La Ibrahim Ugi B̄a Allah Ta'ala
22
Wati ntoina sawa'u b̄a ede, Allah Ta'ala ugina la Ibrahim. Allah Ta'ala ouna la Ibrahim, <<Ibrahim!>> <<Io, RUMA.>> cambe b̄a la Ibrahim.2 Nggahira Allah Ta'ala, <<Laopu aka dana Muria lab̄o la Ishak, anamu ma kese weki, ra wancu meci ro ca'u b̄a nggomi. Ta ede, wara sab̄ua doro d̄ikatada b̄a Nahu d̄i nggomi, d̄onggo ro mbeipu anamu d̄imandad̄i koroba ka'a d̄i ru'u b̄a Nahu.>>
3 B̄ala ai sanai sid̄i-sid̄i poda, la Ibrahim ti'a-ti'ana haju d̄ika'akaina koroba ro ampana haju ede ese kontu keladaina. Sia laona lab̄o la Ishak ro d̄ua dou adana aka hid̄i ra kaukai b̄a Allah Ta'ala d̄i sia. 4 D̄i ainaina ma katolukaina, eda sando'o b̄a la Ibrahim hid̄i ede. 5 Edempara nggahi b̄a sia d̄i ada-adana ede, <<Nggomid̄oho lab̄o keledai ngenapu ta ake. Nahu ro la Ishak ma lao nemba RUMA ta aka, nggara wa'usi ra nggori, nami d̄imamai mbali ta ake.>>
6 La Ibrahim ampana haju d̄ika'akai koroba ka'a ede d̄i d̄inca la Ishak, ndai sia ma wa'a tiso ro kama'a afi d̄ika'akaina haju. Wunga ade wunga lampakai siad̄oho, 7 nggahi la Ishak, <<Ama!>>
Cambe b̄a la Ibrahim, <<Io, b̄une ana?>>
Sod̄i b̄a la Ishak, <<Ndai wa'ura wa'ata afi ro haju, pala b̄eku ana jimba d̄ikorobakai ede?>>
8 Cambe b̄a la Ibrahim, <<Anaku, ndai Allah Ta'ala d̄imasadia weana ana jimba ede.>> Edempara siad̄oho lampa walina.
9 Wakatu siad̄oho ronggana aka hid̄i ra ngoakai b̄a Allah Ta'ala d̄i la Ibrahim, tu'u b̄a sia sab̄ua mezbah ro lakuna haju ka'a ede ta ese wawona. Edempara d̄ikina anana ro d̄orena d̄i mezbah, ta ese wawo haju ka'a ede. 10 Sawa'u b̄a ede, sia wehana tiso, d̄isambelekaina anana. 11 Pala nggahira Mala'eka RUMA d̄i la Ibrahim, <<Ibrahim, Ibrahim!>>
Cambe b̄a la Ibrahim, <<Io, RUMA!>>
12 <<Aina kapili ro kab̄une-b̄unemu anamu,>> nggahi RUMA ra karongga b̄a mala'eka ede, <<Ake, Nahu wa'ura b̄adeku b̄a one nggomi ma lia ro horoma ro mato'aku d̄i Nahu, nggomi wati dangawamu d̄onggo anamu ma kese weki ede d̄i Nahu.>>
13 Edempara la Ibrahim ntanda hekona ro edana sab̄ua jimba rangga ma ncafa wangana d̄i woha rompa rui. La Ibrahim wehana jimba ede, edempara d̄onggo ro mbeina d̄i RUMA ndad̄i koroba ka'a d̄icepekai anana. 14 La Ibrahim tangarakaina hid̄i ede <<RUMA ma sadia weanaq au-au ma d̄iparalu>>.r Ro saraka ake rau nggahi b̄a dou <<Ta ese wawo doro-Na, RUMA sadia weana au-au ma d̄iparalu.>>
15 Sakali wali ta ese langi Mala'eka RUMA nggahina d̄i la Ibrahim, 16 <<Nggahi RUMA: Nahu ma sumpa kai ngara ndai Nahu, b̄ara nggomi wa'ura kalampamu lampa rawi ake ro wati dangawamu d̄onggo anamu ma kese weki ede d̄i Nahu, 17 Nahu d̄imabareka nggomi kai bareka ma remba poda ro londo ro maimu b̄une mboto ntara d̄i langi ro sarae d̄i kengge moti. Ana ro ompu nggomi d̄imakakoana musu-musu siad̄oho. 18 B̄ara londo ro maimu, ndad̄i sara'a bangsa d̄i dunia d̄imaraka bareka, b̄ara nggomi wa'ura to'amu d̄i parenta Nahu.>> 19 Sawa'u b̄a ede, la Ibrahim dula mbalina aka ada-adana, edempara siad̄oho lao sama-samana aka Bersyeba ro la Ibrahim ngge'ena ta ede.
Londo Ro Mai La Nahor
20 La Ibrahim nantau sa'e mone, ngarana la Nahor. Sawa'u b̄a au ma randad̄i d̄i Doro Moria ede, la Ibrahim ringana haba b̄a one la Milka, wei la Nahor wa'ura ntau waru dou ana mone eded̄u 21 la Us, ma sasa'e; la Bus, arina; la Kamuel, ama b̄a la Aram; 22 la Kesed, Hazo, Pildas, Yidlaf, ro la Betuel, 23 ama b̄a la Ribka. Edeku waru dou ana mone ra nggana b̄a la Milka d̄i ru'u b̄a la Nahor, sa'e la Ibrahim. 24 La Nahor nantau wei kento, ngarana la Reuma ro weina ede ngganana ana eded̄u la Tebah, Gaham, Tahas, ro la Maakha.