Ro ndai akeku Uma Allah Ta'ala, nggara ndai ngge'e mpa kapoda ade ro ngge'e mpa imbi poda d̄imaraka au ra pamao b̄a ndaita.Iha leli b̄ara murtad
3:7-19
7 B̄ara ndedena, b̄une ranggahi b̄a Roh Allah,
<<D̄i ainaina ake, nggara nggomi maringasi eli Allah Ta'ala,
8 nggomi aina kateramu tuta,
b̄une wa'i ro waromu,
wakatu siad̄oho barontana d̄i Allah Ta'ala, ro ujina Allah Ta'ala d̄i so sarae.
9 Nggahi Allah Ta'ala, <Ta aka wa'i ro waromu cobana Nahu, ro ujina Nahu,>
<sapodakaina siad̄oho wa'ura edana au ra karawi b̄a Nahu 40 mba'a ntoina.>
10 B̄ara ndedena Nahu mbani-Ku d̄i siad̄oho ro nggahi Nahu,
<Siad̄oho wati to'a ncauna,
ro wati ngawana to'akai d̄i parenta-parenta Nahu.>
11 Nahu kambani ro kasumpa,
<Siad̄oho wati ^dimalu'u d̄i dana ro rasa ede
d̄i rakakaina hid̄i sanawakai sama-sama lab̄o Nahu.> >>
12 Cina ro angi, jaga-jagapu aina sampe warakaina kone sab̄ua dou rau d̄i ade weki nggomid̄oho ma ndede dab̄ae adena ro wati ntauna imbi, ndad̄ina sia warina weki ro kad̄o'ona weki d̄i Allah Ta'ala ma mori! 13 Ndad̄i, loakud̄u wati wara kone sab̄ua dou rau d̄i weki nggomid̄oho tipu b̄a dosa ndad̄ina ma'aoku Allah Ta'ala, pab̄uapu nggomid̄oho cua-cua ngoa ro tei kataho angi d̄i sanikina ainaina santoi ndai mbuipu morita ade jaman ra pehekai <<Ainaina Ake>> d̄i ade Kitab Suci. 14 Ndai sara'a eded̄u lenga masama karawi kapoda ade lab̄o Al Masih, sura ndai nenti kaciata imbi ma poda ra kantau b̄a ndai ra aipu saramba wa'una saraka cumpukaina.
15 Akeku ra tunti ade Kitab Suci,
<<D̄i ainaina ake, nggara nggomi ma ringasi eli Allah Ta'ala,
nggomi aina kateramu tuta, b̄une wa'i ro waromu,
wakatu siad̄oho barontana d̄i Allah Ta'ala.>>
16 Cousi dou-dou ma ra ringa eli Allah Ta'ala edempara barontana d̄i Allah Ta'ala? Ede^du sara'a dou ra wa'a kalosa b̄a la Musa d̄i Mesir. 17 Ro d̄i couku Allah Ta'ala mbanikaina sampe 40 mba'a ntoina? D̄i ru'u b̄a siad̄oho ma dosa, ma made d̄i so sarae. 18 Wakatu Allah Ta'ala sumpa ndakena, <<Siad̄oho wati ^dimalu'u d̄i dana ro rasa ede d̄i loakaina sanawa sama-sama lab̄o Nahu>> – cousi siad̄oho ra nggahi b̄a Allah Ta'ala ede? Siad̄oho ede eded̄u dou-dou ma baronta d̄i Allah Ta'ala. 19 Ake ndai taloara ka'ao b̄a one siad̄oho wati loana lu'u d̄i dana ro rasa ede, b̄ara siad̄oho wati imbina d̄i Allah Ta'ala.