Londo Ro Mai La Ibrahim Lab̄o Weina Ma Kalai
<1Taw. 1:32-33>
25
La Ibrahim nika walina lab̄o sab̄ua dou siwe, ngarana la Ketura. 2 Weina ede ngganana ana ma ngara: la Zimran, Yoksan, Medan, Midian, Isybak, ro la Suah. 3 La Yoksan ama la Syeba ro la Dedan ro londo ro mai la Dedan eded̄u dou Asyur, Letus ro dou Leum. 4 Ana-ana la Midian eded̄u la Efa, Efer, Henokh, Abida ro la Eldaa. Siad̄oho sara'ana londo ro mai la Ketura.5 Konena la Ibrahim mbei sara'ana ntau ro warana d̄i la Ishak, 6 pala aipu morina sia mboto mbeina ntau ro warana d̄i ana-anana lab̄o wei-weina ma kalai. Edempara sia kauna anad̄ohona ede ngge'e peso weki ta wela ele b̄a Kanaan loakud̄u kad̄o'ona weki d̄i la Ishak.
La Ibrahim Madena
7-8 La Ibrahim made wakatu umuna wa'ura tua poda, eded̄u 175 mba'a. 9 Sia ra'umbu b̄a anad̄ohona eded̄u la Ishak ro la Ismail, d̄i karombo Makhpela aka oma ta wela ele b̄a Mamre. Ntoina oma ede ntau la Efron ana la Zohar, dou Het, 10 pala wa'ura weli b̄a la Ibrahim d̄i dou Het ede. La Sara, wei la Ibrahim, ra'umbu ta ede rau. 11 Sawa'u b̄a made la Ibrahim, Allah Ta'ala barekana la Ishak, ana la Ibrahim. D̄i wakatu ede la lshak ngge'e d̄eni lab̄o temba d̄ipehekai <<Sia ma ntanda ro eda nahu>>
Londo Ro Mai La Ismail
<1Taw. 1:28-31>
12 La Ismail eded̄u ana la Ibrahim lab̄o weina la Hajar, dou siwe Mesir, ada la Sara. 13-16 La Ismail nantau sampuru d̄ua anana d̄ipehe ta ake b̄atu rawarakai siad̄oho: la Nebayot, Kedar, Adbeel, Mibsam, Misyma, Duma, Masa, Hadad, Tema, Yetur, Nafis, ro la Kedma. Dou-dou edeku mandad̄i ama b̄a wa'i ro waro b̄a sampuru d̄ua suku bangsa, ro kampo ro mporo ngge'ekai siad̄oho d̄ipehekai b̄atu b̄une ngara ndai siad̄oho. 17 La Ismail madena wakutu sia umuna 137 mba'a. 18 Londo ro maina ngge'e d̄i dana ro rasa d̄i hela d̄ua b̄a Hawila ro Syur ta wela ele b̄a Mesir ma lao aka Asyur. Siad̄oho wati ngge'e samana lab̄o londo ro mai la Ibrahim ma kalai.
La Esau Ro La Yakub
19 Akeku lao caritana la Ishak ana la Ibrahim. 20 La Ishak umuna upa mpuru mba'a wakatu sia nikana lab̄o la Ribka, amancawa la Laban, ana la Betuel, dou Aram kota Mesopotamia. 21 B̄a one la Ribka wati ngge'epu ntauna ana, b̄ara ndedena la Ishak do'a rahona d̄i RUMA d̄i ru'u b̄a weina. Ro RUMA cambena do'a la Ishak. Edempara la Ribka na'e lokona. 22 Sia na'e lokona ro na'iuku wara d̄ua dou ma ruku ro ma pole angi ade lokona. Nggahi la Ribka d̄ei adena, <<B̄ab̄auku lampa rawi ake pab̄uaku ndad̄ina d̄i weki ndai nahu?>> Edempara sia do'a rahona d̄i RUMA.
23 Nggahira RUMA d̄i sia,
<<D̄ua bangsa wara d̄ei lokomu;
nggomi d̄imanggana d̄ua bangsa ma cua musu angi;
arina nancewi tenggo ntewikaisi sa'ena
ro ana ma sasa'ena d̄imandad̄i ada arina.>>
24 Rakara wakatuna ngganakai la Ribka ro sia ngganana d̄ua dou ana mone. 25 Ma sasa'e sarumbuna nasakala-kala ro hurina b̄une jumba ma nggambi. B̄ara ndedena, sia tangarakai la Esau.u 26 Wakatu losa anana ma kad̄uakaina, rima anana ede nentina tini la Esau. B̄ara ndedena, sia tangarakai la Yakub.v la Ishak umuna ini mpuru mba'a wakatu rangganakai anad̄ohona.
La Esau Landana Hak Sasa'ekaina
27 Dambe to'i d̄uana ede nanaha na'era. La Esau mandad̄i dou ma ngau nggalo ro naca'u ngge'e d̄i so ro sera, pala la Yakub tabe'ana wati mboto nuntuna ro naca'u midi d̄i uma. 28 La Ishak na'ipipu mecina la Esau, b̄a one la Ishak naca'u ngaha hi'i ranggalo. Pala la Ribka na'ipipu mecina la Yakub.
29 D̄i sab̄ua ainaina, wakatu la Yakub wunga lowina isi b̄ue kala, dulara la Esau ra d̄inggalokaina. Sia na'ipiku hid̄ona. 30 Nggahi la Esau d̄i la Yakub, <<Nahu wa'ura hid̄o poda. Mbei to'ipu nahu satoi isi kaca ma kala-kala ede.>> <B̄ara ndedena sia d̄ipehekai Edom.>w
31 Cambe b̄a la Yakub, <<Io taho, sura nggomi mbei wa'umu hakmu kai ana sasa'ekaimu!>>
32 Nggahi la Esau, <<D̄i aukaiku hak ede. Nahu kaipi poda hid̄oku!>>
33 Nggahi wali la Yakub, <<Sumpa wa'upu b̄a one nggomi d̄imambei hakmu ede d̄i nahu.>>