Sambea Ro Ibada Ela Ruma
2:1-15
2
Saramba-rambakaina, nahu mangoa ro kawara nggomid̄oho, sambea ro ibadapu d̄i Ruma, do'apu d̄i ru'u b̄a dou makalai ro rentapu syuku d̄i Allah Ta'ala d̄i ru'u b̄a sara'a dou. 2 Do'a raupu d̄i ru'u b̄a sangaji-sangaji ro d̄i ru'u b̄a sara'a dou ma nenti kuasa, ndad̄ina d̄i ade sara'a lampa rawi ndai taloa mori taho ro sana, katadapu kai lampa rawi ma taho ro horomapu Allah Ta'ala. 3 Do'a b̄une ede d̄i ru'u b̄a sara'a dou eded̄u lampa rawi ma taho ro nakasanaku Allah Ta'ala Makasalama ndai. 4 Sia nane'eku loakud̄u sara'a dou loa salama ro tarimana au ra ngoa ro tei b̄a Al Masih. 5 B̄a one sab̄ua mpa Allah Ta'ala d̄i ru'u b̄a sara'a dou, ro sab̄ua dou mpa ma loana kataho mbali hubungan sara'a manusia lab̄o Allah Ta'ala. Dou ede eded̄u Isa Al Masih eded̄u manusia rau. 6 Sia wa'ura d̄onggona weki ndai-Na ndad̄i koroba kai made-Na ^dikataho mbalikai manusia lab̄o Allah Ta'ala. Allah Ta'ala katadana lampa rawi ake d̄i wakatu ma ncihi ncao. 7 B̄ara ndedena, Allah Ta'ala kauna nahu lao d̄i dou-dou ma laina Yahudi. Kai ndedena, nahu pab̄uaku ngoa ro kahaba Injil d̄i ru'u b̄a siad̄oho ro ngoa ro tei tana'o ma ncihi mab̄oha Isa. Au ra nggahi b̄a nahu ake poda! Nahu wati nuntu ro nggahi cowaku!8 D̄i ne'e b̄a nahu loakud̄u ^disanikina sambea ro ibada, dou-dou mone do'ana kai adena ma raso, kai wati wara mbani atao cence ncihi.
9 Ndede rauku lab̄o dou-dou siwe pab̄uaku kantikana wekina kai kani ro lombo ma ncihi ncao lab̄o ka'ada'ana. Siad̄oho aina kantikana honggona kai makalalo hampa atao kanina masa atao mutiara atao kanina kani ro lombo ma nggali-nggali co'i. 10 Pala siad̄oho pab̄uaku kantikana wekina kai ruku ro rawi-ruku ro rawi ma taho b̄une rawi ma patu ra kalampa b̄a dou-dou siwe ma sambea ro ibada d̄i Allah Ta'ala. 11 Dou siwe pab̄uaku tana'ona ro aina mboto nggahi ro pab̄uaku to'a. 12 Nahu wati kauku dou siwe ma ngoa ro tei atao maparenta dou mone; siad̄oho pab̄uaku midina. 13 Alasana eded̄u b̄a one Allah Ta'ala kandad̄i uluna la Adam, sawa'u b̄a ede kandad̄ina la Hawa. 14 Ro laina la Adam ra tipu b̄a sawa, pala la Hawa ra tipu b̄a sawa, ndad̄ina sapana parenta Allah Ta'ala. 15 Pala Allah Ta'ala ^dimakasalamana sab̄ua dou siwe b̄ara dou siwe ngganana ana, nggara siaa naka'awasi weki ro ngge'e mpa imbina d̄i Al Masih, ro nameci ro ca'usi dou makalai, ro kalampana mori ro woko ma taho.