Allah Ta'ala Ouna La Abram
12
Nggahira RUMA d̄i la Abram, <<Tu'u wi'ipu dana ro rasamu, iwa ro wekimu ro uma amamu ro laopu aka dana ro rasa d̄ituru tei b̄a Nahu d̄i nggomi. 2 Nahu d̄imambei nggomi londo ro mai ma mboto ro siad̄oho d̄imandad̄i bangsa ma na'e. Nahu d̄imabareka nggomi ro Nahu d̄imakambouna ngaramu, ndad̄ina nggomi d̄imakamaina bareka d̄i ru'u b̄a sara'a dou.3 Nahu d̄imabarekana dou-dou ma bareka nggomi,
ro ma b̄a'a dou-dou ma sumpa ka'iha nggomi.
Ro b̄ara nggomi,
Nahu d̄imabarekana sara'a bangsa d̄i dunia.>>y
4-5 La Abram umuna pidu mpuru lima mba'a wakatu sia tu'u wi'ina kota Haran, b̄une ra parentakai b̄a RUMA d̄i sia. La Abram laona aka dana Kanaan sama-sama lab̄o la Sarai weina ro la Lut ana tato'ina ro sara'a ntau ro warana lab̄o ada-ada ra raka b̄a siad̄oho d̄i kota Haran.
Sawa'u b̄a siad̄oho ronggana d̄i dana ro rasa Kanaan, 6 la Abram lampa kalilina dana ro rasa ede sampe ronggana aka fu'u haju na'e ma karama d̄i More, eded̄u hid̄i sambea ro ibadakai dou-dou dana ro rasa Sikhem. <Wakatu ede dou Kanaan mbuipu ngge'ekaina dana ro rasa Sikhem ede.> 7 RUMA katadana weki d̄i la Abram ro nggahi-Na d̄i sia, <<Akeku dana ro rasa d̄i mbei b̄a Nahu d̄i ru'u londo ro maimu.>> Edempara la Abram tu'una sab̄ua mezbah ta ede d̄i ru'u RUMA ma wa'ura katada weki d̄i sia. 8 Sawa'u b̄a ede, sia lampa lao d̄o walina, aka dana ro rasa d̄i doro-doro ta sab̄ae ele b̄a kota Betel ro siad̄oho tu'una kema d̄i hela Betel lab̄o kota Ai: Kota Betel ta wela d̄i-na ro kota Ai ta wela elena, ro ta ede rau sia tu'una mezbah ro nembana RUMA. 9 Edempara sia tu'u wi'ina hid̄i ede ro laona aka dana ro rasa Negeb, aka wela d̄o-na dana ro rasa Kanaan.
La Abram D̄i Mesir
10 Wakatu ede d̄i Kanaan wunga b̄oha b̄a bala hid̄o, ndad̄ina la Abram lao ngge'e pesona weki aka Mesir kai dou lai rasa sampe denggana bala hid̄o ede. 11 D̄i wakatu sia wunga ne'ena lu'u d̄i dana ro rasa Mesir, nggahira sia d̄i weina la Sarai, <<Nggomi ake ntika. 12 Nggara na'edasi b̄a dou Mesir nggomi, siad̄oho d̄imanggahi b̄a one nggomi wei nahu, edempara nahu hade b̄a siad̄oho, pala nggomi wati d̄ihadena. 13 Ndad̄i satahona, nggomi nggahi ndake mpa b̄a one nggomi ari nahu, loakud̄u nahu wati d̄ihade b̄a siad̄oho ro natarima ao katahoku nahu b̄ara nggomi.>> 14 Ro ncihi romo, sawa'u b̄a la Abram lu'una d̄i dana ro rasa Mesir, dou Mesir edana b̄a one la Sarai nantika poda. 15 Pila-pila dou pagawe d̄i asi sangaji edana la Sarai, edempara ngoana d̄i sangaji Mesir nawancuku ntikana dou siwe ede; b̄ara ndedena siad̄oho lao wa'ana la Sarai aka asi sangaji Mesir. 16 B̄a one sangaji mabu adena d̄i la Sarai, ndad̄ina sangaji Mesir ede tarima ao katahona la Abram ro mbeina d̄i sia ada-ada, mboto jimba ro mbe'e, capi, keledai ro mboto onta.
17 B̄ara sangaji Mesir wehana la Sarai, RUMA kamaina bala supu ma samangikai ade d̄i sangaji Mesir ro d̄i dou-dou d̄i ade asina. 18 Edempara sangaji ouna la Abram ro sod̄ina sia, <<Au ra karawi b̄a nggomi d̄i nahu ake? B̄ab̄auku nggomi wati ngoa kantirikaimu nahu b̄a one sia weimu? 19 B̄ab̄auku nggomi nggahikaimu b̄a one sia arimu ro co'omu nahu maweha sia ndad̄i wei nahu? Ake weimu; wehapu ro laora!>> 20 Edempara Sangaji Mesir parentana d̄i pagawe-pagawena, siad̄oho lao otona la Abram losa d̄i dana ro rasa ede sama-sama lab̄o weina ro sara'a ntau ro warana.