Guru-guru Palasu
4:1-16
4
Roh Allah ngoa kapodana b̄a one wakatu-wakatu ma cumpukaina ake dou ^dimadengga imbi d̄i au ra ngoa ro tei mab̄oha Al Masih; pala siad̄oho nato'aku d̄i ngoa ro tei ma santuda ra ngoa ro tei b̄a dou-dou ra lu'ukai b̄a roh-roh mada^bae. 2 Siad̄oho makarongga ngoa ro tei ma santuda ake eded̄u dou-dou ma nuntu ro nggahi cowa, munafik. Ade mpida siad̄oho wa'ura rindi. 3 Siad̄oho ede ngoa ro teina b̄a one dou wati loana nika, ro wati loa rauna ngaha, ngaha ro nono au-au ra wa'u katantu. Sapodakaina Allah Ta'ala kandad̄ina ngaha ro nono loakud̄u dou-dou ma imbi d̄i Sia tarimana kai renta syuku, eded̄u dou-dou ma b̄ade au ra ngoa ro tei ma poda. 4 Samenana au ra kandad̄i b̄a Allah Ta'ala ede taho, ro wati wara kone sab̄ua rau d̄iwi'ikai haram nggara wa'usi tarima kai renta syuku d̄i Allah Ta'ala. 5 B̄a one bareka ra d̄i Allah Ta'ala ro do'a makandad̄ina ngaha ro nono ede ndad̄i halal.6 Nggara nggomi ma ngoa ro tei ncausi cina ro angi ndaita mab̄oha au ra nggahi b̄a nahu ede, ndad̄i nggomi d̄imandad̄i dou ma karawi wea Isa Al Masih ma taho. Isipu ademu kai imbi d̄i Al Masih ro ngoa ro tei ma poda ra wa'u b̄atu b̄a nggomi sampe ake. 7 Ka^do'opu wekimu ra d̄i carita-carita ma wati poda ma wati wara onena. Pab̄uapu nggomi kangina ncaupu wekimu kai sambea ro ibada d̄i Allah Ta'ala. 8 Lati sarumbu kasa wara hampana, pala lati rohani nantau one d̄i ade sara'a lampa rawi, b̄ara wara sake d̄i ru'u b̄a mori d̄i wakatu ake ro d̄i wakatu ma mai kento. 9 Au ra nggahi ro eli ede poda ro patu ndai ta'imbi kai poda-poda. 10 B̄ara ndedena, ndai ta'imbiku d̄i Allah Ta'ala ma mori ma kasalama sara'a dou, ma penti poda eded̄u dou-dou ma imbi d̄i Sia. B̄ara ndedena ndai ta'usaha ncauku karawi kapoda ade.f
11 Teipu sara'ana ede d̄i dou ma imbi ro kaupu siad̄oho kalampa au ra karongga b̄a nggomi. 12 Aina co'omu dou makab̄awa ro katuna nggomi, b̄ara nggomi mbuipu to'i umumu. Pala nggomi pab̄uapu ndad̄i conto ma taho d̄i ru'u b̄a dou-dou ma imbi, d̄i ade nggahi ro eli ra renta b̄a nggomi, cara morimu; d̄i ade meci ro ca'ukaimu dou ma kalai, ra^bunena nggomi imbikaimu d̄i Al Masih ro ruku ro rawimu ma raso. 13 Sampe wakatu maikai nahu peade, nggomi pab̄uapu baca ntuwumu Kitab-kitab Suci, ngoa kab̄aepu ao ro ma'anana d̄i ela Ruma ro aina dengga-denggamu ngoa ro tei siad̄oho. 14 Nggomi pab̄uapu ngge'e mpa kanimu tenggo ro wa'u, ra wa'u mbei b̄a Ro Allah d̄i nggomi wakatu dou-dou mana'ekai ela Ruma nuntuna kai ngara Allah Ta'ala mab̄oha au d̄imandad̄i d̄i nggomi d̄i wakatu ma mai kento ro wakatu siad̄oho tohona rimana ese wawo nggomi. 15 Karawipu sara'ana ede kai kapoda ade, ndad̄ina sanikina dou d̄ima'eda naha tenggo imbimu. 16 Sandakapu wekimu ro sandaka raupu au ra wa'u ngoa ro tei b̄a nggomi. Nggomi pab̄uapu kalampamu au-au ra kaukai b̄a nahu ede, b̄ara kai karawi ndedemu nggomi makasalamaku weki ndaimu ro sara'a dou ma ringa ro kade'e nggomi.