La Hajar Ro La Ismail
16
La Sarai wei la Abram wati ngge'epu ngganana ana d̄i ru'u b̄a la Abram. La Sarai nantau ada siwe sampela dou Mesir, ngarana la Hajar. 2 Edempara la Sarai nggahina d̄i la Abram, <<RUMA watipu kauna mada nggana ana. B̄ara ndedena, satahona ita maru campo lab̄opu ada mada. Kombisi sia naloa nggana wea ana d̄i ru'u b̄a mada.>> La Abram nab̄atuku au ra nggahi b̄a la Sarai. 3 Ndedeku lao caritana la Sarai d̄onggona la Hajar d̄i la Abram d̄imandad̄i wei kad̄uakaina. D̄i wakatu ede la Abram wa'ura sampuru mba'a ngge'ena d̄i dana ro rasa Kanaan. 4 La Abram maru campo lab̄ona la Hajar, edempara la Hajar na'e lokona. Pala wakatu la Hajar b̄adena b̄a one sia wa'ura na'e lokona, sia kasombona weki ro watid̄u kaco'i walina la Sarai.5 Edempara la Sarai nggahina d̄i la Abram, <<Mada wa'ura d̄onggoku la Hajar ada mada d̄i ita, ro ndede b̄adena b̄a one sia wa'ura na'e lokona, sia watidu kaco'ina mada. Ede ncara Ita.b Raho-raho to'i mpa RUMA kanggorina masa'ala ake d̄i ade weki mada lab̄o ita.>>
6 Cambe b̄a la Abram, <<Taho, sia ede ada nggomi; ro nggomi ma kuasakaina sia; karawipu b̄a nggomi b̄era ne'emu d̄i sia.>> Edempara la Sarai karawina kai wancu toku ro kasa d̄i la Hajar, ndad̄ina la Hajar lao rai tu'u wi'ina la Sarai.
7 Mala'eka ra kakai b̄a RUMA, eda angina lab̄o la Hajar aka mada oi so sarae, d̄i ncai ma lao aka Sur. 8 Nggahi Mala'eka ede, <<Hajar, ada la Sarai, nggomi ramaimu ta b̄e ro mane'e lao ta b̄eku?>>
Cambe b̄a la Hajar, <<Mada rai tu'u wi'iku la Sarai, ruma siwe mada.>>
9 Nggahi Mala'eka ede, <<Dula mbalipu aka ruma siwemu ro karawi weapu d̄i ru'u b̄a sia.>> 10 Edempara nggahi wali Mala'eka ede d̄i la Hajar, <<Nahu d̄imambei nggomi ana ro wa'i ma mboto, ndad̄ina wati wara kone sab̄ua dou rau ma wa'una reke siad̄oho. 11 Wati ntoi walina nggomi d̄imanggana ana mone; tangarakaipu sia la Ismail,c b̄a one RUMA wa'ura ringana nangi b̄ara susa ro ncoki nggomi. 12 Ana nggomi ede d̄imamori b̄une keledai daro; sia d̄ima'ao sanikina dou ro sanikina dou d̄ima'ao sia. Sia d̄imangge'e ncengga lab̄o sara'a iwa ro wekina.>>
13 La Hajar nggahina d̄ei adena, <<Sab̄ua poda nahu wa'ura edaku Allah Ta'ala ma ntanda ro eda nahu? Pala nahu mbuipu moriku?>> Ndad̄i sia pehena, RUMA ma wa'ura nuntu ro nggahi lab̄o sia, El-Roi, aona, <<Allah Ta'ala ma ntanda ro eda nahu.>> 14 B̄ara ndedena, temba ede pehekai b̄a dou Lahai-Roi ma wara d̄i hela d̄ua Kadesy lab̄o Bered, aona, <<Temba Sia Ma Mori Ma Ntanda Ro Edana nahu>>.