Salamakai ma na'e
2:1-4
2
B̄ara ndedena ndaita pab̄uaku ncewi kapoda ade b̄atu d̄i ngoa ro tei-ngoa ro tei ra wa'u ringa b̄a ndaita, loakud̄u ndai aina tu'u wi'i imbi ndaita. 2 Nggahi ro eli ra karongga b̄a mala'eka-mala'eka d̄i wa'i ro waro ndaita palasi nancihi, ro dou ma wati b̄atu atao ma wati to'a d̄imatarima hukuman ma ncihi ncao d̄i ru'u b̄a sia. 3 Au walipu salamakai ma ncewi na'e ntewikaisi lab̄o au ra karongga ede! Nggara ndai watisi tio ro ntanda d̄i salamakai ede, tantu ndai wati ^dimahori weki ra d̄i hukuman. B̄ara ndai Allah Ta'ala masaramba-rambakaina ma ngoa ro kahaba salamakai ede, ro dou masaramba-rambakaina ma ringana wa'ura bukutikaina d̄i ndaita ncihi ro podana. 4 Ari mai b̄a ede, Allah Ta'ala ma katenggo rauna au ra nggahi b̄a dou-dou ede kai karawina samenana pahu b̄isa ro guna ro ma cengga-cengga au ra mbei b̄a Roh Allah b̄une ra kane'ekai b̄a ndai-Na.Ma hengga ncai d̄i ru'u b̄a manusia
2:5-18
5 Mala'eka-mala'eka wati rakana kuasa ra d̄i Allah Ta'ala ^dimaparenta dunia b̄ou d̄imamai kento, eded̄u dunia ma wunga nuntu b̄a ndai ake. 6 Pala wara d̄i ade Kitab Suci ratunti ndake,
<<Cousi manusia ede, io Allah Ta'ala, ndad̄ina Ita ma ngawaku kawara manusia ede?
Manusia eded̄u manusia mpa, pala Ita ma ntanda ro edaku manusia ede!
7 D̄i ru'u b̄a samporo wakatu Ita kandad̄imu manusia ede sato'i ncewi awa ntewikaisi lab̄o mala'eka.
Ita mambeiku d̄i manusia hid̄i ma d̄ese ro ntasa ro ma ncewi taho,c
8 ro kanda^dita manusia makuasakai d̄i samenana au-au.>>
Nggara nggahisi b̄a one Allah Ta'ala ma rakandad̄ina manusia <<makuasakai d̄i samenana au-au>>, ede aona b̄a one wati wara kone sab̄ua rau ma wati rakuasakai b̄a manusia. Konena ndede, ndai wati edata ake manusia makuasakai d̄i samenana au-au. 9 Pala ndaita wa'ura edata Isa Al Masih makuasa! Sia rakandad̄i sato'i awa mai b̄a mala'eka d̄i ru'u wakatu samporo to'i, loakud̄u kai tahona ade Allah Ta'ala, Sia naloa made d̄i ru'u b̄a sara'a manusia. Ndai ta'edaku Sia ake rambei hid̄i ma d̄ese ro ntasa ro mataho poda b̄ara Sia wa'ura iu susa ro ncoki sampe madena. 10 Poda romo, Allah Ta'ala – ma rakandad̄i samenana au-au b̄une ra kane'ekai b̄a ndai-Na – ma kandad̄ina Isa ma mbei salama ma mpuruna kai ncai susa ro ncokina. Kai ndedena Allah Ta'ala naloa rece mboto dou d̄ikad̄ese ro kantasa sama-sama lab̄o Ruma Isa. B̄ara Siaku ma hengga wea ncai d̄i ru'u b̄a siad̄oho loakud̄u ^dikasalama wea.
11 Isa Al Masih karasona manusia ra d̄i dosa-dosa siad̄oho.Ro nataho Sia ma rakaraso ro siad̄oho rakarasona ede sama-sama ntau sab̄ua Ama. B̄ara ndedena Ruma Isa wati majana mangaku siad̄oho ede kai sa'e ro ari ndai-Na. 12 Isa manggahi d̄i Allah Ta'ala,
<<Mada ^dimangoa ro kahabana d̄i sa'e ro ari Mada mab̄oha Ita.
Mada ^dimaroi ro wadi Ita d̄i ade edakai angi siad̄oho.>>
13 Isa Al Masih manggahi rauna, <<Nahu ^dimawi'i weki-Ku d̄i Allah Ta'ala.>> Ro Sia nggahi rauna, <<Akeku Nahu, ma sama-sama lab̄o ana-ana ra wa'u mbei b̄a Allah Ta'ala d̄i ru'u b̄a Nahu.>>
14 B̄a one dou-dou ra pehe b̄a Sia ana ede, eded̄u mahluk manusia ma loa made, ndad̄i ndai Isa Al Masih ndad̄i sama lab̄o siad̄oho ro mori d̄i ade ka'ada'an manusiakaina. Sia karawi ndedekaina, loakud̄u kai made-Na Sia naloa kaleli Iblis ma kuasakai made. 15 Kai cara ede Sia hori kalosana dou-dou ma sa'umu morina ra ka'ada b̄a dahu d̄i made. 16 Tadara b̄a one laina mala'eka rabantu b̄a Sia, malaisi londo ro mai la Ibrahim. 17 Ake aona b̄a one Sia pab̄uaku ndad̄i sama lab̄o sa'e ro ari^doho-Na ade samenana lampa rawi. Ro kai ndedena Sia naloa ndad̄i Imam Agung ma to'a ro mantau kasi ade. Isa Al Masih wa'ura ndad̄i koroba ^dimasu'u ro tunduna mbani Allah Ta'ala loakud̄u dosa-dosa manusia loa ^dikangampu wea. 18 Ro b̄ara ndai Sia wa'ura iuna susa ro ncoki ro b̄oha b̄a coba'an, Sia naloa bantu dou-dou ra b̄oha b̄a coba'an.