Suna Ma Ndad̄i Tanda Sake Allah Ta'ala Lab̄o La Abram
17
Wakatu la Abram umuna ciwi mpuru ciwi mba'a, RUMA katadana weki d̄i sia ro nggahi-Na, <<Nahu ake, Allah Ta'ala Ma Wancu Kuasa. To'apu d̄i Nahu ro karawipu au ra kane'ekai b̄a Nahu. 2 Nahu d̄imandawi sake d̄i ru'u b̄a Nahu lab̄o nggomi ro mambei nggomi londo ro mai ma ipi mboto.>> 3 Sawa'u b̄a ede sujura la Abram, edempara nggahira Allah Ta'ala, 4-5 <<Akeku sake Nahu d̄i nggomi: Nahu masake b̄a one nggomi d̄imandad̄i ama b̄a wa'i ro waro b̄a mboto bangsa. B̄ara ndedena, ngaramu lai walina Abram, malaisi Ibrahim.d 6 Nahu d̄imambei d̄i nggomi mboto ana ro ompu ro pila-pila dou d̄i weki siad̄oho wara d̄imandad̄i sangaji-sangaji. Londo ro maimu d̄ima'ipi mboto, ndad̄ina siad̄oho d̄imatu'u bangsa-bangsa ndaina.7 Nahu d̄imambei au ra sake b̄a Nahu d̄i nggomi ro d̄i londo ro maimu sandundu ro ndaka ro sake ede na'ede ro hid̄i. B̄a one Nahu d̄imandad̄i Allah Ta'alamu ro Allah Ta'ala londo ro maimu. 8 Nahu d̄imambei d̄i nggomi ro d̄i londo ro maimu dana ake, ma wunga ngge'ekai b̄a nggomi kai dou lai rasa. Sara'a dana Kanaan d̄imandad̄i ntau ana ro ompumu santoi-ntoina; ro Nahu d̄imandad̄i Allah Ta'ala siad̄oho.>> 9 Allah Ta'ala nggahi walina d̄i la Ibrahim, <<Nggomi rau pab̄uapu to'amu d̄i au ra sake ake, nataho nggomi ro londo ro maimu sandundu ro ndaka.>> 10 Nggomi ro sara'a londo ro maimu ma monena pab̄uaku d̄isuna. 11-12 Tampu'u ake, nggomi pab̄uapu sunamu sanikina ana mone ma umu waru nai ro ada-adamu ma mone ra nggana d̄i umamu atao ada-ada ra weli b̄a nggomi. Suna ede d̄imandad̄i tanda rasake d̄i weki Nahu lab̄o nggomi. 13 Sanikina dou mone pab̄uaku d̄isuna ro ede d̄imandad̄i tanda ma tada d̄i sarumbu kasamu ma tei katadana b̄a one rasake Nahu lab̄o nggomi ede na'ede ro hid̄i. 14 Sanikina dou mone ma wati rasuna wati loana ndad̄i ela Nahu b̄ara sia wati kalampana rasake ede.>>
15 Edempara nggahira Allah Ta'ala d̄i la Ibrahim, <<Nggomi ai walina oukaimu weimu la Sarai; tampu'u ake ngarana la Sara. 16 Nahu d̄imabarekana sia ro weimu ede d̄imanggana ana mone d̄i ru'u b̄a nggomi. Io, Nahu d̄imabareka la Sara ro sia d̄imandad̄i ina wa'i ro waro b̄a bangsa-bangsa. Ro pila-pila dou d̄i weki londo ro maina wara d̄imandad̄i sangaji-sangaji.
17 Edempara sujura la Ibrahim, pala sia harina b̄ara kananuna, <<B̄uneku loana sab̄ua dou mone ma wa'ura umu 100 mba'a ntauna ana? B̄uneku loana la Sara nggana d̄i umuna ciwi mpuru mba'a?>> 18 Edempara nggahira sia d̄i Allah Ta'ala, <<Sab̄ua wati loana la Ismail mpa d̄imandad̄i dou mapasakakaina ntau ro wara mada ro bareka ra sake d̄i londo ro mai mada?>>
19 Pala nggahi Allah Ta'ala. <<Wati! La Sara weimu d̄imanggana ana mone ro nggomi pab̄uapu tangarakaimu sia la Ishak.e Nahu masake d̄i sia ro d̄i londo ro maina. Rasake ede na'ede ro hid̄i santoi-ntoina.
20 Pala Nahu d̄imambei rau au ra raho b̄a nggomi d̄i ru'u b̄a la Ismail. B̄ara ndedena sia d̄ibareka ro d̄imbei b̄a Nahu londo ro mai ma mboto. Sia d̄imandad̄i ama b̄a wa'i ro waro b̄a sampuru d̄ua ma na'ekai suku, londo ro maina d̄ikandad̄i b̄a Nahu bangsa ma na'e. 21 Sake Nahu d̄indawi b̄a Nahu lab̄o la Ishak, anamu d̄inggana b̄a la Sara, mba'a satando d̄i wakatu b̄une ake.>> 22 Sawa'u b̄a nggori nggahi ndedena, Allah Ta'ala tu'u wi'ina la Ibrahim.
23 D̄i ainaina ede lalo, la Ibrahim kalampana au ra parentakai b̄a Allah Ta'ala ro sunana la Ismail ro sara'a dou mone ma wara ade umana ro ada-ada ra nggana ade umana ro ada-ada ra welina. 24 La Ibrahim sunana wakatu sia umuna ciwi mpuru ciwi mba'a, 25 ro susuna anana la Ismail wakatu la Ismail umuna sampuru tolu mba'a. 26 Siad̄oho rasuna d̄i ainaina ma sama, 27 sama-sama lab̄o sara'a ada la Ibrahim.