Abram Bantuna La Lut
14
Upa dou sangaji, eded̄u la Amrafel sangaji Babilonia, la Ariokh sangaji d̄i Elasar, la Kedorlaomer sangaji d̄i Elam ro la Tideal sangaji d̄i Goyim 2 Malewa lab̄o lima sangaji makalai, eded̄u la Bera sangaji Sodom, Birsya sangaji Gomora, Syinab sangaji Adma, la Semeber sangaji Zeboim ro sangaji dana ro rasa Bela d̄ipehe rau kai dana ro rasa Zoar. 3 Lima dou sangaji ede kasamana weki ro kab̄orona tentara siad̄oho d̄i So Sidim, ake ngarana d̄ipehe rau kai Moti Made. 4 Sampuru d̄ua mba'a ntoina siad̄oho kuasakai b̄a Sangaji Kedorlaomer, pala ade mba'ana ma kasampuru tolukaina siad̄oho barontana d̄i'aokaina Sangaji Kedorlaomer. 5 Ade mba'a ma kasampuru upakaina, la Kedorlaomer ro sangaji-sangaji ma kasama weki lab̄o sia maina lab̄o tentarana ro kakoana dou Refaim d̄i Asyterot-Karnaim, dou Zuzim d̄i dana ro rasa Ham, dou Emim d̄i dana ro rasa Syawe-Kiryataim 6 ro dou Hori ma ngge'e d̄i doro-doro Edom, edempara cocona siad̄oho salalo aka El-Paran d̄eni lab̄o so sarae. 7 Sawa'u b̄a ede, dou-dou ma coco ede poku mbalina aka En-Mispat, ma wakatu ake d̄ipehe kai Kades. Siad̄oho kuasakaina sara'a dana ro rasa dou Amalek ro kakoana dou Amori ma ngge'e d̄i dana ro rasa Hazezon-Tamar.8 Edempara sangaji-sangaji d̄i dana ro rasa Sodom, Gomora, Adma, Zeboim lab̄o sangaji dana ro rasa Bela atona tentarana d̄i So Sidim, edempara 9 siad̄oho ede lewana lab̄o sangaji-sangaji dana ro rasa Elam, Goyim, Babilonia ro sangaji dana ro rasa Elasar; ndad̄i, lima dou sangaji ma lewa lab̄o upa dou sangaji. 10 So ede b̄ini b̄a temba mina dana ro wakatu sangaji-sangaji Sodom ro Gomora nane'e rai hori weki ade lewa ro lakakai ede, pala ma ndad̄i, siad̄oho mab̄u ade temba-temba ede. Tolu dou sangaji ma kalaina naloa hori weki ro lao raina aka doro-doro. 11 Upa dou sangaji ma ngolu, weha rampa sara'ana ntau ro wara ro ngaha ro nono ntau dou-dou dana ro rasa Sodom ro Gomora, sawa'u b̄a ede, siad̄oho laona. 12 La Lut ana tato'i la Abram ngge'e rau d̄i Sodom, b̄ara ndedena la Lut rau wa'a b̄a musu lab̄o sara'a ntau ro warana.
13 Pala sab̄ua dou ma loa rai hori weki lao ngoana samenana au ma ndad̄i ede d̄i la Abram, dou Ibrani ede. La Abram nangge'e d̄eni lab̄o fu'u-fu'u haju karama hid̄i sambea ro ibadakai ntau la Mamre, dou Amori. La Mamre lab̄o cinad̄ohona la Eskol ro la Aner eded̄u lenga-lenga ma kasama weki lab̄o la Abram. 14 Ndede ringa b̄a la Abram b̄a one ana tato'ina wa'ura wa'a b̄a musu, sia kab̄oro sara'ana dou d̄i ade kemana, eded̄u ma loa lewa ro laka, mbotona 318 dou, edempara coco b̄atuna upa dou sangaji ede salalo aka kota Dan. 15 Ta ede la Abram cenggana dou-douna ade pila-pila kalompo, sawa'u b̄a ede, deina musu d̄i wakatu aimangad̄i ro kakoana siad̄oho, edempara cocona musu ede sampe aka Hoba ta sab̄ae d̄a b̄a kota Damsyik. 16 La Abram weha mbalina la Lut lab̄o ntau ro warana ro dou-dou siwe ro dou-dou ra taha makalaina.
La Melkisedek Barekana La Abram
17 Sawa'u b̄a kakoana Sangaji Kedorlaomer lab̄o sangaji-sangaji ma kasama weki lab̄o sia, la Abram dula mbalina. Edempara sangaji Sodom lao weha aona la Abram d̄i So Syawe d̄ipehe rau kai So Sangaji. 18 La Melkisedek, sangaji Salem ro ma ndad̄i Imam ma karawi wea d̄i ru'u b̄a Allah Ta'ala Ma Wancu D̄ese Ro Ntasa, sia wa'ana roti ro oi anggo d̄i ru'u b̄a la Abram, 19 edempara barekana la Abram, nggahina, <<Raho-raho to'i mpa Allah Ta'ala Ma Wancu D̄ese Ro Ntasa ma rakandad̄ina langi ro dana, barekana nggomi! 20 D̄ese Ro Ntasara Allah Ta'ala Ma Wancu Na'e Ro Ntoru, ma wa'ura mbei nggomi ngolu ra d̄i musu-musumu.>> Sawa'u b̄a ede, la Abram mbeina d̄i la Melkisedek saru'u ade ra cengga sampuru d̄i sara'a ntau ro wara ra weha mbalina ra d̄i musu.
21 Edempara nggahira sangaji Sodom d̄i la Abram, <<Wehapu barang-barangmu ede, pala tangawa to'ipu b̄ali d̄i nahu sara'a dou-dou nahu.>>
22 Pala cambe b̄a la Abram, <<Nahu masumpa d̄i tando RUMA, Allah Ta'ala Ma Wancu D̄ese Ro Ntasa, ma rakandad̄ina langi ro dana 23 b̄a one nahu wati d̄imaweha au-au rau ntaumu, kone salela kafa atao sadompo ai sanda rau wati. Kai ndedena nggomi wati loamu nggahi, <Nahuku ma rakandad̄ina la Abram ntau ro wara.> 24 Nahu wati ne'eku weha au-au rau d̄i ru'u b̄a ndaiku. Nahu d̄imatarima ao, au ra wa'u kani b̄a dou-douku. Pala co'opu lenga-lenga nahu eded̄u la Aner, Eskol ro la Mamre, wehana ru'u cua-cua ndaid̄ohona.>>