4
Oe cina ro angi ma ndad̄i ruma b̄a ada^dohomu! Pab̄uapu nggomid̄oho kalampamu rawi ma taho ro adil d̄i ru'u b̄a ada^dohomu. Kawara ncaupu wekimu b̄a one nggomid̄oho rau mantau sab̄ua ruma ma wara d̄i saroga.2 Pab̄uapu nggomid̄oho do'a ncau-ncau, ro kananu ka^bae-^baepu au ra karonggamu d̄i Allah Ta'ala ro rentapu syuku. 3 Do'a raupu d̄i ru'u b̄a nami loakud̄u Allah Ta'ala mbeina nami wakatu ma taho d̄ingoa ro kahabakai haba mab̄oha rahasia Al Masih. B̄ara lampa rawi ede, ndad̄i ake nahu wara d̄i ade uma bui. 4 B̄ara ndedena do'a weapu d̄i ru'u b̄a nahu loakud̄u nahu loa karongga ka^bae-^bae haba ake, b̄une ma sapodakaina.
5 D̄i ade hubungan nggomid̄oho lab̄o dou-dou ma wati imbi, pab̄uapu nggomid̄oho mori kai loa timba ro lemba ro kani katahopu sanikina wakatu d̄i ade nuntu ro nggahimu lab̄o siad̄oho. 6 Pab̄uapu au-au ra renta b̄a nggomid̄oho d̄i dou makalai pab̄uaku ^disanakai b̄a dou. Nggomid̄oho pab̄uapu b̄ademu b̄uneku sapodakaina nggomid̄oho cambemu au ra sod̄i b̄a dou.
^Bontokai Sura Ro Salam
4:7-18
7 La Tikhikus, cina ndaita ma taho ade, ^dimangoa nggomid̄oho samenana au-au mab̄oha nahu. Sia nacaha karawi sama-sama lab̄o nami d̄i ru'u b̄a Ruma. 8 Nahu d̄imanggadu la Tikhikus d̄i ru'u b̄a nggomid̄oho loakud̄u nggomid̄oho b̄ademu ka'ada'an nami ro nggomid̄oho neo ademu. 9 La Onesimus d̄imalao sama-sama lab̄o la Tikhikus; sia ela Ruma kalompo nggomid̄oho.Sia dou ma to'a ro nami mameci ro ca'uku sia. Sia lab̄o la Tikhikus ^dimangoana d̄i nggomid̄oho samenana ma ndad̄i d̄i hid̄i nahu ake.
10 La Aristarkhus ma wara ade uma bui sama-sama lab̄o nahu, nggaduna salam d̄i ru'u b̄a nggomid̄oho.Ndede rau la Markus, cina campo ompu lab̄o la Barnabas. Nggomid̄oho wa'ura nggadumu haba ^dimaweha aokaimu sia nggara sia namaisi d̄i nggomid̄oho. 11 La Yesus ^di'ou rau kai b̄a dou la Yustus nggadu rauna salam. D̄i ade weki dou-dou Yahudi ma wa'ura imbi d̄i Ruma Isa, siad̄oho toluna ede mpoa mpa ma wakatu ake ma karawi sama-sama lab̄o nahu kalampa taki ra d̄i Allah Ta'ala. Siad̄oho ede poda-poda nakaneoku au ra karawi b̄a nahu.
12 La Epafras nggadu rauna salam d̄i ru'u b̄a nggomid̄oho.Sia ada Isa Al Masih, ma caha ncau do'a d̄i ru'u b̄a nggomid̄oho.Sia raho poda-podana d̄i Allah Ta'ala loakud̄u imbi nggomid̄oho tenggo poda-poda, loakud̄u nggomid̄oho kai mpuruna to'amu d̄i au ra kane'ekai b̄a Allah Ta'ala. 13 Nahu wa'ura eda madaku b̄a one sia wa'ura karawi kapodana ade d̄i ru'u b̄a nggomid̄oho lab̄o d̄i ru'u b̄a dou-dou ma wara d̄i Laodikia ro d̄i Hierapolis. 14 Dokte Lukas, dou meci ro ca'u b̄a ndaita lab̄o la Demas nggaduna salam d̄i ru'u b̄a nggomid̄oho.
15 Karonggapu salam nami d̄i ru'u b̄a cina ro angi ndai ma imbi d̄i Al Masih ma wara d̄i Laodikia; lab̄o d̄i la Nimfa, ro d̄i ru'u b̄a ela Ruma ma sambea ro ibada d̄i umana. 16 Sawa'u b̄a sura ake baca kana'e d̄i woha nggomid̄oho, usaha raupu baca sura ake d̄i ru'u b̄a ela Ruma ma ngge'e d̄i Laodikia. Ndede rau ndai nggomid̄oho pab̄uapu bacamu sura ra nggadu ra d̄i Laodikia d̄i ru'u b̄a nggomid̄oho. 17 Ro ngoapu d̄i la Arkhipus, <<Kanggoripu taki ra mbei d̄i nggomi d̄i karawi weakaimu Ruma.>>
18 Salam nahu, la Paulus. Ndai nahu ma ratuntina salam ake. Aina nefamu b̄a one nahu mbuipu di ade uma bui!
Raho-raho to'i mpa Ruma barekana nggomid̄oho.
Salam do'a nami, Paulus