Menara Babel
11
Aipu sarambakaina bangsa-bangsa d̄i dunia sab̄ua mpa bahasa ro sentuna. 2 Wakatu siad̄oho laona ta sab̄ae ele-na, ronggara siad̄oho d̄i sab̄ua dana ma piri d̄i Babilonia, edempara ngge'e impina ta ede. 3 Siad̄oho nggahina d̄i sab̄ua dou lab̄o ma kalaina, <<Mai ndai tandawiku parasad̄a ma ipi taho.>> Ndedeku siad̄oho rakakaina parasad̄a d̄itu'ukaina uma ro rakana mina dana d̄ikandapokaina. 4 Nggahi siad̄oho, <<Mai ndai tatu'uku kota lab̄o sab̄ua menara ma sumpuna saraka ese langi, loakud̄u ndai mbou poda ro wati d̄imambari mbura d̄i dunia.>>5 Ndad̄i londora RUMA d̄imatio kota ro menara ra tu'u b̄a manusia. 6 Edempara nggahira, RUMA,<<Siad̄oho ake sab̄ua bangsana ro ake siad̄oho ampona tampu'u karawi. Wati ntoi walina siad̄oho nawa'uku kalampa au ra kane'e b̄a siad̄oho. 7 Satahona Ndai talondo ro takakacoku bahasa siad̄oho loakud̄u siad̄oho wati loana ka'ao wali nggahi sab̄ua dou lab̄o ma kalaina.>> 8 Ndedeku RUMA kambari mburana siad̄oho d̄i dunia. Edempara denggara siad̄oho tu'u kota ede. 9 B̄ara ndedena kota ede tangarakai Babel,x b̄ara ta ede RUMA kakacona bahasa sara'a bangsa ro ta ede siad̄oho kambari mbura b̄a RUMA d̄i dunia.
Londo Ro Mai La Sem
<1Taw. 1:24-27>
10 Akeku londo ro mai la Sem. D̄ua mba'a sawa'u b̄a mbere lino, wakatu la Sem umuna 100 mba'a, ro sia mbuipu rakana sab̄ua dou ana mone ngarana la Arpakhsad. 11 Sawa'u b̄a ede, la Sem mbuipu morina 500 mba'a wali ro sia mbuipu raka walina ana-ana ma kalai.
12 D̄i wakatu la Arpakhsad umuna tolu mpuru lima mba'a, sia rakana ana mone ngarana la Selah. 13 Sawa'u b̄a ede, la Arpakhsad mbuipu morina 403 mba'a wali ro sia mbuipu rakana ana-ana mone ro ana siwe.
14 D̄i wakatu la Selah umuna tolu mpuru mba'a, sia rakana ana mone, ngarana la Eber. 15 Sawa'u b̄a ede, la Selah mbuipu morina 403 mba'a wali ro sia mbuipu rakana ana-ana ma kalai.
16 D̄i wakatu la Eber umuna tolu mpuru upa mba'a, sia rakana ana mone, ngarana la Peleg. 17 Sawa'u b̄a ede, la Eber mbuipu morina 430 mba'a wali ro sia mbuipu rakana ana-ana ma kalai.
18 D̄i wakatu la Peleg umuna tolu mpuru mba'a, sia rakana ana mone, ngarana la Rehu. 19 Sawa'u b̄a ede, la Peleg mbuipu morina 209 mba'a wali ro sia mbuipu rakana ana-ana ma kalai.
20 D̄i wakatu la Rehu umuna tolu mpuru d̄ua mba'a, sia rakana ana mone, ngarana la Serug. 21 Sawa'u b̄a ede, la Rehu mbuipu morina 207 mba'a wali ro sia mbuipu rakana ana-ana ma kalai.
22 D̄i wakatu la Serug umuna tolu mpuru mba'a, sia rakana ana mone, ngarana la Nahor. 23 Sawa'u b̄a ede, la Serug mbuipu morina 200 mba'a wali ro sia mbuipu rakana ana-ana ma kalai.
24 D̄i wakatu la Nahor umuna d̄ua mpuru ciwi mba'a, sia rakana ana mone, ngarana la Terah. 25 Sawa'u b̄a ede, la Nahor mbuipu morina 119 mba'a wali ro sia mbuipu rakana ana-ana ma kalai.
26 Sawa'u b̄a la Terah umuna pidu mpuru mba'a, sia rakana tolu dou ana mone, eded̄u la Abram, Nahor ro la Haran.
Londo Ro Mai La Terah
27 Akeku londo ro mai la Terah: la Terah ama la Abram, Nahor ro la Haran. La Haran nantau ana mone tangarakaina la Lut. 28 La Haran madena d̄i kampo ro mporo ndaina, eded̄u d̄i dana ro rasa Ur d̄i Babilonia, wakatu mbuipu mori amana. 29-30 La Abram nikana lab̄o la Sarai, pala la Sarai nambonggi ro la Nahor nikana lab̄o la Milka ana siwe la Haran. La Haran mbuipu rakana ana mone makalai, ngarana la Yiska.
31 La Terah tu'u wi'ina kota Ur d̄i Babilonia lao sama-samana lab̄o la Abram anana, la Sarai ridona, eded̄u wei la Abram, ro la Lut, ompu b̄a la Terah. Sia nane'e lao aka dana ro rasa Kanaan. Pala sawa'u b̄a ronggana d̄i kota Haran, siad̄oho ngge'e impina ta ede. 32 Ro d̄i hid̄i ede rau la Terah madena wakatu umuna 205 mba'a.