Dosa Kota Sodom
19
Sawa'u b̄a tu'u wi'ina hid̄i ngge'ekai la Ibrahim, d̄ua dou mala'eka ede laona aka kota Sodom ro ronggana ta aka nane'era rindi ai. Wakatu ede la Lut wunga dohona d̄i tad̄a lawa kota ro wakatu edana siad̄oho, sia rai aona siad̄oho. Edempara sujuna d̄i tando doud̄oho ede, 2 ro nggahina, <<Itad̄oho santab̄e tasai to'ipu d̄i uma mada, itad̄oho tawaca wa'upu ed̄ita ro maru mpa d̄i uma mada. Naisi sid̄i-sid̄i Itad̄oho maloa lampa ro lao wali.>>Pala cambe b̄a dou-dou ede, <<Tarima kasi, co'opu nami maru d̄i hid̄i ma paja ro kalau ake.>> 3 La Lut rece pab̄uana ro dou d̄uana ede nangawa b̄atu nggahi la Lut, edempara lao sama-samana lab̄o sia aka umana. La Lut sadia weana ngaha ro nono ma caru ro puruna roti, edempara dou-dou ede ngahana.
4 Pala sawatipu b̄a maruna dou-dou ma rongga ede, dou-dou mone d̄i kota Sodom nataho ma tua ro ma to'i dei hekona uma la Lut. 5 Siad̄oho ou kanggicana la Lut ro sod̄ina, <<Tab̄eku dou-dou mone ma rongga d̄i umamu? D̄onggopu siad̄oho, nami mane'e maru campo lab̄o siad̄oho!>>
6 La Lut losana ro sawa'u b̄a ede, sia kempana tad̄a 7 ro sia nggahina d̄i dou-dou Sodom ede, <<Cinad̄oho, nahu maraho poda-poda d̄i nggomid̄oho, ai to'ina karawimu lampa rawi ma dab̄ae d̄i dou-dou ede! 8 Takade'e wa'upu nggahi nahu, nahu wara d̄ua dou ana siwe sampelaku. Nahu d̄imad̄onggo siad̄oho d̄i nggomid̄oho ro nggomid̄oho loa karawi b̄e rane'emu d̄i siad̄oho. Pala aina kab̄une-b̄unemu dou-dou ma rongga d̄i uma nahu ake, b̄a one nahu pab̄uaku jaga ro sandakaku siad̄oho.>>
9 Pala nggahi dou-dou Sodom ede d̄i la Lut, <<Peso wekimu! Nggomi dou lai rasa ma ne'e ato nami?>> Aina katada pahumu ta ake! Nggara matelesi, nggomi rau d̄ika'iha b̄a nami ese mai b̄a doud̄oho ede.>> Edempara siad̄oho d̄unggina la Lut ro nane'eku kaleli tad̄a uma la Lut. 10 Pala dou d̄uana ma rongga ede rab̄i cad̄eina la Lut lu'u ade umana, edempara kempana tad̄a. 11 Dou d̄uana ede kambuda sara'ana mada dou ma wara ta ari mai b̄a uma ede, ndad̄ina dou-dou ede wati loana eda tad̄a ncai ede.
La Lut Tu'u Wi'ina Sodom
12 Dou-dou ma rongga ede nggahina d̄i la Lut, <<Nggara nggomi mantausi ana mone, ana siwe, rido atao iwa ro wekimu makalai ma ngge'e d̄i ade kota ake, wa'a kalosapu siad̄oho, 13 b̄a one kota ake d̄ikaleli b̄a Nami. RUMA wa'ura ringana dou-dou ma weta mab̄oha rawi siad̄oho ma dab̄ae ta ake ro nami wa'ura kakai b̄a Sia d̄imakalelina kota Sodom ake.>>
14 Edempara la Lut lao eda angina lab̄o dou sod̄i anad̄ohona ro nggahina, <<Losa rocira d̄i hid̄i ake, RUMA d̄imakalelina kota ake.>> Pala siad̄oho nakacaiku la Lut nanuntu lalone.
15 D̄i wakatu sidi-sidi poda, d̄ua dou mala'eka ede kauna lao roci. <<Rocira,>> nggahi siad̄oho, <<Lao pesopu wekimu d̄i hid̄i ake lab̄o weimu ro ana-ana sampela siwemu, loakud̄u nggomid̄oho wati mademu nggara kalelisi b̄a nami kota ake.>> 16 La Lut nakamanggiku wekina, b̄ara ndedena d̄ua dou mala'eka ede rab̄ina la Lut ro weina lab̄o d̄ua dou anana losa ari mai b̄a kota, b̄ara RUMA kasi adena d̄i sia. 17 Sawa'u b̄a ede, sab̄ua dou d̄i weki mala'eka ede nggahina, <<Rai kasalamapu nawamu! Aina tambari ro ai to'ina sanawa saimu d̄i so. Raipu aka doro-doro, loakud̄u nggomid̄oho salama!>>
18 Pala cambe b̄a la Lut, <<Ira Ruma, Ita aina kauta madad̄oho lao rai aka doro-doro. 19 Poda romo, Ita ruma wa'ura bantu podata mada ro kasalamata mada, pala doro-doro ede na'ipiku d̄o'ona. Mada kadahuku sawatipu ronggaku ta aka dawa, mada raka b̄atu b̄a bahaya, ndad̄ina mada made rau. 20 Ruma, ta tando aka wara kota to'i ma wati ipi d̄o'ona. Ta kau to'ipu mada lao rai ta aka dawa loakud̄u salama.>>
21 Cambe b̄a Mala'eka ede, <<Taho, kota to'i ede wati d̄ikaleli b̄a Nahu. 22 Roci, raira! Nahu watipu loaku karawi au-au d̄i kota Sodom ake sawatipu b̄a rongga nggomi ta aka.>>
B̄ara pehe b̄a la Lut kota ede <<To'i,>> ndad̄i kota ede tangarakai Zoar.h
Lelina Kota Sodom Ro Kota Gomora
23 La Lut ronggana d̄i Zoar wunga wontu liro. 24 Wed̄i lalo mpa, RUMA kalondona pure afi b̄une b̄ua ura d̄i kota Sodom ro Gomora. 25 D̄ua mbua kota ede kaleli b̄a RUMA ro sara'a so ro samenana ma woko lab̄o sara'a dou ma wara ta ede. 26 Pala wei la Lut tambarina, edempara ndad̄i lalona <<tandi'i sia.>>
27 B̄ala ai sanai, sid̄i-sid̄i poda, la Ibrahim lao rocina aka hid̄i rakid̄ikaina awina tando RUMA sanai sawatipu b̄a wara mandad̄i ede. 28 Sia ntanda sando'ona kota Sodom ro kota Gomora ro sara'a so Yordan ro edana ob̄u ma teka wule d̄i dana ro rasa ede, b̄une ob̄u ma losa d̄i riha ma na'e poda. 29 Ndedeku wakatu Allah Ta'ala kalelina kota-kota ede d̄i so hid̄i ngge'ekai la Lut. Allah Ta'ala kawarana au ra sake-Na d̄i la Ibrahim ro bantuna la Lut rai peso weki.
Tampu'u Tampona Warakai Dou Moab Ro Dou Amon
30 La Lut nadahuku ngge'e impi d̄i Zoar, edempara laora sia aka doro-doro lao samana lab̄o d̄ua ana siwena, ta aka siad̄oho ngge'ena ade karombo doro. 31 Ana siwena ma sasa'e nggahina d̄i arina, <<Ama ndai nawa'ura tua ro d̄i sara'a dana ro rasai ake wati wara dou mone ma loa nika lab̄o ndai loakud̄u ndai raka londo ro mai. 32 Mai, ndai ta'ono kamawuku ama laokud̄u ndai maru campo lab̄o sia loakud̄u ama ndai nantau londo ro mai ma ramai ta ama ndai.>> 33 D̄i aimangad̄i ede siad̄oho mbeina oi anggo d̄i amana, edempara anana ma sasa'e maru campo lab̄ona amana; pala amana na'ipiku mawuna, ndad̄i wati b̄adena au ma wa'ura ndad̄i.
34 B̄ala ai sanai, ana ma sasa'e nggahina d̄i arina, <<Aka sangad̄ina nahu wa'ura maru campo lab̄oku ama! Pea sangad̄isi ndai ta ono kamawu waliku sia. Sawa'u b̄a ede, nggomi maru campo lab̄opu sia. Ndad̄i, peasi ndai d̄imacua-cua mbei londo ro mai d̄i ru'u b̄a ama ndai.>> 35 Ndedeku d̄i aimangad̄i ede siad̄oho ono kamawu walina la Lut ro ana siwena ma kad̄uakaina maru campo lab̄ona amana. Ro la Lut na'ipiku mawuna, ndad̄i wati b̄adena au-au ma wa'ura ndad̄i. 36 Edempara na'era loko ana la Lut d̄uana ede b̄ara rawi siad̄oho d̄i amana. 37 Ana la Lut ma sasa'e ngganana ana mone ro tangarakaina la Moab. Sia mandad̄i wa'i ro waro dou Moab. 38 Anana ma kad̄uakaina ngganana ana mone rau ro tangarakaina la Ben-Ami; sia edeku mandad̄i wa'i ro waro dou Amon.k