Ibrani 1

SURA D̄I RU'U B̄A DOU

IBRANI

Allah Ta'ala nuntu ro nggahina kai ncai Ana-Na

1:1-3

Aipu jaman ma'ulu ntuwu poda Allah Ta'ala nuntu ro nggahina lab̄o wa'i ro waro ndaita kai ncai nabi-nabi ro kai kanina mboto pahu cara. 2 Pala d̄i jaman ma cumpukaina ake, Sia nuntu ro nggahina lab̄o ndai kai ncai Ana-Na. Kai ncai Ana-Na akeku Allah Ta'ala kandad̄ina dunia lab̄o isina. Ro Allah Ta'ala wa'ura katantuna b̄a one Ana-Na ake rau ma ntau hak d̄imaraka samenana ma wara. 3 Sia edeku cahaya ^Dese Ro Ntasa Allah Ta'ala; Sia edeku gamba ma tada ra d̄i weki ndai Allah Ta'ala. Sia rauku ma jaga ro sandaka ntumana dunia lab̄o isina ake kai renta-Na ma wancu ntau kuasa. Sawa'u b̄a Sia hori kalosana manusia ra d̄i dosa-dosa siad̄oho, Sia ma parenta d̄i saroga sama-sama lab̄o Allah Ta'ala Mantau kuasa ma ese poda.

Na'e ro ntoruna Ana Allah

1:4-14

4 Ana ede rakana hid̄i ma d̄o'o ncewi ese ntewikaisi mala'eka, ro ngara ra mbei b̄a Allah Ta'ala d̄i Sia d̄o'o ncewi ^dilia ro horoma ntewikaisi ngara ra mbei d̄i ru'u b̄a mala'eka. 5  Allah Ta'ala wati parana nggahi ndakena kone d̄i sab̄ua mala'eka rau,

<<Nggomiku Ana Nahu;

d̄i ainaina ake Nahu mandad̄i Ama-Mu.>>

Wati parana rauna Allah Ta'ala nggahi ndakena mab̄oha mala'eka,

<<Nahu d̄imandad̄i Ama-Na,

ro Sia d̄imandad̄i Ana Nahu.>>

6  Pala wakatu Allah Ta'ala nggaduna Ana-Na ma sasa'e d̄i dunia ake, Allah Ta'ala nggahi ndakena,

<<Sara'a mala'eka Allah pab̄uaku suju ro nembana Ana ede.>>

7  Mab̄oha mala'eka-mala'eka, Allah Ta'ala nggahi ndakena,

<<Allah Ta'ala kandad̄ina mala'eka-mala'eka-Na ndad̄i angi,

ro dou-dou makarawi wea-Na ndad̄i kalea afi.>>

8  Pala d̄i Ana ede, Allah Ta'ala nggahina,

<<Hi^di dohokai Ita, io Allah Ta'ala, ^dima'ede ro hi^di santoi-ntoina!

Ro Karaja'an Ita eded̄u karaja'an ma adil.

9 Nggomi maca'u lampa rawi ma adil, ro wati ca'umu d̄i lampa rawi ma ncara;

b̄ara ndedena Allah Ta'ala, Allah Ta'ala-Mu, kad̄alena Nggomi

ro mbeina d̄i ru'u b̄a Nggomi hid̄i ma taho ma kamaina mori sana,

ma ncewi ntewikaisi lab̄o lenga^doho-Mu.>>

10  Allah Ta'ala nggahi rauna,

<<Nggomi, Ruma, ra aipu saramba wa'una kanda^di-Mu dunia,

ro ndai Nggomi makandad̄ina langi.

11 Samenana ede ^dimaleli,

ro d̄imandad̄i mpasa b̄une kani ro lombo;

pala Nggomi wati dimarungka weki.

12 Dunia lab̄o isina ake ^dilipi b̄a Nggomi b̄une ^baju,

ro Nggomi cepemu kai ma kalaina.

Pala Nggomi wati parana ^dimarungka weki,

ro mori-Mu wati ^dimacumpu.>>

13  Allah Ta'ala wati parana nggahi ndake rauna kone d̄i sab̄ua mala'eka rau,

<<Dohopu ta sa^bae wana Nahu,

sampe Nahu ma kandad̄i musu-musu-Mu oko ro dahu d̄i Nggomi.>>

14 Nggara ndedesi, auku sapodakaina mala'eka-mala'eka ede? Siad̄oho eded̄u roh-roh ma karawi wea d̄i ru'u b̄a Allah Ta'ala, ro ra kaukai b̄a Allah Ta'ala ^dimabantu dou-dou d̄imatarima salamakaina.