6
Dou-dou ela Al Masih ma ndad̄i ada, pab̄uaku kaco'i ro lia ro horomana rumana. Kai ndedena dou wati loana nuntu ka'iha ngara Allah Ta'ala atao nuntu ka'iha au ra ngoa ro tei b̄a ndaita. 2 Ada-ada dou ma rumana ela Al Masih, aina kura lia ro horomana rumana ede, kai alasan b̄a one siad̄oho eded̄u cina ro angi ma sama imbi lab̄o sia. Pala siad̄oho ede pab̄uaku kab̄ua katahona rumana ma ncewi taho wali, b̄ara kai ndedena siad̄oho nakalampaku rawi ma taho d̄i ru'u b̄a dou-dou ma imbi ra meci ro ca'u b̄a siad̄oho.Ngoa Ro Tei Ma Ncara Ro Ntau Ro Wara Ma Sapodakaina
6:2b-10
Samenana ake pab̄uapu tei b̄a nggomi ro ngoa ro tei katahopu. 3 Cou-cou rau mangoa ro tei ma kalai ari mai b̄a ede ro nawi'ikaiku au ra ngoa ro tei b̄a Isa Al Masih, Ruma ndai ede ncara, ro wati ca'una au ra ngoa ro tei b̄a agama ndaita, 4 eded̄u dou ma sombo ro ma wati b̄ade au-au! Da^baena ede eded̄u naca'u ngupa masa'ala ro naca'u cence ncihi ndad̄ina nakamaiku hiana ade, ncengga ro mbi'a, fitina, wu'u ade, 5 ro cence ncihi ma wati nggori-nggorina. Fiki ro kananu dou-dou ede nawa'ura mpula ro watid̄u loana kananu ma taho. Kacai b̄a siad̄oho naloa ndad̄i ntau ro wara b̄ara agama.
6 Ncihi romo agama nakamaiku laba ma na'e, nggara dou nancihisi adena kai au ra ntauna. 7 B̄a one wati wara au-au ra wa'a b̄a ndaita d̄i ade dunia ake, ro wati wara au-au rau ^diloa wa'a kalosa b̄a ndaita! 8 Ndad̄i, nggara warasi ngaha ro nono ro kani ro lombo, ede wa'ura ncihi. 9 Pala dou ma ne'e ntau ro wara, nahinaku b̄a goda'an ro nahinaku b̄a mboto pahu d̄i ne'e ma sampula ro ma ka'ihana. Au-au ra ne'ena ede nakaleli ro naka'ihaku dou. 10 B̄a one fu'u b̄a sara'a pahu ma dab̄ae eded̄u na'e ade d̄i piti. Wara sarunde dou ma mpou piti ndad̄ina watid̄u b̄atuna au ra ngoa ro tei b̄a Al Masih, edempara siad̄oho ede b̄oha b̄a mboto susa ro ncoki ma kalelina ade siad̄oho.
Ngoa Ro Tei Ma Cumpukaina
6:11-21
11 Pala nggomi eded̄u ntau Allah Ta'ala, ndad̄i nggomi pab̄uapu kad̄o'o wekimu ra d̄i samenana ede. Usahapu ndad̄i dou ma ncihi d̄i tando Allah Ta'ala, ma karawi d̄i ru'u b̄a Allah Ta'ala, imbi d̄i Al Masih ma meci ro ca'u d̄i dou makalai, lembo ade d̄i susa ro ncoki, ro mapu nggahi ro eli. 12 Usaha kapodapu d̄i ru'u mori kai ela Al Masih loakud̄u nggomi rakamu hadia mori ma sapodakaina ro ma ede ro hi^di. B̄ara d̄i ru'u b̄a edeku Allah Ta'ala oukaina nggomi aipu wakatu nggomi mangakumu d̄i tando dou mboto b̄a one nggomi ma'imbiku d̄i Al Masih. 13 Ro ake, d̄i tando Allah Ta'ala ma mbei nawa d̄i samenana ma mori, ro d̄i tando Isa Al Masih ma mbei sakasi ma ncihi d̄i la Pontius Pilatus, nahu ma raho ake d̄i nggomi: 14 To'akaipu d̄i samenana parenta ede kai raso ro kai wati wara ma'iha sampe d̄i ainaina mai mbalikai Isa Al Masih, Ruma ndaita. 15 Maikai-Na rakatantu b̄a Allah Ta'ala d̄i wakatu ma ncihi ncao. Sia kese mpa mantau kuasa; Sia nad̄ese ro ntasa, Sangaji b̄a samenana sangaji, ro Ruma b̄a samenana ruma. 16 Sia mpoa mpa ma wati loa ^dikuasakai b̄a made; Sia mori d̄i ade cahaya ma wati loa ^di^deni lab̄o b̄a cou-cou rau. Wati wara kone sab̄ua manusia rau ma parana eda, atao maloana eda Sia. D̄i ru'u b̄a Siaku horoma ro kuasa d̄i ru'u santoi-ntoina! Amin.
17 D̄i ru'u b̄a dou-dou mantau ro wara d̄i dunia ake, pab̄uapu nggomi kaumu loakud̄u siad̄oho aina sombo ro aina ne'ena d̄i barang-barang ma wati ede ro hid̄i -- b̄une ntau ro wara. Siad̄oho pab̄uaku pamaona d̄i Allah Ta'ala ma mbei samenana au-au d̄i ndaita kai remba loakud̄u iu b̄a ndaita. 18 Rahopu d̄i siad̄oho loakud̄u siad̄oho katadana rawi ma taho, ndad̄i ntau ro wara d̄i ade rawi ma taho, ncera ro mbura ade ro ca'u bantu dou makalai. 19 Kai ndedena, siad̄oho naka^boroku ntau ro wara ma ndad̄i fu'u ma taho d̄i ru'u b̄a ainaina ma kento. Kai karawi ndedena, siad̄oho d̄imaraka mori ma ede ro hi^di, eded̄u mori ma sapodakaina.
20 Au ra wa'u imbikai d̄i nggomi, jaga katahopu ede, Timotius! Ka^do'opu wekimu d̄i nuntu ro nggahi ma wati wara onena ro cence ncihi mab̄oha lampa rawi-lampa rawi ^dipehekai <<Loa ro tingi>> sapodakaina laina. 21 B̄a one wara dou-dou ma nggahi, siad̄oho nantau loa ro tingi ede, ndad̄ina siad̄oho nasapaku au ra ngoa ro tei ma poda ro ma ncihi ra tarima b̄a siad̄oho ntoina.
Raho-raho to'i mpa Ruma barekana, sara'a cina ro angi.
Salam do'a nami, Paulus