Allah Ta'ala Sakena Ana Mone D̄i La Ibrahim
18
RUMA katadana weki d̄i la Ibrahim d̄i kompe fu'u haju na'e ma karama hid̄i sambea ro ibadakai d̄i Mamre. Ainaina ede nawancuku panana ro la Ibrahim wunga dohona d̄i tad̄a kemana. 2 Wakatu sia hantana tuta, sia edana tolu dou ma wunga mai raka sia. La Ibrahim roci lao weha aona siad̄oho ede. Edempara sia suju 3 ro nggahina, <<Itad̄oho, aina lampa kalalota kema mada, satab̄e tasai wa'u; mada d̄imakab̄ua wea ngaha ro nono d̄i ru'u b̄a Itad̄oho. 4 Mada d̄imalao weha oi d̄iwaca kai ed̄i Itad̄oho. Santab̄eta, Itad̄oho tasanawa wa'u d̄i wombo fu'u haju ake. 5 Mada d̄imaka'ambi wea ngaha ro nono Itad̄oho b̄e ma wara, loakud̄u Itad̄oho tenggo ade lampa ro laokaita. Itad̄oho wa'ura kaco'ita mada kai ngawata sai wa'u d̄i salaja mada ake.>>Cambe b̄a siad̄oho, <<Tarimakasi, Nami d̄imasai.>> 6 La Ibrahim lu'u rocina ade kema ro nggahina d̄i la Sara, <<Roci, wehapu sakampi mub̄u ma taho poda ro ndawipu roti.>> 7 Edempara sia lao raina aka hid̄i rewokai binata ntadina, kad̄alena ana capi ma mpore ro ma mo'o hi'ina, edempara mbeina d̄i adana ro kauna sambele ro kamami roci. 8 Sawa'u b̄a ede, la Ibrahim lao wehana susu ra d̄ad̄i ro hi'i ra kamami ede, edempara ka'ambina d̄i ru'u dou-dou ma rongga ede. Wunga siad̄oho ngahana, ndai la Ibrahim ma ka'ambi weana ngaha ro nono siad̄oho d̄i wombo fu'u haju ede.
9 Edempara sod̄i b̄a siad̄oho d̄i la Ibrahim, <<Ta b̄eku la Sara, weimu?>>
<<Io, wara ade kema,>> cambe b̄a la Ibrahim.
10 Nggahi b̄a sab̄ua dou d̄i ade weki siad̄oho ede, <<Ciwi wura walif Nahu d̄imamai mbali. Ro d̄i wakatu ede la Sara weimu d̄imanggana ana mone.>>
Wakatu ede la Sara wunga kade'ena ta ari kontu tad̄a kemana, ta ari mai b̄a dou-dou ma rongga ede. 11 La Ibrahim ro la Sara nawa'ura ipi tua ro la Sara watid̄u mai takina. 12 B̄ara ndedena la Sara harina d̄ei adena ro nggahina, <<Nahu ma wa'ura tua ro male b̄une ake, wati lu'u b̄a aka nahu mbuipu mai adeku d̄i rahiku, au walipu rahiku nawa'ura tua rau.>>
13 Edempara RUMA sod̄ina d̄i la Ibrahim, <<B̄ab̄auku harikaina la Sara ro wati imbina b̄a one sia mbuipu loana nggana ana konena wa'ura tua? 14 Sab̄ua nawara ma wati lu'u b̄a aka d̄i ru'u b̄a RUMA? B̄une ra wa'u nggahi b̄a Nahu akande, ciwi wura wali Nahu d̄imamai mbali ta ake. Ro d̄i wakatu ede la Sara d̄imanggana ana mone.>>
15 B̄ara dahuna, la Sara kawatina ro sia nggahina, <<Mada wati hariku.>>
Pala cambe b̄a RUMA, <<Nggomi hari romomu akande.>>
La Ibrahim Rahona Kangampu D̄i Ru'u B̄a Kota Sodom
16 Sawa'u b̄a ede, tolu dou ede laona ro oto b̄a la Ibrahim. Edempara ronggara siad̄oho aka sab̄ua hid̄i. Ta ede siad̄oho naloa eda kota Sodom. 17 RUMA nggahina d̄i weki ndai-Na, <<Nahu wati loaku ili ro pita masa'ala ake d̄i la Ibrahim au d̄i ne'e karawi b̄a Nahu. 18 B̄a one londo ro mai sia d̄imandad̄i bangsa ma na'e ro mantau kuasa ro kai ncai la Ibrahim, sara'a bangsa d̄i dunia d̄ibareka b̄a Nahu. g 19 Sia wa'ura kad̄ale b̄a Nahu loakud̄u sia parentana anad̄ohona ro londo ro maina d̄imato'a d̄i Nahu ro makalampa au ma taho ro ma adil. Nggara siad̄oho nakalampasi rawi ede, ndad̄i samenana au ra sake b̄a Nahu d̄i la Ibrahim tantu d̄imbei b̄a Nahu.>>
20 Edempara RUMA nggahi walina d̄i la Ibrahim, <<Nahu ringaku mboto weta dou mab̄oha rawi ma iha ra karawi b̄a dou-dou sodom ro Gomora ro wara romo dosa siad̄oho ma ipi na'e. 21 B̄ara ndedena, Nahu d̄imalondo loakud̄u d̄ib̄adekai au ma randad̄i b̄une ra ringa-Ku ede, sab̄ua napoda atao wati.>>
22 Edempara d̄ua dou d̄i weki tolu dou ede laona aka kota Sodom, pala RUMA mbuipu warana d̄i hidi la Ibrahim. 23 La Ibrahim mai d̄enina d̄i RUMA ro nggahina, <<Sab̄ua poda Ita, RUMA mane'e kaleli dou-dou ma wati wara ncara sama-sama lab̄o dou-dou ma karawi ncara? 24 Nggara nawarasi lima mpuru dou ma wati wara ncara d̄i kota ede, sab̄ua kota ede d̄ikaleli sara'a b̄a Ita RUMA? Sab̄ua Ita wati ngawata kangampu wea kota ede b̄ara lima mpuru dou ede? 25 Wati lu'u b̄a aka Ita RUMA karawita b̄une ede, hadeta dou-dou ma wati wara ncara ede sama-sama lab̄o dou-dou ma ncara. Ndad̄ina dou-dou ma wati wara ncara ede kasama b̄a ita lab̄o dou-dou ma ncara. Wati lu'u b̄a aka hakim makuasakai dunia ake kalampana hukuman ma wati adi!>>
26 Nggahira RUMA, <<Nggara raka edasi b̄a Nahu lima mpuru dou ma wati wara ncara d̄i kota Sodom, Nahu makangampuna sara'a dou ma wara d̄i kota ede b̄ara lima mpuru dou ede.>> 27 Nggahi la Ibrahim wali, <<Kangampu weapu ruku ro rawi mada ma disa nuntu ro nggahi ake, RUMA. Mada ake manusia biasa mpa ro wati patu ro ambina kalosa nggahi ro eli. 28 Pala, kombisi wara upa mpuru lima dou mpa ma wati wara ncara ta aka ro laina lima mpuru dou. Sab̄ua Ita ngge'e mpa kalelita kota ede b̄ara kura lima dou?>>
Nggahira RUMA, <<Kota ede wati d̄ikaleli b̄a Nahu, nggara nawarasi upa mpuru lima dou ma wati wara ncara.>>
29 La Ibrahim nggahi walina, <<RUMA, b̄uneku nggara warasi upa mpuru dou mpa?>>
Cambe b̄a RUMA, <<B̄ara upa mpuru dou ede, Nahu wati d̄imakalampa au ra nia ba Nahu ede.>> 30 Nggahi la Ibrahim, <<Aina mbani, RUMA, nggara mada ma nuntu ro nggahi wali. B̄uneku misakai warasi tolu mpuru dou mpa?>>
Cambe b̄a RUMA, <<Nggara rakasi eda b̄a Nahu tolu mpuru dou, Nahu wati kalampaku rania-Ku ede.>>
31 Nggahi la Ibrahim, <<Takangampu to'ipu mada ma disa nuntu ro nggahi ntuwu ake, RUMA. Misakai nggara nawarasi d̄ua mpuru dou mpa?>>
Cambe b̄a RUMA, <<Nggara rakasi eda b̄a Nahu d̄ua mpuru dou, kota ede wati d̄ikaleli b̄a Nahu.>>
32 Edempara cumpukaina la Ibrahim nggahina, <<Ai to'ina mbani, RUMA, mada d̄imanuntu sakali wali mpa. B̄uneku nggara warasi sampuru dou mpa?>>