La Ribka Mai Panati B̄a Dou D̄i Ru'u B̄a La Ishak
24
La Ibrahim wa'ura tua poda ro sia bareka b̄a RUMA ade samenana lampa rawi. 2 D̄i sab̄ua ainaina nggahira la Ibrahim d̄i adana ma tuakai, ma taki kab̄ua wea sara'a ntau ro warana, <<Tohopu rimamu d̄i hela fu'u wangga nahu.s 3 Sumpapu kai ngara RUMA, Allah Ta'ala ma kuasakai langi ro dana, b̄a one nggomi wati d̄imangupa wea wei d̄i ru'u b̄a ana nahu la Ishak dou rasa Kanaan ake. 4 Nggomi pab̄uapu lao mbalimu aka dana ro rasa rawarakai nahu d̄ingupakaimu dou siwe d̄i wei la Ishak ade iwa ro weki nahu.>>5 Edempara sod̄ira b̄a adana ede d̄i la Ibrahim, <<B̄uneku nggara dou siwe sampela ede watisi ngawana tu'u wi'i umana ro wati ngawana mai b̄atu mada ara dana ro rasa ake? Sab̄ua pab̄uaku mada wa'a ana ita ede lao aka dana ro rasa ndai ita?>>
6 Pala cambe b̄a la Ibrahim, <<Aina! Ai to'ina wa'amu ana nahu ede ta aka dawa! 7 RUMA, Allah Ta'ala ma kuasakai langi, wa'ura wa'a kalosana nahu d̄i uma amaku ro d̄i dana ro rasaku, iwa ro wekiku ro RUMA wa'ura sakena b̄a one RUMA d̄imambei dana ro rasa ake d̄i ru'u b̄a londo ro mai nahu. RUMA rau d̄imanggadu mala'eka-Na d̄imabantuna nggomi loakud̄u nggomi marumpaku dou siwe d̄i ru'u b̄a ana nahu. 8 Pala nggara dou siwe sampela ede watisi ngawana b̄atu nggomi, ndad̄i nggomi wati b̄oha b̄a sumpa ake. Kone b̄une b̄e wali, aina wa'amu ana nahu ede aka dawa.>> 9 Edempara adana ede tohona rimana d̄i hela fu'u wangga la Ibrahim rumana, ro sumpana b̄a one sia d̄imakalampana au ra raho b̄a la Ibrahim ede.
10 Edempara adana ede wehana sampuru mbua onta ro wuana saniki pahu barang ma nggali co'i ntau la Ibrahim. sawa'u b̄a ede, sia laona aka kota hid̄i ngge'ekai la Nahor aipu morina; hid̄ina ta wela d̄a b̄a kota Mesopotamia. 11 Sawa'u b̄a sia ronggana ta aka, sia lab̄o onta-ontana ede sanawana d̄i kompe sab̄ua temba ari mai b̄a kota. D̄i wakatu aimambia, edeku wakatuna dou-dou siwe mai wehana oi d̄i temba ede. 12 Edempara ada la Ibrahim ede do'ana, <<Io, RUMA, Allah Ta'ala, Ruma ba ruma mada la Ibrahim, tabantu to'ipu mada, loakud̄u au d̄ikarawi b̄a mada ake nantau hasi d̄i ainaina ake; tambei to'ipu au ra sake b̄a Ita d̄i la Ibrahim, ruma mada ede. 13 Ntanda ro eda to'ipu mada, io Allah Ta'ala, mada ma kid̄i d̄i kompe temba ake. Samporo wali dou-dou siwe sampela d̄i kota ake d̄imamai weha oi. 14 Mada d̄imaraho d̄i sab̄ua dou d̄i weki siad̄oho, <Tambei to'ipu nahu oi nono.> Nggara nacambesi b̄a sia, <Io, ta nonora ro onta-onta Ita rau mada d̄imambeina nono!> Sia edeku ra kad̄ale b̄a Ita RUMA d̄i ru'u b̄a ada Ita la Ishak. Nggara lampa rawi ede nandad̄isi, mada d̄imab̄ade b̄a one RUMA wa'ura mbeita au ra sake b̄a Ita d̄i ruma mada la Ibrahim.>>
15-16 Wakatu sia wunga do'ana, la Ribka, sab̄ua dou siwe sampela ma wancu ntika, wunga maina d̄i temba ede wa'ana roa d̄i wawo d̄incana. Sia ana la Betuel ro dou matua la Betuel eded̄u la Nahor ro la Milka; la Nahor ede sa'e la Ibrahim. La Ribka lao rakana temba ede ro b̄oru tauna oi d̄i roana, edempara sia lao dulana. 17 Ada la Ibrahim lao rai rakana sia ro nggahina, <<Ana, b̄antu to'ipu nahu, mbei to'ipu nahu nono oi d̄i roamu ede.>>
18 Cambe b̄a dou siwe sampela ede, <<Io, nono mpa, ama>>, edempara sia roci kalondona roa ro mbeina nono dou ede. 19 Sawa'u b̄a ada la Ibrahim ede nggori nonona; nggahira dou siwe sampela ede, <<Mada d̄imab̄oru wea oi d̄i ru'u b̄a onta-onta ita rau loakud̄u sara'a binata ede nonona.>> 20 Edempara lua tauna oina ede ade hid̄i nonokai onta, sawa'u b̄a ede sia lao rai mbalina aka temba ro wehana oi ma ncewi mboto wali sampe sara'a binata ede manta adena nono. 21 Ada la Ibrahim ede namidi mpa, pala nantanda kab̄aeku dou siwe sampela ede. Sia nane'e b̄ade sab̄ua RUMA nambeiku hasi atao wati ade lampa ro laokaina ede.
22 Sawa'u b̄a sara'a onta ede nonona, ada la Ibrahim ede wehana kariro masa ma nggali co'i, tanina ini gram d̄ikakanikaina peade d̄i ilu dou siwe sampela ede ro weha rauna d̄ua loho jima masa d̄ikakanikaina d̄i ancu dou siwe sampela ede, tanina ncewi 100 gram. 23 Edempara nggahira ada ede d̄i dou siwe sampela ede, <<Ngoapu nahu cou ngara amamu. Sab̄ua wara hid̄i marukai d̄i ru'u b̄a nami d̄i umamu?>>
24 <<Ama mada ngarana la Betuel, ana la Nahor ro la Milka,>> cambe b̄a dou siwe sampela ede. 25 Di uma madad̄oho wara hid̄i marukai d̄i ru'u Ita ro mboto rapa d̄ingaha binata ntadi.>>
26 Ndad̄i suju ro nembara ada la Ibrahim ede d̄i RUMA. 27 Nggahina, <<D̄ese Ro Ntasara ngara Ita RUMA, Allah Ta'ala b̄a ruma mada la Ibrahim. Ita wa'ura mbeita au ra sake b̄a Ita d̄i ru'u b̄a ruma mada la Ibrahim. Ita wa'ura d̄anda ro wa'a kantirita mada d̄i iwa ro weki ruma mada la Ibrahim.>>
28 Edempara dou siwe sampela ede lao rocina aka ngge'ekai inana ro ngoana samenana au ma randad̄i ede. 29-30 La Ribka wara sa'e monena, ngarana la Laban. Sia kade'ena carita arina ma b̄oha au ra nggahi b̄a ada la Ibrahim ede. Sia eda rauna kariro d̄i ilu ro jima d̄i rima arina ede. Edempara la Laban rai losa rocina, sia nane'e eda angi lab̄o ada la Ibrahim ede ma mbuipu kid̄i lab̄o onta-ontana d̄i kompe temba ede. 31 Edemapara nggahi la Laban, <<Ita, dou ra bareka b̄a RUMA! Aina kid̄i ta ake. Santab̄eta mai talaoku aka uma madad̄oho. Madad̄oho wa'ura sadia weamu hid̄i marukai d̄i ru'u b̄a ita ro hid̄i d̄i ru'u b̄a onta-onta ita.>>
32 Edempara ada la Ibrahim ede lao b̄atuna ro lu'una ade uma. La Laban kalondo weana wua ra wa'a b̄a onta-onta ro pahana binata-binata ede. Sawa'u b̄a ede, sia wa'a weana oi d̄iwacakai ed̄i ada la Ibrahim ro d̄i ru'u b̄a dou-dou ma lab̄ona. 33 Wakatu ka'ambina ngaha ro nono, ada la Ibrahim ede nggahina, <<Mada watipu loaku ngaha sawatipu b̄a karonggaku nggahi ra wa'a b̄a mada.>>
Nggahi la Laban, <<Santab̄eta nuntura.>>
34 Edempara tampu'ura nuntu ada la Ibrahim, nggahina, <<Mada ake ada la Ibrahim. 35 RUMA nawancuku barekana, ruma mada ede ro kandad̄ina sia ntau ro wara poda. RUMA wa'ura mbeina sia bareka mboto jimba, mbe'e, capi, onta, keledai ro masa, salaka ro ada mone ro siwe. 36 D̄i umuna ma wa'ura tua la Sara, wei la Ibrahim ruma mada ede wa'ura ngganana ana mone ro ruma mada wa'ura d̄onggo sara'ana ntau ro warana d̄i ru'u b̄a anana ede. 37 Sia kauna mada sake kai sumpa loakud̄u mada b̄atu au ra parentakai b̄a sia. Nggahina, <<Nggomi aina kad̄ale weamu wei d̄i ru'u b̄a ana nahu la Ishak d̄i ade weki dou siwe Kanaan ake, 38 malaisi d̄i iwa ro weki londo ro mai amaku. Ndad̄i lao rocipu ta aka.> 39 Edempara sod̄i b̄a mada d̄i sia, <<B̄uneku nggara dou siwe sampela ede watisi ngawana b̄atu mada?>> 40 Pala cambena, <<RUMA rato'a ncaukai b̄a nahu, d̄imakakai mala'eka-Na d̄imabantu nggomi loakud̄u ade kalampakaimu taki ede nantau hasi. Nggomi d̄imarumpa wei d̄i ru'u b̄a ana nahu d̄i iwa ro weki ndaiku, eded̄u londo ro mai amaku. 41 Nggara siad̄oho natula aosi nggomi, ndad̄i nggomi wati b̄oha b̄a sumpa ede.>
42 Ro wakatu mada ronggaku d̄i temba ede akande, mada do'aku d̄ei ade, <RUMA, Allah Ta'ala b̄a ruma mada la Ibrahim, RUMA kantau to'ipu hasi ade kalampakaiku taki ake. 43 Mada d̄imangge'e mpa kid̄i d̄i kompe temba ake. Nggara warasi sab̄ua dou siwe sampela ma mai weha oi ta ake, mada d̄imaraho oi nono d̄i sia. 44 Nggara nambeisi b̄a sia ro nambei rausi oi nono d̄i ru'u b̄a onta-onta mada, ndad̄i siaku ra kad̄ale b̄a RUMA dou d̄imandad̄i wei d̄i ru'u b̄a ana ruma mada ede.> 45 Watipu nggori do'a mada, mai lalo la Ribka, sia wa'ana roa ese wawo d̄incana, edempara sia wehana oi d̄i temba. Sawa'u b̄a ede, mada rahoku oi nono d̄i sia, <Mbei to'ipu nahu oi nono.> 46 Kai roci sia kalondona roa ede ro nggahina, <Io, ta nonora ro onta-onta ita rau, mada d̄imambeina nono.> Edempara mada nonoku ro sawa'u b̄a ede onta-onta ede rau mbei b̄a sia nono. 47 Sawa'u b̄a ede, sod̄i b̄a mada, <<Cou ngara amamu? Cambe b̄a sia, <Ama mada la Betuel, ana la Nahor ro la Milka.> Edempara kakani b̄a mada kai kariro masa d̄i iluna ro d̄ua loho jima d̄i rimana. 48 Mada suju ro nemba, ro roi ro wadiku RUMA, Allah Ta'ala b̄a ruma mada la Ibrahim. Sia wa'ura d̄anda ro wa'a kantirina mada ta ake, d̄i iwa ro weki ruma mada, ndad̄ina mada loa rumpa dou siwe sampela ake d̄i ru'u wei b̄a ana ruma mada la Ibrahim. 49 Ndad̄i ake, nggara itad̄oho mangawasi tarima au ra ne'ekai b̄a ruma mada ede tanggahi to'ipu d̄i mada, pala nggara watisi ngoa ntiri mpa loakud̄u d̄ib̄adekai b̄a mada auku d̄ikarawi b̄a mada.>>
50 Cambe b̄a la Laban ro la Betuel, <<B̄a one au ma randad̄i ake ramaina ra d̄i RUMA, ndad̄i madad̄oho wati patuna d̄imanuntu wali. 51 Ake la Ribka; co'opu sia lao b̄atuna ita ro ndad̄i wei ana ruma ita, b̄une ra kane'ekai b̄a ndai RUMA. 52 Wakatu ada la Ibrahim ede ringana au ra nggahi b̄a siad̄oho, sia suju ro nembana RUMA. 53 Edempara kalosana kani ro lombo, masa ro salaka ro mbei sara'ana ede d̄i la Ribka. Ro mbei rau b̄a sia hadia-hadia ma nggali co'i d̄i amania la Ribka ro inana.
54 Sawa'u b̄a ede, ada la Ibrahim ro dou-dou malab̄ona ngaha ro nonona, edempara siad̄oho maruna ta ede. Sawa'u b̄a b̄ola siad̄oho aimasid̄i, nggahira ada la Ibrahim ede d̄i dou mantau uma ede, <<Mada kane'e dula roci, aka ruma mada.>>
55 Pala sa'e mone ro ina la Ribka nggahina, <<Co'opu la Ribka midi wa'una lab̄o madad̄oho takasi saminggu atao sampuru nai wali ro sawa'u b̄a ede, sia naloara lao.>>
56 Pala ada la Ibrahim ede nggahina, <<Ai to'ina tapa kantoita mada. RUMA wa'ura bantuna mada ade lampa ro laokai mada; takau to'ipu mada lao dula aka uma ruma mada.>>
57 Cambe b̄a siad̄oho, <<Mai ndai ta ou wa'uku la Ribka ro tasod̄iku sia, b̄uneku kananuna.>> 58 Edempara siad̄oho ouna la Ribka ro sod̄ina, <<Sab̄ua nggomi mangawa lao b̄atu dou ake?>>
Cambe b̄a la Ribka, <<Io, mada kangawa.>>
59-60 Edempara siad̄oho kauna la Ribka ro ina loruna lao lab̄o ada la Ibrahim ro dou-dou malab̄ona. Sawa'u b̄a ede, siad̄oho do'a rahona bareka d̄i ru'u b̄a la Ribka kai renta ndakena,
<<Raho-raho to'i mpa nggomi, Ribka mandad̄i ina b̄a juta-juta dou!
Raho-raho to'i mpa londo ro maimu kakoana musu-musuna!>>
61 Sawa'u b̄a ede, la Ribka ro dou-dou siwe sampela adana ka'ambina weki, edempara nentena onta ro lao b̄atuna ada la Ibrahim ede.
62 Wakatu ede la Ishak wa'ura dulana ra d̄it so sarae, sia lampa saina temba d̄ipehekai Lahai-Roi, aona: <<Sia ma jaga ro sandaka nahu>> ro sia nangge'e ta wela d̄o Kanaan. 63 D̄i wakatu aimambia sia losana d̄i kemana, sia nane'e lampa-lampa d̄i so ro sera, edempara sia edana onta-onta ma mai. 64 Wakatu la Ribka edana la Ishak, sia londona d̄i ontana, 65 ro sod̄ina d̄i ada la Ibrahim ede, <<Cou dou mone aka ma mai raka ndai ake?>>
<<Sia ede ruma nahu la Ishak,>> cambe b̄a ada la Ibrahim ede. Edempara la Ribka wehana tod̄u ro b̄ontona pahuna tanda horomakaina la Ishak.