La Ibrahim Ro Sangaji Abimelekh
20
La Ibrahim tu'u wi'ina Mamre laona aka wela d̄o-na dana ro rasa Kanaan ro ngge'ena d̄i hela d̄ua dana ro rasa Kades ro Syur. Wati ntoi sawa'u b̄a ede, sia ngge'ena d̄i dana ro rasa Gerar, 2 ta aka la Ibrahim ngoana d̄i dou-dou b̄a one la Sara eded̄u arina. B̄ara ndedena, la Abimelekh Sangaji dana ro rasa Gerar kakaina dou lao weha ao la Sara. 3 D̄i sab̄ua aimangad̄i, Allah Ta'ala katadana weki d̄i sangaji ede d̄i ade nifina ro nggahi-Na, <<Nggomi tantu d̄imamade, b̄ara nggomi wa'ura wehamu dou siwe ede. Sia nawa'ura ntau rahi.>>4 Pala Sangaji Abimelekh watipu cecina la Sara, edempara nggahi sangaji ede, <<RUMA, mada wati wara ncaraku! Sab̄ua Ita d̄imakaleli mada ro bangsa mada? 5 Ndai la Ibrahim manggahi b̄a one dou siwe ede arina ro dou siwe ede nggahi rauna b̄a one la Ibrahim amaniana. Mada karawiku lampa rawi ede kai ade ma raso ro wati wara niaku ma dab̄ae, ndad̄i mada wati iuku weki ncara.>>
6 Edempara Allah Ta'ala cambena ade nifi sangaji ede, <<Ncihi romo, Nahu kab̄ade b̄a one nggomi karawimu kai ade ma raso. B̄ara ndedena, Nahu waura mbeiku tanda-tanda d̄i nggomi loakud̄u nggomi aina karawimu dosa d̄i Nahu ro Nahu wati co'oku nggomi d̄imaceci dou siwe ede. 7 Pala ake, b̄alipu sia aka rahina. B̄a one rahina eded̄u nabi ro sia d̄imado'a wea d̄i ru'u b̄a nggomi loakud̄u nggomi wati mademu. Pala d̄ib̄adekaimu, nggara watisi b̄ali b̄a nggomi la Sara, nggomi ro sara'a dou-doumu d̄imamade.>>
8 B̄ala ai sanai, sid̄i-sid̄i poda, Sangaji Abimelekh ou sara'ana dou ma karawi d̄i sia ro karendana d̄i siad̄oho mab̄oha au ra nifina ede. Ndad̄i siad̄oho nawancuku dahuna. 9 Sawa'u b̄a ede, Sangaji Abimelekh ouna la Ibrahim ro sod̄ina, <<Au ra karawi b̄a nggomi d̄i nami? Au ncara nahu d̄i nggomi, ndad̄ina nggomi kamaimu bala d̄i weki nahu ro karaja'an nahu? Poda-poda wati patuna nggomi nuntu cowamu d̄i nahu. 10 B̄ab̄auku nggomi karawi ndedekaimu d̄i nahu?>>
11 Cambe b̄a la Ibrahim, <<Kananu b̄a mada, ta ake wati wara dou ma dahu d̄i Allah Ta'ala, ndad̄ina mada d̄ihade b̄a dou ma ne'e weha wei mada. 12 Sia ede ari mada romo. Madad̄oho sab̄ua ama, pala cua lai ina, edempara madad̄oho nikamu. 13 Sawa'u b̄a ede, wakatu Allah Ta'ala kauna mada tu'u wi'i uma ama mada ro lao ngge'e ndanda d̄i saniki rasa dou makalai, mada nggahiku d̄i wei mada, <Katadapu to'amu d̄i nahu kai nggahi d̄i sanikina dou b̄a one nahu ake sa'emu.> >>
14 Sawa'u b̄a ede, Sangaji Abimelekh b̄alina la Sara d̄i la Ibrahim. Wakatu ede sia mbei rauna ada-ada, mboto jimba ro capi d̄i la Ibrahim. 15 Nggahi sangaji ede, d̄i la Ibrahim, <<Sara'a dana ro rasa ake, ntau nahu; ngge'e impipu d̄i hid̄i ta b̄era ne'ekai b̄a nggomi.>> 16 Edempara nggahi Sangaji Abimelekh d̄i la Sara, <<Sa'emu wa'ura mbei b̄a nahu 1000 piti salaka d̄ibukutikai d̄i sara'ana dou b̄a one nggomi poda-poda wati wara ncaramu.>>
17-18 RUMA wa'ura kambonggi sara'ana dou siwe ma wara d̄i asi Sangaji Abimelekh b̄ara rawi Sangaji Abimelekh d̄i la Sara wei la Ibrahim ede. Sawa'u b̄a ede, la Ibrahim do'a rahona d̄i Allah Ta'ala ro Allah Ta'ala kataho mbalina Sangaji Abimelekh, weina ro ada-ada siwena, ndad̄ina dou-dou siwe ede naloara nggana wali.