Allah Ta'ala Sakena D̄i La Abram
15
D̄i sab̄ua ainaina, la Abram ringana eli RUMA ma nggahi d̄i sia, <<Aina dahu, Abram, Nahu d̄imajaga ro sandaka nggomi ade bahayakai ro mambei nggomi ufa ma na'e.>>2-3 Pala cambe b̄a la Abram, <<Io, RUMA Ma Wancu D̄ese Ro Ntasa, Ita wati mbeita ana d̄i ru'u b̄a mada. Dou d̄imapasakakaina ntau ro wara mada eded̄u la Eliezer mpa, ada mada dou Damsyik.a Ndad̄i auku onena Ita mbeita ufa ma na'e d̄i mada?>>
4 Edempara la Abram ringa walina RUMA ma nggahi d̄i sia, <<Laina adamu d̄imakapasakakaina ntau ro wara nggomi, malaisi ana mone ndai nggomi.>> 5 Edempara RUMA wa'a kalosana la Abram, sawa'u b̄a ede, nggahira RUMA d̄i la Abram, <<Ntandapu langi ro rekepu ntara-ntara ma ipi mboto ede; Nggomi d̄imantau londo ro mai b̄une mboto ntara-ntara ede.>>
6 La Abram na'imbiku d̄i RUMA ro b̄ara ndedena RUMA tarimana sia kai dou ma kasana wea ade-Na.
7 Edempara RUMA nggahi walina d̄i la Abram, <<Nahu ake RUMA ma wa'ura d̄anda ro wa'a nggomi losa d̄i dana ro rasa Ur d̄i Babilonia, d̄imbeikaiku dana ake ndad̄i ntau nggomi.>>
8 Pala sod̄i b̄a la Abram, << Io RUMA Ma Wancu D̄ese Ro Ntasa, b̄uneku d̄ib̄adekai b̄a mada b̄a one dana ede d̄imandad̄i ntau mada?>>
9 Cambe b̄a RUMA, <<Wehapu d̄i ru'u b̄a Nahu sab̄ua capi siwe, sab̄ua mbe'e siwe ma umuna tolu mba'a ro sab̄ua jimba rangga ma umuna tolu mba'a rau ro sab̄ua kampodu ro sab̄ua nasi dara.>> 10 Sawa'u b̄a ede, la Abram wehana binata-binata ede d̄i ru'u b̄a Allah Ta'ala. Capi, mbe'e ro jimba ede b̄i'ana, edempara tohona ede cua satando angina ade d̄ua tala. Pala nasi-nasi ede watira b̄i'ana. 11 Edempara maira nasi-nasi ma ngaha timba ro ntu'ukaina d̄i hi'i-hi'i ede, pala b̄aka b̄a la Abram.
12 Wakatu ne'era nci'i liro, la Abram maru nefana. D̄i hid̄i ede, wed̄i lalo mpa rindi ncaki ma wancu samangi ma b̄ontona la Abram. 13 Ndad̄i nggahira RUMA d̄i la Abram, <<Kawarapu b̄a one londo ro maimu d̄imandad̄i dou lai rasa d̄i dana ro rasa makalai; ta aka siad̄oho d̄ika'ada ro d̄ikasusa ro d̄ikancoki b̄a dou 400 mba'a ntoina. 14 Pala bangsa maka'ada londo ro maimu ede d̄ihukum b̄a Nahu ro d̄i wakatu siad̄oho tu'u wi'ina dana ro rasa ede, siad̄oho d̄imawa'a ntau ro wara ma mboto. 15 Ndai nggomi d̄imad̄ondo umumu; sampe b̄ura honggomu, nggomi d̄imamade kai taho sana ro d̄i'umbu. 16 Pala londo ro maimu ma ka'upakaina d̄imamai mbali ta ake, b̄a one Nahu wati d̄imakatesa dou Amori sawatipu b̄a siad̄oho poda-poda dab̄aena d̄i nggomid̄oho, ndad̄i siad̄oho ede pab̄uaku d̄ihukum.>>
17 Wakatu rakara aimangad̄i, wed̄i lalo mpa wontu sab̄ua tab̄e dana ma ntau ob̄u ro obo ma kalae, edempara lampa saina ta hela hi'i ra b̄i'a-b̄i'a ede. 18 D̄i ainaina ede wa'u RUMA sakena d̄i la Abram. Nggahira RUMA, <<Nahu masake b̄a one Nahu d̄imambei d̄i londo ro maimu sara'a dana ake, tampu'u aka sori d̄i dana ro rasa Mesir salalo aka sori Efrat, 19 ro dana dou Keni, Kenas, Kadmon, 20 Het, Feris, Refaim, 21 Amori, Kanaan, Gergasi ro dana ro rasa dou Yebus.>>