Rawarakai La Ishak
21
RUMA barekana la Sara, b̄une ra wa'u sake b̄a Sia. 2 D̄i wakatu ra wa'u katantukai b̄a Allah Ta'ala, wakatu la Ibrahim wa'ura tua, na'era loko la Sara edempara ngganana sab̄ua dou ana mone. 3 La Ibrahim tangarakaina anana ede la Ishak; 4 ro wakatu la Ishak umuna waru nai, la Ibrahim sunana sia, b̄une ra parentakai b̄a Allah Ta'ala 5 La Ibrahim umuna 100 mba'a, wakatu warakai la Ishak. 6 Nggahi la Sara, <<Allah Ta'ala wa'ura kaharina nahul b̄ara neo adeku. Sanikina dou ma ringa lampa rawi ake d̄imahari neo ade sama-sama lab̄o nahu.>> 7 Edempara la Sara nggahi walina, <<Sawatipu b̄a ake wati wara kone sab̄ua dou rau ma disa nggahi d̄i rahi nahu b̄a one nahu d̄imasusu ana. Pala ake nahu wa'ura ngganaku ana, konena rahi nahu nawa'ura tua poda.>>8 La Ishak nanaha na'e ro rakara wakatu wi'ikai susu, la Ibrahim katu'una ndiha na'e.
La Hajar Ro La Ismail
9 D̄i sab̄ua ainaina, la Ismail ana la Ibrahim ro la Hajar dou siwe Mesir ede, wunga mpa'ana lab̄om la Ishak ana la Sara.n
10 La Sara edana lampa rawi ede, edempara nggahina d̄i la Ibrahim, <<Katesapu dou siwe ede lab̄o anana. Wati loana ana dou ede d̄imatarimana ntau ro wara ita ndad̄i pasakana. Ntau ro wara ita d̄ipasakakai b̄a la Ishak ana mada.>> 11 La Ibrahim wati ca'u podana b̄atu au ra kaukai b̄a la Sara ede, b̄ara la Ismail ede ana ndai rauna. 12 Pala nggahi Allah Ta'ala d̄i la Ibrahim, <<Nggomi aina daruramu mab̄oha adamu la Hajar ro anana ede. B̄atupu au ra kane'ekai b̄a la Sara, b̄a one kai ncai la Ishakku nggomi d̄imaraka londo ro mai b̄une ra sake b̄a Nahu ede. 13 Ndede rauku d̄i ru'u b̄a ana la Hajar. Nahu d̄imambei mboto ana ro ompu loakud̄u siad̄oho ndad̄i sab̄ua bangsa b̄a one sia ana nggomi rau.>>
14 B̄ala ai sanai sid̄i-sid̄i poda, la Ibrahim mbeina d̄i la Hajar ngaha ro nono ro oi ra tau kai kad̄ud̄u huri d̄i osuna. Sia ampa sara'ana ede d̄i kontu la Hajar, Sawa'u b̄a ede, kauna lao dou siwe ede. Edempara la Hajar lao ngge'e ndandana aka so sarae Bersyeba. 15 Wakatu cumpura oi nonona ede, la Hajar toho wi'ina anana ede d̄i wombo rompa mpori, 16 edempara sia dohona takasi 100 mete d̄o'ona lab̄o hid̄i ro tohokaina anana ede. Nggahina d̄ei adena, <<Nahu wati sampe adeku eda made anaku.>> Edempara sia nangi sased̄ina.o
17 Allah Ta'ala ringana eli nangi la Ismail ro ta ese langi Mala'eka, Allah Ta'ala ma nuntu lab̄o la Hajar, nggahi-Na, <<Au susakai ademu, Hajar? Aina dahu. Allah Ta'ala wa'ura ringana eli nangi anamu. 18 Laora aka anamu, kakid̄ipu ro kamidipu sia. Nahu d̄imakandad̄ina londo ro mai sia sab̄ua bangsa ma na'e.>> 19 Sawa'u b̄a ede, Allah Ta'ala katadana sab̄ua temba d̄i la Hajar. Edempara la Hajar lao isina oi d̄i kad̄ud̄u oina ede ro mbeina nono anana.>>
20 Allah Ta'ala malab̄ona la Ismail. Sia nanaha na'era; sia ngge'e impina aka so sarae Paran ro sia mandad̄i dou ma ngau nggalo. 21 La Ismail kanika b̄a inana lab̄o dou siwe Mesir.
La Ibrahim Ro Sangaji Abimelekh
22 D̄i wakatu ede sangaji Abimelekh ro la Pikhol, panglima tentara mai rakana la Ibrahim. Nggahi sangaji ede d̄i la Ibrahim, <<Allah Ta'ala bantuna nggomi ade samenana lampa rawi ra karawi b̄a nggomi. 23 B̄ara ndedena, sumpapu ta ake d̄i tando Allah Ta'ala, b̄a one nggomi wati d̄imatipu nahu ro ana-ana nahu, atao d̄i londo ro mai nahu. B̄une nahu wa'ura taho adeku d̄i nggomi, karawipu b̄une ede rau d̄i nahu ro d̄i ru'u dana ro rasa ngge'ekaimu ake.>>
24 Nggahi la Ibrahim, <<Mada masumpa.>>
25 Pala sawa'u b̄a ede, la Ibrahim badared̄ena d̄i Sangaji Abimelekh mab̄oha sab̄ua temba ra rampa b̄a ada-ada sangaji ede. 26 Nggahi Sangaji Abimelekh, <<Nahu wati b̄adeku cou ma rakarawina. Nggomi wati parana ngoamu nahu ro ake sarambakaina ringa b̄a nahu lampa rawi ede.>> 27 Edempara mbei b̄a la Ibrahim pila-pila mbua jimba ro capi d̄i Sangaji Abimelekh ro siad̄oho cua-cua rentana sake. 28 La Ibrahim wi'i kalaina pidu mbua ana jimba siwe ra d̄i jimba-jimba ntauna ede, 29 ro Sangaji Abimelekh sod̄ina d̄i sia, <<B̄ab̄auku nggomi karawi ndedekaimu?>>
30 Cambe b̄a la Ibrahim, <<Tarima aopu pidu mbua ana jimba siwe ake d̄imandad̄i tanda b̄a one ita mangakuta, madaku ma rangarina temba ake.>> 31 Ndedeku lao caritana hid̄i ede tangarakai Bersyeba, p b̄ara d̄i hid̄i ede siad̄oho d̄ua rentana sake.
32 Sawa'u b̄a siad̄oho ndawina sake d̄i Bersyeba, Sangaji Abimelekh ro la Pikhol lao mbalina aka dana ro rasa dou Filistin. 33 Edempara la Ibrahim nggud̄ana sampu'u fu'u haju tamariska d̄i Bersyeba ro ratampu'u aipu ede, hid̄i ede rakani d̄inembakai RUMA, Allah Ta'ala ma ede ro hid̄i. 34 Sawa'u b̄a ede, la Ibrahim ngge'e ntoi narina d̄i dana ro rasa dou Filistin kai dou lai rasa.