Allah Ta'ala Sakena D̄i La Nuh
9
Allah Ta'ala barekana la Nuh ro anad̄ohona ro nggahi-Na, <<Ngganapu ana ro ompu ma mboto loakud̄u londo ro maimu ngge'e kab̄inina dunia. 2 Sara'a nasi ma ngemo ro uta ma mori ade oi, ro binata daro ro ma rama nadahu d̄i nggomi. Sara'a binata ede, nggomi d̄imakab̄ua ro d̄imasandakana. 3 Samenana ede loa d̄ingaha b̄a nggomi, ndede rau ro'o-ro'o haju ma moro; ede rau d̄imbei b̄a Nahu d̄i nggomi. 4 Sab̄ua mpa ma wati loa d̄ingaha b̄a nggomid̄oho eded̄u hi'i ma mbuipu wara ra'ana, b̄a one nawa wara ade ra'a ede. 5 Sanikina dou atao binata ma b̄oho ra'a manusia, sia rau d̄ib̄oho b̄a Nahu ra'ana. 6 B̄a one Manusia rakandad̄i sapahu b̄une ndai Nahu; b̄ara ndedena, cou-cou ma b̄oho ra'a manusia, ndai sia rau d̄ib̄oho b̄a dou ra'ana.7 Nggomid̄oho pab̄uapu ngganamu ana ro ompu ma mboto, loakud̄u londo ro maimu d̄imangge'e kab̄ini dunia.
8 Nggahira Allah Ta'ala d̄i la Nuh ro d̄i anad̄ohona, 9 <<Ake Nahu masake d̄i nggomid̄oho ro d̄i londo ro maimu, 10 ro d̄i sara'a mahluk ma mori, eded̄u sara'a nasi ro sara'a binata ma mori d̄i dunia, sara'a ma ralosa ade lopi ede ma sama-sama lab̄o nggomid̄oho. 11 Akeku sake Nahu d̄i nggomid̄oho: Nahu masake b̄a one samenana mahluk ma mori wati d̄ikaleli wali b̄a mbere lino. Wati d̄imawara wali mbere lino ma kaleli dunia ake. 12 D̄ikatandakai sake ma ede ro hid̄i, ra sake b̄a Nahu d̄i nggomid̄oho ro d̄i sara'a mahluk ma mori, 13 ndad̄i Nahu matohona afi ala d̄i apu d̄imandad̄i tanda sake Nahu lab̄o dunia. 14 Nggara b̄ontosi b̄a Nahu langi kai apu, afi ala ede d̄imatada, 15 Nahu d̄imakawara au ra sake b̄a Nahu d̄i nggomid̄oho ro d̄i samenana mahluk ma mori, eded̄u b̄a one mbere lino wati d̄imakaleli wali samenana ma mori. 16 Nggara natadasi afi ala d̄i apu, Nahu d̄ima'eda ro d̄imakawara sake ma ede ro hid̄i ra ndawi b̄a Nahu lab̄o sara'a mahluk ma mori d̄i dunia. 17 Edeku tandana ra sake b̄a Nahu d̄i sara'a mahluk ma mori d̄i dunia.>>
La Nuh Ro Anad̄ohona
18 Ana-ana la Nuh ma ra losa d̄i lopi ede, eded̄u la Sem, Ham, ro la Yafet. La Ham eded̄u ama b̄a la Kanaan. 19 Ana la Nuh ma tolu dou ede, mandad̄i wa'i ro waro b̄a samenana dou d̄i dunia.
20 La Nuh eded̄u dou makanggihi ro siaku ma saramba-rambakaina ma ndawi nggaro anggo. 21 Sawa'u b̄a la Nuh nonona oi anggo, edempara sia mawuna. Ndad̄i la Nuh runcu sara'ana kani ro lombona, edempara maru rondana d̄i ade kemana. 22 Wakatu la Ham ama b̄a la Kanaan, edana b̄a one amana ma maru ronda, sia losa ro ngoana au ra edana ede d̄i la Sem ro la Yafet. 23 Edempara la Sem lab̄o la Yafet wehana sando'o jumba ro wirana d̄i d̄inca siad̄oho, edempara siad̄oho lampa suruna, lu'una ade kema ede ro b̄ontona amana kai jumba ede, ro siad̄oho pesona pahuna loakud̄u wati edana amana ma maru ronda ede. 24 Sawa'u b̄a la Nuh kawarana weki b̄ara mawuna ro b̄adena au ra karawi b̄a anana la Ham d̄i ndai sia, 25 ndad̄i nggahira la Nuh,
<<Ihara la Kanaan!
Sia d̄imandad̄i ada ma ipi tuna ro b̄awa d̄i ru'u b̄a cina ro angid̄ohona.
26 D̄ese ro ntasara ngara RUMA, Allah Ta'ala la Sem!
La Kanaan d̄imandad̄i ada la Sem.
27 Raho-raho to'i mpa Allah Ta'ala sala'i walina bareka d̄i la Yafetv Kai kapaja weana hid̄i ngge'ekaina.
Raho-raho to'i mpa londo ro mai la Yafet ngge'e sama-samana lab̄o londo ro mai la Sem.
La Kanaan d̄imandad̄i ada la Yafet.>>