SURA PAULUS MA SARAMBAKAINA
D̄I RU'U B̄A
TIMOTIUS
Salam
1
Sura ake ra d̄i nahu, la Paulus eded̄u Rasul Isa Al Masih, kai ra kane'ekai b̄a Allah Ta'ala ma kasalama ndai ro kai ra parentakai b̄a Isa Al Masih b̄une ra kane'ekai b̄a ndaita. 2 D̄i ru'u b̄a nggomi Timotius. Nggomi wa'ura wi'ikai b̄a nahu ana meci b̄a ndai nahu, b̄ara nahuku ma rakandad̄ina nggomi imbi d̄i Al Masih. Raho-raho to'i mpa Allah Ta'ala, Ama ndaita, ro Isa Al Masih ma parenta ndai, katadana meci ro ca'una ro ncera ro mbura ade, ro kandad̄ina nggomi mori taho ro sana.Ngoa Ro Kawara Mab̄oha Ngoa Ro Tei Ma Kasantuda
1:3-11
3 D̄i ne'e b̄a nahu, nggomi ngge'e mpa midimu d̄i dana ro rasa Efesus, b̄une ra wa'u ngoa kapoda-poda b̄a nahu d̄i nggomi wakatu nahu laoku aka Makedonia. B̄a one d̄i Efesus wara pila-pila dou ma ngoa ro kahaba ngoa ro tei ma ncara, ro nggomi pab̄uapu kadenggamu siad̄oho. 4 Nggomi pab̄uapu ngoa ro kawaramu doud̄oho ede, siad̄oho aina paki-pakina wakatu d̄ingoa ro kahabakaina mab̄oha mpama-mpama ro carita-carita wa'i ro waro. Lampa rawi b̄une ede ^dimakamaina masa'ala mpa. Lampa rawi-lampa rawi b̄une ede wati kandad̄ina dou ndad̄i dou ra kasalama b̄a Allah Ta'ala b̄ara imbina. 5 Nahu makau nggomi kalampa lampa rawi ede, loakud̄u sara'a dou cua meci ro ca'u angi, kai meci ma poda-poda d̄i adena ma raso ro ade mpidana ma taho, ro poda-poda imbi d̄i Al Masih. 6 Dou-dou ma ngoa ro tei ma ncara ede tu'u wi'ina ngoa ro tei-ngoa ro tei ma poda ro ma ncihi, ro wa'ura lu'ukai b̄a nuntu ro nggahi-nuntu ro nggahi ma wati wara onena. 7 Siad̄oho nane'eku loakud̄u dou-dou ma kalai tarimana siad̄oho kai sab̄ua dou guru hukum Taurat. Sapodakaina ndai siad̄oho wati loana ka'ao au ra ngoa ro teina ede, kone kananu b̄a ndaina, siad̄oho nab̄adeku lampa rawi ede.
8 Ndai ta^badeku b̄a one hukum Taurat eded̄u taho, nggara kalampa katahosi. 9 Tantu pab̄uaku d̄i kawara b̄a one hukum Taurat randawi laina d̄i ru'u b̄a dou mataho, malaisi d̄i ru'u b̄a dou-dou ma sapa hukum Taurat, dou-dou ma dab̄ae, d̄i ru'u b̄a dou-dou makarawi jina, d̄i ru'u b̄a dou ma karawi dosa, dou ma wati ntau agama, dou ma b̄atu tabe'a dunia, d̄i ru'u b̄a dou ma hade ama atao inana, dou-dou ma hade dou, 10 d̄i ru'u b̄a dou-dou ma karawi ma sampu ro nggele, ma ne'e angi sama monena, ma mpanga dou, ma ca'u nuntu ro nggahi cowa; sakasi-sakasi cowa, ro cou-cou rau ma kamaina lampa rawi ma wati ncihi ncao lab̄o ngoa ro tei ma ncihi. 11 Ngoa ro tei ma ncihi ede wara d̄i ade Injil ra d̄i Allah Ta'ala ma d̄ese ro ntasa ro patu d̄ikad̄ese ro ntasa, ra wa'u imbikaina d̄i nahu.
Do'a Syuku D̄i Allah Ta'ala
1:12-20
12 Nahu marenta syuku d̄i Isa Al Masih, Ruma ndaita. Sia wa'ura mbeina tenggo ro wale d̄i nahu d̄ikarawi weakaiku Sia, ro Sia wi'ikaina nahu kai dou ma patu d̄imatarima taki ro puta ede. 13 Isa Al Masih kalampana lampa rawi ede, kone nahu ntoina sawatipu b̄a imbiku d̄i Sia, nahu kancokiku Sia, nahu rentaku nggahi ro eli ma dab̄ae ro rentaku nggahi ro eli ma sampu mab̄oha Sia. Pala Al Masih nancera ro mbura ade-Na ro nahu wati ^badeku auku d̄ikarawi b̄a nahu. 14 Ruma ndai rau katada ncauna d̄i nahu b̄a one Sia nawancuku meci ro ca'una nahu ro nawancuku tahona d̄i nahu. Sia rau kandad̄ina nahu imbi d̄i Sia ro loa meci ro ca'u dou makalai rau. Akeku ma ndad̄i d̄i ndai wakatu ndai ntauta hubungan ma taho lab̄o Isa Al Masih. 15 Ncihi poda nggahi ro eli ake -- b̄ara ndedena patu ^ditarima ro ^di'imbi poda-poda --: <<Isa Al Masih maina d̄i dunia ake d̄ikasalamakaina dou madosa.>> Ro nahuku dou madosa ma ipi da^bae. 16 Pala Isa Al Masih kasi adena d̄i nahu loakud̄u kai ncai nahu, dou ma ipi dosa ake, Isa naloa katada sara'a lembo ade-Na. Sia kalampana rawi ake d̄imandad̄i conto d̄i ru'u b̄a dou-dou makalai, loakud̄u siad̄oho imbina d̄i Isa Al Masih ro tarimana mori ma sapodakaina ro ma ede ro hi^di. 17 Raho-raho to'i mpa sara'ana dou lia ro horomana Allah Ta'ala ma ede ro hi^di, ma wati loa ^di'eda ro ma kese weki. Siaku Sangaji ma parenta sampe santoi-ntoina. Amin.
18 Timotius, anaku! Taki ro puta ake nahu ma imbikaina d̄i nggomi b̄une ra karongga b̄a nabi-nabi, ro au ra nggahi b̄a Allah Ta'ala mab̄oha au d̄imandad̄i d̄i nggomi. Nggomi pab̄uapu kani nggahi ro eli ede ^dimakatenggomu laoku^du nggomi maloaku karawi kapoda ade. 19 Usaha kapodapu ademu kai nentimu imbi ma poda ro kai ade mpidamu ma raso. Wara dou-dou ma wati kandad̄i au eli ade mpidana, ndad̄ina lelira imbi siad̄oho. 20 ^Dua dou d̄i ade weki siad̄oho eded̄u la Himeneus lab̄o la Aleksander wa'ura hukum b̄a nahu. Siad̄oho wa'ura d̄onggo b̄a nahu d̄i Iblis loakud̄u siad̄oho tana'ona ro ai walina aona Allah Ta'ala.