Madena La Sara
23
La Sara madena wakatu umuna 127 mba'a 2 d̄i Hebron d̄i dana ro rasa Kanaan. la Ibrahim ncoki adena ro nangi nduruna.3 Sawa'u b̄a ede, la Ibrahim tu'u wi'ina timba weina ro laona aka dou-dou Het, ma ngge'ekai dana ro rasa ede. Nggahi sia, 4 <<Nahu ake dou lai rasa ma ngge'e d̄i rasa nggomid̄oho; mbei to'ipu nahu cola dana d̄i'umbukai weiku.>>
5 Cambe b̄a siad̄oho, 6 <<Madad̄oho ma lia ro horomaku Ita kai dou ma na'ekai dou ro ma na'e ro ntoru, ndad̄i umbupu wei Ita ade rade ma taho poda ntau madad̄oho. Madad̄oho sara'a nira ademu sadia wea rade d̄i ru'u b̄a wei Ita.>>
7 Edempara la Ibrahim sujuna d̄i tando siad̄oho, 8 ro nggahina, <<Nggara cinad̄oho ma nirasi ademu, nahu ma umbu weiku ta ake, bantu to'ipu nahu lao raho d̄i la Efron ana mone la Zohar, 9 loakud̄u sia landana d̄i nahu Karombo Makhpela ntauna ma wara d̄i kengge omana. Satahona sia landana dana ede ta ake, kai sakasi wea b̄a nggomid̄oho. Co'ina d̄icola kanggori b̄a nahu loakud̄u dana ede ndad̄i ntau nahu.>>
10 D̄i wakatu ede ndai la Efron wunga dohona lab̄o dou-dou Het ede d̄i hid̄i edakai angi d̄i tad̄a na'e kota. Kai sakasi b̄a sara'a dou ma wara ta ede, cambe b̄a la Efron, 11 <<Bangsa mada ma ndad̄i sakasina b̄a one oma ede lab̄o karombona d̄imbei b̄a mada d̄i Ita d̄i'umbukai wei Ita.>>
12 Edempara la Ibrahim sujuna d̄i tando dou-dou Het ede, 13 ro ringa b̄a sara'a dou, sia nggahina d̄i la Efron, <<Takade'e to'ipu nggahi nahu. Nahu kane'e weli sara'a oma ede. Tarimapu piti ake loakud̄u nahu umbu weiku ta ede.>>
14 Cambe b̄a la Efron, 15 <<Dana ede co'ina 400 piti salaka. Wati wara co'ina d̄i ru'u b̄a dou b̄une ndai ake? Ta'umbupu wei ita ta ede.>> 16 La Ibrahim na ngawa kai co'i sandede. Sawa'u b̄a ede, sia rekena piti salaka b̄une ra pehe b̄a la Efron eded̄u 400 piti salaka, b̄une cara reke ra kani b̄a dou-dou ma daga ro uli. Edempara sia d̄onggona piti d̄i la Efron, kai sakasi b̄a sara'a dou Het ede.
17 Ndedeku oma ntau la Efron ma wara aka Makhpela ta wela ele b̄a Mamre, ndad̄i ntau la Ibrahim. Dana ede wara: oma, karombona ro sara'a fu'u haju ma wara d̄i oma ede ro fu'u-fu'u haju makahampakaina oma ede. 18 Sara'a dou Het ma wara ta ede namangakuku b̄a one dana ede wa'ura ndad̄i ntau la Ibrahim.