Sadia ncaupu wekimu b̄a one Ruma d̄imamai mbali
5:1-11
5
Cina ro angi mab̄oha wakatu ro ainaina maikai Ruma wati pori walina tunti b̄a nami d̄i ru'u b̄a nggomid̄oho. 2 B̄a one ndai nggomid̄oho mab̄adepodaku b̄a one Ainaina maikai Ruma ede d̄imamai b̄une dou mampanga d̄i aimanga^di. 3 Nggara nanggahisi b̄a dou, <<Sara'ana taho-taho mpa,>> ndad̄i d̄i wakatu edeku wed̄i lalo mpa siad̄oho b̄oha b̄a iha leli, ro wati kone sab̄ua dou rau ^dimaloa salama. Lampa rawi ede d̄imandad̄i sadeka, b̄une pili ^di'iu b̄a dou siwe ma ne'e nggana. 4 Pala nggomid̄oho laina dou ma mori d̄i ade rindikaina, ndad̄ina ainaina ede nakawe^diku nggomid̄oho b̄une dou ma mai mpanga. 5 Nggomid̄oho sara'ana eded̄u dou ma mori d̄i ade taroakaina; nggomid̄oho lu'u d̄i ade kalompo ma taroa. Ndai laina dou ma mori d̄i ade rindikaina, atao ma lu'u d̄i kalompo ma rindi. 6 B̄ara ndedena ndai aina maru nefa b̄une dou makalai. Ndai pab̄uaku jaga-jaga ro fiki ro kananu ndai pab̄uaku taroana. 7 D̄i aimangad̄i dou namaru, ro d̄i aimangad̄i rau dou namawuku. 8 Pala ndai ake dou-dou ma lu'u d̄i ade kalompo aimarai ma taroa; b̄ara ndedena fiki ro kananu ndai pab̄uaku taroana. Ndai pab̄uaku imbi ncau d̄i Ruma ro meci ro ca'u dou-dou makalai lab̄o imbi poda b̄a one Allah Ta'ala ^dimakasalama ndaita. Edeku ^daha ^dimahoruna ndai d̄i ade lewa ro laka d̄i aokaita marindi. 9 Allah Ta'ala kad̄alena ndai laina ^dihukum, pala ^dikasalama kai ncai Isa Al Masih, Ruma ndai 10 ma wa'ura made d̄i ru'u b̄a ndai, nataho wakatu ndai wunga jaga-jaga ro wakatu ndai wunga maruta, ndai mori sama-sama lab̄o Sia. 11 B̄ara ndedena, nggomid̄oho pab̄uapu cua ngoa ro tei kali cempe angi ro cua katenggo angimu sama b̄une ra karawi b̄a nggomid̄oho ake.Ngoa ro tei kataho ro salam
5:12-28
12 Cina ro angi, nami maraho poda-poda loakud̄u nggomid̄oho kaco'imu dou-dou ma karawi d̄i woha nggomi^doho; eded̄u siad̄oho ra wa'u kad̄ale b̄a Ruma ^dimana'ekai ro ^dimangoa ro teina nggomid̄oho. 13 Kantaupu co'i ro meci ro ca'upu siad̄oho b̄ara au ra wa'u karawina ede. Ro mori taho-tahopu d̄i sab̄ua lab̄o ma kalaina.
14 Nami maraho rau, cina ro angi, rojo katahopu dou ma wati ngawa karawi; katenggopu ade dou madahu, rerepu siad̄oho ma mapu ro rome, bantupu dou ma pab̄ua ^dibantu, kalembopu ademu d̄i sara'a dou. 15 Tio ka^baepu, loakud̄u aina wara dou ma cola cepe rawi dab̄ae kai rawi ma da^bae. Pala usaha ncaupu karawi ma taho d̄i cua-cua nggomid̄oho ro d̄i sara'a dou.
16 Ka^dihi ncaupu ademu, 17 ro do'a ncau-ncaupu. 18 D̄i ade sanikina wakatu nggomid̄oho pab̄uapu rentamu syuku, b̄ara edeku d̄i ne'e b̄a Allah Ta'ala d̄i nggomid̄oho kai dou ma mori sab̄ua lab̄o Isa Al Masih.
19 Aina kamademu Roh Allah. 20 Aina wi'ikaimu mod̄ana haba-haba ra mbei b̄a Roh Allah. 21 Samenana au-au pab̄uaku ^di'uji, ro au-au ma taho pab̄uaku ^di^batu. 22 Ka^do'opu wekimu ra d̄i samenana lampa rawi mada^bae.
23 Raho-raho to'i mpa ndai Allah Ta'ala mbeina ndai taho ro ntai, kandad̄ina nggomid̄oho dou-dou ma poda-poda mori d̄i ru'u b̄a Allah Ta'ala mpa. Raho-raho to'i mpa Allah Ta'ala majaga nggomid̄oho sara'ana, nataho rohmu, nawa ro sarumbumu, ndad̄ina wati wara mancara wakatu Isa Al Masih, Ruma ndai mai mbalina. 24 Allah Ta'ala, ma wa'ura ou nggomid̄oho, ^dimakarawina lampa rawi ede b̄ara Sia nato'a.
25 Cina ro angi, do'apu d̄i ru'u b̄a nami!
26 Karonggapu salam meci ro ca'u nami d̄i sara'a cina ro angi ndaita.
27 Kai ngara Ruma, nahu maraho poda-poda loakud̄u nggomid̄oho bacamu sura ake d̄i sara'a cina ro angi ma sama-sama imbi lab̄o ndai.
28 Raho-raho to'i mpa Isa Al Masih, Ruma ndai barekana nggomid̄oho.
Salam ro horoma nami Paulus