Dab̄aena Manusia
6
Sawa'u b̄a manusia nanaha mboto d̄i dunia ro ngganana ana-ana siwe, 2 mahluk-mahluk sarogat edana b̄a one dou-dou siwe sampela ana manusia ede nantika-ntika. Edempara siad̄oho nikana lab̄o dou-dou siwe sampela d̄ica'u b̄a siad̄oho. 3 Ndad̄i nggahira RUMA, <<Nahu wati kauku manusia mori santoi-ntoina; siad̄oho mahluk ma mori samporo, d̄imapab̄ua made. Tampu'u ake umu siad̄oho wati d̄imancewi 120 mba'a.>> 4 D̄i jaman ede ro sawa'u b̄a jaman ede rau, wara dou-dou ranggasasa d̄i dunia. Siad̄oho ranggana b̄a dou-dou siwe ma ranika lab̄o mahluk-mahluk saroga. Dou-dou ranggasasa ede eded̄u pahlawan-pahlawan ma mbou d̄i jaman mantoi.5 Wakatu eda b̄a RUMA b̄a one nawancuku dab̄aena ruku ro rawi, fiki ro kananu dou-dou d̄i dunia; 6 RUMA sinci adena b̄ara wa'ura kandad̄ina siad̄oho ro wi'ina siad̄oho d̄i dunia. RUMA nawancuku ncoki adena, 7 ndad̄i nggahira RUMA, <<Nahu D̄imakalelina ro d̄imakamborana manusia ra kandad̄i b̄a Nahu ede d̄i wawo dunia ake ro sara'a nasi ro binata ma kalaina, Nahu sinci adeku wa'ura kandad̄iku siad̄oho.>> 8 Pala la Nuh nakasanaku ade RUMA.
La Nuh
9-10 Akeku caritana mab̄oha la Nuh. Sia nantau tolu dou ana mone, eded̄u la Sem, Ham ro la Yafet. La Nuh nato'a ro nab̄atu au ra parentakai b̄a RUMA ro sia mpa dou ma taho d̄i jaman ede. 11 Pala sara'a dou ma kalai nadab̄ae d̄i'eda b̄a Allah Ta'ala, ro ruku ro rawi ma dab̄ae wara ta b̄e-b̄e. 12 Allah Ta'ala ntanda kab̄aena dunia ede ro edana rawi ma dab̄ae mpa, sara'a manusia dab̄ae morina.
13 Edempara nggahira Allah Ta'ala d̄i la Nuh, <<Wa'ura katantu b̄a Nahu b̄a one Nahu d̄imakalelina ro d̄imakambora sara'a mahluk. Nahu d̄imakamborana siad̄oho lab̄o dunia b̄ara dunia wa'ura b̄ini b̄a rawi dab̄ae manusia. 14 Ndawipu sab̄ua lopi d̄i ru'umu kai haju ma tenggo, ndawi raupu b̄ili-b̄ili ta d̄eina ro petakaipu mina ter ta d̄ei ro ta arina. 15 Lopi ede pab̄uaku naruna 133 mete, lembona d̄ua mpuru d̄ua mete ro d̄esena sampuru tolu mete. 16 Ndawipu b̄utu lopi ede ro ndawipu helana upa mpuru upa senti mete hela b̄utunau lab̄o d̄indi-d̄indina. Ndawipu lopi ede tolu tingka ro ndawipu sab̄ua tad̄a d̄i welana. 17 Nahu d̄imakamaina mbere lino d̄imakaleli sara'ana mahluk ma mori d̄i dunia. Sara'ana ma wara d̄i dunia d̄imamade, 18 pala Nahu lab̄o nggomi d̄imandawi sake. Nggomi lu'upu ade lopi ede lab̄o weimu ro anad̄ohomu lab̄o wei siad̄oho. 19-20 Kalu'u raupu ade lopi ede sab̄ua ma rangga ro sab̄ua ma siwe d̄i saniki pahu nasi ro binata ma kalaina, loakud̄u binata-binata ede wati lelina. 21 Kab̄oro ro wa'a raupu saniki pahu ngaha ro nono d̄ingaha nggomid̄oho ro d̄i ru'u b̄a binata-binata ede>>. 22 La Nuh kalampa sara'ana au ra parentakai b̄a Allah Ta'ala d̄i sia.