Mbere Lino
7
Sawa'u b̄a ede, nggahira RUMA d̄i la Nuh, <<Eda b̄a Nahu b̄a one nggomi mpa dou ma kalampa au ra kane'ekai b̄a Nahu d̄i dunia ake. Ndad̄i, lu'upu d̄i ade lopi ede sama-sama lab̄o weimu, sara'a anamu ro wei anad̄ohomu. 2-3 Wa'a raupu pidu mbua ma rangga ro pidu mbua ma siwe d̄i sanikina pahu nasi ro binata makalai ma halal, pala ma haram sab̄ua ma rangga lab̄o sab̄ua ma siwe mpa ade saniki pahu binata. Kalampapu ede loakud̄u d̄isanikina pahu binata wara ma salama wakatu ndad̄i mbere lino ede ro naloa nggana ro nggina wali d̄i dunia. 4 Pidu nai wali, Nahu d̄imakalondona ura ma wati d̄imadengga-dengga upa mpuru nai aimarai aimangad̄i ntoina loakud̄u leli sara'ana mahluk ma mori ra wa'u kandad̄i b̄a Nahu.>> 5 Edempara la Nuh kalampa sara'ana au ra parentakai b̄a RUMA d̄i sia.6 La Nuh umuna 600 mba'a wakatu ndad̄i mbere lino d̄i dunia. 7 La Nuh ro weina ro anad̄ohona ro wei anad̄ohona, lu'una ade lopi ede d̄ikasalamakaina weki b̄ara mbere lino. 8 Sab̄ua ma rangga lab̄o sab̄ua ma siwe d̄isanikina pahu nasi ro binata ma kalaina nataho ma halal ro ma haram, 9 ma lu'u ade lopi ede sama-sama lab̄o la Nuh, b̄une ra parentakai b̄a Allah Ta'ala. 10 Pidu nai sawa'u b̄a ede maira mbere lino ma d̄imakalinona dunia.
11 Wakatu la Nuh umuna 600 mba'a, d̄i ainaina sampuru pidu wura kad̄uakaina, wotura mada-mada oi ta awa dana ro sara'a mada oi ma mai ese mai ta langi b̄une ralua, 12 ro b̄uara ura santoi upa mpuru nai aimarai aimangad̄i. 13 D̄i ainaina ede wa'u, la Nuh ro weina lu'u d̄i ade lopi ede sama-sama lab̄o tolu dou anana, eded̄u la Sem, Ham ro la Yafet lab̄o wei siad̄oho. 14 Sama-sama lab̄o siad̄oho lu'u rau ade lopi ede sanikina pahu nasi ro binata-binata ma kalaina, nataho ma mau, ro ma daro. 15 Sab̄ua ma rangga ro sab̄ua ma siwe ade sanikina pahu mahluk ma mori lu'u d̄i ade lopi ede sama-sama lab̄o la Nuh, 16 b̄une ra parentakai b̄a Allah Ta'ala d̄i sia. Sawa'u b̄a lu'u sara'ana d̄i ade lopi, RUMA kempana tad̄a lopi ede.
17 Mbere lino ede maina upa mpuru nai ntoina ro oi ndad̄i ese, edempara lopi ede natampu'ura karente. 18 Oi nanaha ese ro lopi ede nakarente ese wawo oi. 19 Oi ede nanaha ese wali, ndad̄i nakakoluku doro-doro ma ipi d̄ese d̄i dunia. 20 Oi nanaha teka ntuwu sampe pidu mete ese mai b̄a wawo-wawo doro. 21-23 RUMA kaleli sara'ana mahluk ma mori d̄i dunia ake; Manusia, saniki pahu nasi ro binata-binata makalaina nataho ma mau, ro ma daro. Ma wati iha leli eded̄u la Nuh ro sara'a ma wara sama-sama lab̄o sia ta ade lopi ede. 24 Oi ede wati kara-karana 150 nai ntoina.