Nggorina Mbere Lino
8
Allah Ta'ala wati nefana la Nuh ro sara'a binata ma wara sama-sama lab̄o sia ade lopi ede. Allah Ta'ala kamaina angi d̄i dunia d̄imakalondona oi mbere lino ede. 2 Sara'a mada oi ta awa dana ro oi ma mai ese mai ta langi b̄onto b̄a Allah Ta'ala, ndad̄i denggara ura, 3 ro oi nanaha londo. Sawa'u b̄a 150 nai oi watid̄u ipi ese walina. 4 D̄i ainaina kasampuru pidu wura kapidukaina, lopi ede ntanggana d̄i wawo doro Ararat. 5 Oi nanaha londo wali ro d̄i ainaina sarambakaina wura sampuru, wawo-wawo doro natampu'ura tadana.6 Sawa'u b̄a upa mpuru nai, la Nuh henggana sab̄ua tantonga lopi ede, 7 ro horina sab̄ua nasi garaha. Nasi ede ngemo rerona sampe kara mbere lino ede. 8 D̄iloakaina b̄ade sab̄ua oi ede poda-poda wa'ura londo, la Nuh horina sab̄ua nasi dara. 9 Pala nasi dara ede wati rakana hid̄i d̄intu'ukaina, b̄a one oi mbuipu esena. Ndad̄i nasi ede lao ngemo mbalina aka lopi; la Nuh d̄alana rimana, edempara wa'a kalu'una nasi ede ade lopi. 10 Sawa'u b̄a ede, la Nuh ngenana pidu nai wali, edempara hori walina nasi dara ede. 11 D̄i aimambia nasi ede dula mbalina d̄i sia, ro wa'ana salela ro'o zaitun ma ngodu kai asana. Ake la Nuh nab̄adera b̄a one oi wa'ura kara. 12 Sawa'u b̄a ngenana pidu nai wali, sia hori walina nasi dara ede; ro nasi dara ede wati dula mbalina d̄i sia.
13 D̄i wakatu la Nuh umuna 601 mba'a, ainaina ma sarambakaina, d̄i wura ma sarambakai, oi wa'ura kara poda. La Nuh henggana b̄utu lopi ede ro ntanda hekona, sia edana b̄a one wawo dana wa'ura tampu'u mango. 14 D̄i ainaina d̄ua mpuru pidu wura kad̄uakaina, sara'a dana wa'ura mango.
15 Edempara nggahira Allah Ta'ala d̄i la Nuh, 16 <<Losara d̄i lopi ede sama-sama lab̄o weimu, anad̄ohomu ro wei anad̄ohomu. 17 Wa'a kalosa sara'apu nasi ro binata ma kalai, nataho ma mau, ro ma daro loakud̄u nggana ro nggina kab̄inina dunia.>> 18 Edempara la Nuh losana ade lopi ede sama-sama lab̄o weina, anad̄ohona lab̄o wei anad̄ohona. 19 Sara'a nasi ro binata ma wara ade lopi ede, losa mena cua-cua kalompo ndaina.
La Nuh D̄onggo Ro Mbeina Koroba D̄i RUMA
20 La Nuh tu'una sab̄ua mezbah d̄i ru'u b̄a RUMA, edempara wehana sab̄ua ade sanikina pahu nasi ro binata ma halal, sawa'u b̄a ede ka'ana binata-binata ede ese wawo mezbah d̄id̄onggo ro mbeikaina d̄i RUMA. 21 Ngolo koroba ede nakasanaku ade RUMA ro nggahira RUMA d̄i weki ndai-Na, <<Nahu wati d̄imahukum wali dunia ake b̄ara rawi manusia; Nahu kab̄ade b̄a one ra'aipu to'i wa'una fiki ro kananu manusia ede dab̄ae. Nahu wati d̄imakaleli walina sara'a mahluk ma mori b̄une ra wa'u karawi b̄a Nahu ake. 22 Santoi dunia ake mbuipu warana, d̄imawara ncau wakatu nggud̄a ro wakatu wehakai hasi, oru b̄usi ro oru pana, oru mpana ro oru ura, aimarai ro aimangad̄i.>>