La Abram Ro La Lut
13
La Abram tu'u wi'ina Mesir ro lao d̄a-na ta ncai ma lao aka dana ro rasa Negeb, ta sab̄ae d̄o b̄a dana ro rasa Kanaan lab̄o weina ro wa'a rauna la Lut lab̄o sara'a ntau ro warana. 2 La Abram na'ipiku ntau ro warana; sia nantau mboto jimba, mbe'e, capi, masa ro salaka. 3 Ndad̄i sia tu'u wi'ina sab̄ua hid̄i lao aka hid̄i ma kalai, ndad̄i sia ronggana aka sab̄ua dana ro rasa d̄i hela kota Betel ro kota Ai, d̄i hid̄i ede ntoina sia ratu'una kema, 4 ro tu'una mezbah. Ta ede sia nembana RUMA.5 La Lut rau nantau kema ndaina, iwa ro weki lab̄o ada-ada ro jimba, mbe'e ro capina. 6 B̄ara ndedena dana ta ede watid̄u ncihi wali mporina d̄ingaha binata ntadi siad̄oho, b̄a one binata ntadi siad̄oho na'ipiku mbotona. 7 Edempara ndad̄ira cence ncihi d̄i weki dou-dou ma'ompukai binata ntadi ntau la Abram ro dou-dou ma'ompukai binata ntadi ntau la Lut. D̄i wakatu ede dou Kanaan ro dou Feris mbuipu ngge'ekaina dana ede.
8 La Abram nggahina d̄i la Lut, <<Ndai ake laina dou makalai, wati tahona nggara dou-dou makarawi d̄i nggomi ro dou-dou makarawi d̄i nahu cua cence ncihina. 9 B̄ara ndedena, satahona ndai ta ngge'e ncengga. Kad̄alepu wela b̄ena d̄i dana ake d̄ine'e b̄a nggomi. Nggara nggomi makad̄alesi wela ake, nahu d̄imalao ta wela aka.>>
10 La Lut ntanda hekona ro edana b̄a one sara'a So ma wara d̄i sanaru Yordan salalo aka kota Zoar mboto oina, b̄une nggaro Firdaus,z Atao b̄une dana Mesir. Ndedeku ka'ada'ana sawatipu kaleli b̄a RUMA kota Sodom ro Gomora. 11 Ndad̄i la Lut kad̄ale sara'ana so ma wara d̄i kengge So Yordan ede, edempara sia laona ta wela elena. Ndedeku siad̄oho lao ngge'e ncenggana. 12 La Abram ngge'e mpa midina d̄i dana Kanaan, pala la Lut nangge'e ndanda rero d̄eni lab̄o kota-kota ma wara d̄i so sanaru sori Yordan sampe d̄eni lab̄o kota Sodom. 13 Kota Sodom ede ngge'ekai b̄a dou-dou ma wancu dab̄ae ro ma dosa d̄i RUMA.
La Abram Lao Ngge'e Pesona Weki Aka Hebron
14 Sawa'u b̄a lao la Lut, nggahira RUMA d̄i la Abram, <<D̄i hid̄i kid̄ikaimu ake, ntanda kab̄aepu d̄i sara'a welana; 15 Nahu d̄imambei d̄i nggomi ro d̄i londo ro maimu, sara'a dana ra eda b̄a nggomi ede ndad̄i ntau nggomi santoi-ntoina. 16 Nahu d̄imambei d̄i nggomi londo ro mai ma wancu mboto, ndad̄ina wati wara kone sab̄ua dou rau ma wa'una reke siad̄oho. B̄une dou ma wati wa'una reke kalub̄u d̄i dana, ndede rauku londo ro maimu wati wa'u d̄ireke. 17 Ake, lampa heko tiopu d̄i sara'a dana ake, b̄a one Nahu d̄imambeina d̄i nggomi.>> 18 Sawa'u b̄a ede, la Abram hanta wa'ana kemana, edempara ngge'e impina d̄eni lab̄o fu'u-fu'u haju na'e ma karama, hid̄i sambea ro ibadakai d̄i Mamre d̄eni lab̄o kota Hebron ro ta ede sia tu'una mezbah d̄i ru'u b̄a RUMA.