6
हे भाई मन, आवरी कोनी मुनुक कोनी अपराध न्र धरा गले तेबे तमि जोन आत्मिक आहास, नम्रता र संगे असन के सम्भाला, आवरी आपना बले चोकसी सोंगाहा की तमि बले परीक्षा ने ना पोड़ा | 2 तमि एक दूसरा र बोझ उठाहा, आवरी इ परकार मसीह र व्यस्था के पूरा करा | 3 कसन बलले अगर कोनी काई ना होयले बले आपना के काई समझूआय तेबे आपना के धोका देऊ आय | 4 मातर सबु लोक आपना ची काम के जांचा, आवरी तेबे दुसर र बारे ने नाई मातर आपना र ची बारे ने हांके घमण्ड करबार अवसर होयसी | 5 कसन बलले सबु मुनुक आपना र ची बोझ उठायसी | 6 जोन वचन र शिक्षा पाउआत, हांय सबु अच्छा तिज ने सिखायबा लोक के भागी करोत | 7 धोका ना खाहा, मापरू ठट्टा ना उड़ाया जाउआय, कसन बलले मुनुक जोन काई बोउआय हांई काटूआय | 8 कसन बलले जोन आपना र देह काचे बोउआय, हांय देह र दवारा बिनास र कटनी काठसी ; आवरी जोन आतमा काचे बोउआय, हांय आतमा र दवारा अनंत जीवन र कटनी काठसी | 9 हामि भला काम करबा ने साहस ना छाडू, कसन बलले हामि ढीला ना होंऊ तेबे ठीक समेया ने कटनी काटबु | 10 इ काचे जोन बले अवसर मिरो हामि सबु र संगे भलाई करबू, विशेस करी बिसबासी भाई मन संगे | 11 दका मुय कसन बड़े बड़े अक्षर ने तमके आपना हाथ ले लिकली आचे | 12 जोन लोक शारीरिक दिखावा चाह्बात हांय मन ची तमर खतना करयबा काचे दबावडालू आत, केवल इ काचे की हांय मसीह र कुरूस र कारन सताये जाओत | 13 कसन ब्ली खतना करबाबिता खुद तो व्यस्था ले ना चले, मातर तमर खतना इ काचे करायबाय चाह्बात की तमर देह र दसा उपरे घमण्ड करोत | 14 मातर असन ना हो की मुय दूसरा कोनी गोट र घमण्ड कारबी, खाली हामर परभू यीशु मसीह र कुरूस र जांहार दवारा सोंसार मोर नजर ने आवरी मुय सोंसार र नजर ने कुरूस उपरे चड़ाय गली आची | 15 कसन बलले ना खतना ना खतना नौयला काई काय, मातर नया पुरती | 16 जतक ई नियम उपरे चलबाय हांय उपरे, आवरी मापरू र इस्रायल उपरे शान्ती आवरी दया होयते रओ | 17 आगे के कोनी मोके दुःख ना देओत मुय यीशु र दाग के आपना देह ने धरी फिरूआंय | 18 हे भाई मन, हामर पराभू र यीशु मसीह र अनुग्रह तमर आतमा संगे रहो | आमीन |