D̄i Pa^bua Karawi B̄a La Timotius D̄i Ru'u B̄a Ela Ruma
5:1–6:2a
5
Nggomi aina rojo kai kasa d̄i dou ma umuna ese mai b̄a umu nggomi malaisi recepu sia kade'e nggahi ro eli nggomi b̄une-b̄une sia ede amamu. Wi'ikaipu dou-dou ma mbuipu to'i umuna ari ndaimu, 2 ro dou-dou siwe tua b̄une inamu. Dou-dou siwe sampela pab̄uapu nggomi wi'ikaimu b̄une amancawa ndaimu, kai ruku ro rawi ma raso.3 Lia ro horomapu dou-dou siwe mbaru mboha ma poda-poda mori ndai kesena. 4 Pala nggara sab̄ua dou siwe mbaru mboha nantausi ana ro wa'i^dohona, ndad̄i ana ro wa'i^dohona edeku ma saramba-rambakaina ma tana'o wa'u kalampa au d̄i pab̄ua karawi b̄a siad̄oho kai tio ro ntandana au d̄iparalu b̄a iwa ro weki siad̄oho.Kai karawi ndedena, siad̄oho nacola cepeku rawi ma taho d̄i dou ma tuana ro d̄i ina wa'ina, b̄a one lampa rawi b̄une ede nakasanaku ade Allah Ta'ala. 5 Dou siwe mbaru mboha ma poda-poda kese wekina, ro wati ntauna cou-cou rau ^dimantanda ro edana, sia na'imbi podaku d̄i Allah Ta'ala. Sia nado'a ncau d̄i Allah Ta'ala ro naraho bantu^di Allah Ta'ala. 6 Pala dou siwe mbaru mboha ma ca'u kasana weki ro naca'u mori paki-paki piti, sia nawa'ura made kone mbuipu morina. 7 Karongga sara'apu ede d̄i siad̄oho loakud̄u siad̄oho namori b̄atu au ra kane'ekai b̄a Allah Ta'ala. 8 Pala nggara nawarasi dou ma wati ntanda ro eda, nancewi wali iwa ro weki ndaina, dou ede watid̄u imbina d̄i Al Masih ro nancewi iha wali ntewikaisi lab̄o dou-dou ma wati imbi d̄i Al Masih.
9 Nggara dou siwe mbaru mboha ma wa'ura umu ini mpuru mba'a, nggomi maloaku kalu'u ade dafta dou-dou siwe mbaru mboha. Pala dou siwe mbaru mboha ede pab̄uaku sakali mpa nikana,g 10 ro dou-dou wa'ura eda madana b̄a one sia naca'u karawi ma taho. Misakai, sia wa'ura kana'ena anad̄ohona kai taho-taho, naca'u tarima ao dou-dou ma wunga ade lampa ro laokaina, naka^buaku d̄i ru'u b̄a dou-dou ma imbi d̄i Al Masih, nabantuku dou-dou ma wunga susa. Dou siwe mbaru mboha ede pab̄uaku poda-poda karawi sara'ana lampa rawi ma taho santoi morina.
11 Aina kalu'umu d̄i ade dafta ede dou-dou siwe mbaru mboha ma mbuipu to'i umuna, b̄ara wakatu siad̄oho kuasakai b̄a nawasu, siad̄oho nanika, edempara siad̄oho tu'u wi'ina karawi d̄i ru'u b̄a Al Masih. 12 Kai ndedena, siad̄oho narakaku hukuman b̄ara wa'ura sapana au ra sakena d̄i Allah Ta'ala sawatipu b̄a ede. 13 Siad̄oho napaki-paki rauku wakatuna kai losa lu'una d̄i uma dou. Ro ma ncewi dab̄ae wali, eded̄u b̄a one siad̄oho natana'oku fitina ngara dou makalai ro nakalu'uku weki d̄i urusan dou ro nanuntuku lampa rawi-lampa rawi ma wati patu ^dinuntu. 14 B̄ara ndedena d̄i ne'e b̄a nahu loakud̄u dou-dou siwe mbaru mboha ma mbuipu to'i umuna nika wali, nggana ana ro kab̄ua uma ro salajana, loakud̄u musu-musu ndaita wati rakana ncai d̄i ka'iha-ihakaina ngara ndaita. 15 B̄a one wara dou-dou siwe mbaru mboha ma wa'ura santuda, siad̄oho b̄atuna Iblis. 16 Pala nggara sab̄ua dou siwe ela Al Masih nantausi anggota iwa ro weki ma wa'ura mbaru mboha, sia pab̄uaku bantuna dou-dou siwe mbaru mboha ede; aina co'ona ela Ruma ma su'u ro tunduna siad̄oho.Kai ndedena ela Ruma naloa bantu dou-dou siwe mbaru mboha ma wati ntau poda iwa ro weki.
17 Dou mana'ekai ela Ruma ma kalampa kataho taki ro putana, patu d̄imatarima ufa d̄ua kali ncewi mboto, ma penti poda siad̄oho ma caha hotoba ro ngoa ro tei. 18 B̄a one ade Kitab Suci wara ratunti, <<Capi ma wunga tonda-tonda gandum d̄i kahorokai isi gandum ra d̄i wurina, aina pulamu asana>>, ro, <<Dou ma karawi, nantau hak d̄imatarima ufana>>. 19 Aina tarimamu b̄ab̄u ro lo'o ^dida'awakaimu sab̄ua dou mana'ekai ela Ruma selasi, nggara warasi d̄ua dou atao ncewi ma ndad̄i sakasi b̄a one siad̄oho edana sia ma karawi lampa rawi ma ncara. 20 Dou ma karawi dosa, pab̄uapu rojomu d̄i tando samenana ela Ruma loakud̄u dahu ma kalaina.
21 D̄i tando Allah Ta'ala, Isa Al Masih ro mala'eka-mala'eka ra kad̄ale b̄a Allah Ta'ala ma ndad̄i sakasi, nahu ma raho poda-poda d̄i nggomi eded̄u kalampapu au ra mbei b̄a nahu d̄i nggomi b̄oupu ede d̄i ru'u b̄a sara'a dou kai wati ntanda kalaina dou. 22 Aina ipi roci toho rimamu d̄i sab̄ua dou d̄i kasahakaimu dou ede ndad̄i dou makarawi wea Ruma, b̄a one nggara makarawi ndedesi, nggomi makandad̄iku weki ndaimu b̄atu dosa-dosa dou ede. Nggomi pab̄uapu sandaka morimu loakud̄u ngge'e mpa rasomu.
23 Ai walina nono oi mpoa; nono raupu anggo sato'i ^dilo'ikai lokomu, b̄a one nggomi ntuwu supumu.