8
मातर यीशु जैतून र डोंगरी उपरे गला | 2 सकरीया हाय फेर मंदिर ने आसला; सबू लोक उसके पास आये आवरी हाय बोसिकरी तिके उपदेश देयके मुरायला | 3 तेबे शास्त्री आवरी फरिशी गोटक बायले के आनलाय जोन बेभिचार ने धरा पोड़ी रये, आवरी हाके मंजी ने ठिया करी यीशु के बललाय, 4 “हे गुरु, ये बायले बेभिचार करते धरा पोडला आचे | 5 नियम ने मूसा हामके आगया देला आचे की असन बायले मन उपरे पकना पोकाहा | ए काजे तूय ए बायले र बारे ने काय बोलबीयास ?” 6 हायमन हाके परकबा काजे ये गोट बललाय की हातार उपरे काई दोष पाओत | मातर यीशु लोइकरी अन्डकी ले भुई ने लिकके मुरायला | 7 जड़ दाय हाय मन टेक पूछते ची रलाय, तेबे हाय सीदा होइकरी हाय मन के बलला, “तोमि मन ले जोन काई पाप ना करलार आचे, हाय आगे हाके पकना मारो |” 8 आवरी फेर लोइकरी भुई उपरे अंडकी ले लिक के मुरायला | 9 मातर हायमन ये सुनिकरी बड़े ले धरी करी शुरू लोक तक,गोटक गोटक करी निकरलाय,आवरी यीशु एकला ची रला, आवरी बायले हाई थाने मंजी ने ठिया उठी रई गला| 10 यीशु सीदा होयिकरी टेक बलला, “हे बायले, हाय मन केने गलाय ? काय कोनि तोके दंड र आगया ना देलाय ?” 11 हाय बलला, “हे परभु, कोनि ची नाई |” यीशु बलला, “मुय बले तोर उपरे दंड र आज्ञा ना देई: जा, आवरी फेर ले पाप ना कर |”] 12 यीशु मसि लोक मन के बलला, “ सवसार र उजर मुय आय: जोन मोर पिटी बाटे होयसी हाय अन्दारे ना हिंडे, मातर जीवन र उजर पायसी |” 13 फरिशी मन ताके बललाय, “तूय आपना गवाई खुद देउआस, तोर गवाई ठीक नुआय |” 14 यीशु तिके जवाब देला, “भले मुय आपनार गवाई आपनी देउआय, फेर बले मोर गवाई ठीक आय, कसन बलले मुय जानी की मुय कोनति ले आयली आची आवरी कोन थाने जाउआय ? मातर तोमि ना जानास की मुय कोंती ले आउआय आउर कोन ति जाउआय | 15 तोमि गागर र असन नियाय करुआस: मुय कहारी नियाय ना करी | 16 आवरी जसन मुय नियाय करले ची बले, मोर नियाय सत आय: कसन की मुय एकला नुआय, मातर मुय आवरी बुआ आव जोन मोके पटायला आचे | 17 तमर नियम ने बले लिकला आचे की दूय झनर गवाई मिसिकरी अच्छा होऊ आय: 18 गोटक तो मुय खुद आपनार गवाई देउआय, आवरी दुसर बुआ मोर गवाई देउआय जोन मोके पटायला आचे |” 19 हायमन हाके बल लाय तोर बुआ कोन लगे आचे ?” यीशु जवाब देला, “ना तोमि मोके जानास, ना मोर बुआ के, आवरी मोके जानतास तो मोर बुआ के बले जानतास |” 20 ये गोट हाय मंदिर ने उपदेश देबा दाय भण्डार घर ने बल ला आवरी कोनि ताके ना धरलाय, कसन बल ले हतर बेरा एबे ले ना होई रये | 21 हांय पाचे ताके बलला “ मुय जानबी आची आवरी तोमि मोकेडगरायबा आस आवरी आपना पाप ने मोरबास; जोन थाने मूय जाऊ आय हांय थाने तोमि ना आयके सकास |” 22 ई काचे यहूदी मन बललाय “ काय ये आपना र निज के मारी पोकायसी, जोन बलुआय, ‘ जोन थाने मूय जाऊ आय हांय थाने तोमि ना जायके सकास’?” 23 हांय तिके बलला “तोमि तलर आस, मूय उपर र आय; तोमि सोसार र आस मूय सोसार र नुआय | 24 ई काचे मूय तोमके बालली की तोमि आपना र पाप ने मोरबास, कसन की अगर तोमि बिसबास ना करास की मूय हाई आय तो आपना पाप ने मोरबास |” 25 हांय मन ताके बललाय, “तूय कोन आस ?” यीशु तिके बलला, “ हाई आय जोन मुरले तोमके बलते आयली आची | 26 तोमर बारे ने मोके खूबे काई बलबार आवरी निर्णय करबार आय; मातर मोर पटायला बिता सत आय, आवरी जोन मूय हांय थानले सुनली आची हाई सोसार ने बलु आय |” 27 ये मन हांय ना समझेत की हामर थाने बाबा बारे ने बलसी आचे | 28 तेबे यीशु बलला, “ जड़ दाय तोमि मुनुकर बेटा के उपरे चेगायबास तेबे जानबास की मुय हाई आय, मुय आपना निज ले काई ना करी मातर जसन मोर बाबा सीखायला असनी ची ये गोट बलबी आची | 29 मोर पटायबा बिता मोर संगे आचे: हांय मोके एकला ना छाड़ला कसन की मुय सबू दाय हाई काम ‘करू आय जोन थानले हाय हरिक होऊ आय |” 30 हांय ये गोट के बलते ची रला खूबे ने हातार उपरे बिसबास करलाय | 31 एबे यीशु हांय यहूदी मनर जोन मन हांय उपरे बिसबास करी रयेत बललाय,” अगर तोमि मोर बचन ने बनी रु आस, तो सते मोर चेला होयबास | 32 तोमि सत के जानबास, आवरी सत तोमके छाड़ायसी |” 33 हांय मन हाके जबाब देलाय, “ हामी तो अब्राहम र बंस र आव, आवरी केबी काहरी दास ना होयले |आवरी तूय कसन बलबी आस की तोमि चाडाय होई जीबास ?” 34 यीशु तिके जबाब देला, “मुय तोमके सत सत बल बी आची की जोन कोनी पाप करुआय हाय पाप र दास आय | 35 दास सबू घर ने ना रये; बेटा सबू दाय रहाय | 36 इ काजे अगर बेटा तोमके चाडायसी, तेबे सते तोमि चाडाय होई जिबास | 37 मुय जानबी आची की तोमि अबराहम र बस ले आस; तेबे मोर बचन तोमर हिरदय ने जगा ना पाए, इ काजे तोमि मोके मारबा काजे होयबास | 38 मुय इ बलबी आची, जोन आपना बाबा के ए थाने द्क्ला आचे; आवरी तोमि हाई करते रहूआस जोन तोमि आपना बाबा ले सुनलास |” 39 हाय मन ताके जवाब देलाय, “हामर बाबा तो अबराहम आय |” यीशु तिके बलला, “ अगर तोमि अबराहम र बेटा होय तास, तेबे अबराहम र असन काम करतास | 40 मातर एबे तोमि मुय जसन मुनूक मारबा काजे होयबास,जोन तोमके हाय सत बचन सुनायला जोन महापरबू ले सुनला; असनि तो अबराहम ना करी रये | 41 तोमि आपना बाबा र असन काम करुआस |” हाय मन हाके बल लाय, “हामी बेभिचार ले ना जनमु, हामर गोटकी बाबा आय जसन की महापरभु |” 42 यीशु तिके बल ला, “अगर महापरबू तमर बाबा होयता, तेबे तोमि मोके माया करतास; जसन की मुय महापरबू बाटल आयली आची | मुय निज ले ना आयली, मातर हाई मोके पटायला| 43 तोमि मोर गोट के कसन ना समझास ? इ काजे की तोमि मोर बचन सुनके ना सकास | 44 तोमि आपना बाबा शैतान ले आस आवरी आपना बाबा र लालच के पूरा करबार चाहायबास | हाय तो मुर ले हत्यारा आय आवरी सत उपरे मनडी ना रये, कसन की सत हाय थाने नियाय | जड़ दाय हाय झूट बोलुआय, तेबे आपना स्वभाव ले ची बोलुआय; कसन की हाय झुटा आय मातर झुट र बाबा आय | 45 मातर मुय जोन सत बोलुआय, इ काजे तोमि मोर बिसवास ना करास | 46 तमर ठान ले कोन मोके पापी ठेबाउआय ? अगर मुय सत बोलुआय तेबे तोमि मोर बिसवास कसन ना करास ? 47 जोन महापरबू ले होऊआय, हाय महापरबू र गोट के सुनुआय; आवरी तोमि इ काजे ना सुनास की महापरबू र बात ले नुआस,” 48 ए सुनी यहूदी मन ताके बल लाय, “काय हामी ठीक ना बोलबू आचू की तूय सामरी आस, आवरी तोर थाने भुत आत्मा आचे ?” 49 यीशु जवाब देला, “मोर थाने भुत आत्मा नियाय; मातर मुय आपना बाबा र मान करुआय, आवरी तोमि मोर ना मान करुआस | 50 मातर मुय आपना प्रतिसठा ना चाहायी; हां, गोटक आय जोन चाहाउआय आवरी निआय करुआय | 51 मुय तोमके सत सत बलबी आची की अगर कोनि मुनूक मोर बचन ने चल सी, तेबे हाय जूग जूग र काल ले मुरतु के ना दके |” 52 यहूदी मन हाके बल लाय, “ एबे हामी जानलू की तोर थाने भुत आत्मा आचे | अबराहम मोरी गला, आवरी अगम गियानी बले मोरी गलाय, आवरी तूय बलबी आस, “अगर कोनी मोर बचन उपरे चलुआय हाय जूग जूग र काल ले मुरतु र सुआद के ना चाके |’ 53 हामर बाबा अबराहम तो मोरला | काय तूय हातार ले बड़े आस ?”आवरी अगम गियानी मन बले मोरी गलाय तूय आपना के काय ठेबायबी आस ?” 54 यीशु जवाब देला, “अगर मुय आपना र ची महिमा कारबी, तो मोर महिमा काई नुआय, मातर मोर महिमा करबा बिता मोर बाब आय, जोनके तोमि बोलुआस की हाय तमर महापरबू आय | 55 तोमि तो हाके ना जनास; मातर मुय हाके जानी | अगर मुय बल बी की मुय हाके ना जनि, तो मुय तमर असन झुटा ठेबाय जीबी; मातर मुय हाके जानी आवरी हातार बचन उपरे चलबी आची | 56 तमर बाबा अबराहम मोर दी दकबा काजे आसा ले खूबे मंगन रये; आवरी हाय दकला आउर हरिक होयला |” 57 यहूदी मन हाके बललाय, “एबे तूय पचास बरस र नियास, आवरी बले तूय अबराहम के दकलिआस ?” 58 यीशु तिके बलला, “ मुय तमके सते सते बलबी आची, की आगे एतार की अबराहम जनमला, मुय आय |” 59 तेबे हाय मन हाके मारबा काजे पकना उटायला , मातर यीशु लुकी करी मंदिर ले निकरी गला |