7
ए गोटर पाचे यीशु गलील ने बुलते रये: कसन बलले यहूदी मन हाके मारबा काजे कोशिश करते रयेत, इ काजे हाय यहूदिया ने बुलबार ना चाहयते रये 2 यहूदी मनर लाड़ी मनर परब लगे रये | 3 ए काजे हातार भाई मन हाके बललाय, “ इतिले यहूदिया ने जा, की जोन काम तूय करुआस हाय के तोर चेला मन हाय थाने बले दकोत | 4 कसन बलले असन कोनि ना होएत जोन छोमे आयबारचाहाऊआय आवरी लुकी करी काम करबार चाहाऊआय | आवरी तूय ये काम करुआस आले आपना के सवसार ने दकाव |” 5 कसन बलले आपनार भाई बले हतार उपरे बिसवास ना करते रयेत | 6 तेबे यीशु टिके बलला, “मोर बेरा एबले ना आसला आचे, मातर तमर काजे सबू बेरा आचे| 7 सवसार तोमके बैर ना करके सके, मातर हाय मोके बैर करुआय कसन बलले मुय हातार बिरुद्ध ने ये गवाई देऊआय की हातार काम अडरा आय | 8 तोमि परब ने जाहा: मुय एबे ए परब ने ना जाई, कसन बलले मोर बेरा पूरा ना होयला आचे |” 9 हाय तिके ये गोट बोलिकरी गलील ने ची गला | 10 मातर जड़दाय हातार भाई मन परब ने जाई रयेत तेबे हाय खुद बले, दकाय होयबार नाई मातर ढाकि होयिकरी गला | 11 यहूदी परब ने ताके ए बोली करी डगराय के मुरायलाय, “हाय कोनति आचे?” 12 आवरी लोक मन भीतरे हातार बारे ने लुकी लुकी करी खूबे गोट होयला: कटक लोक बलते रयेत, “हाय भला मुनूक आय |” आवरी कटक लोक बलते रयेत, “नाई, हाय लोक मन के भरमाउआय |” 13 तेबे बले यहूदी मनर डर काजे कोनि लोक हातार बारे ने खुली करी ना बलते रयेत | 14 जड़दाय परब आधा दिन बीती गला: तेबे यीशु मंदिर ने जाई करी उपदेश करके मुरायला | 15 तेबे यहूदी मन चकित होई करी बललाय, “ एके ना पोड़लार बिद्या कसन ने आसला?” 16 यीशु तिके के जवाब देला, “ मोर उपदेश मोर नुआय मातर मोके पटायबा बिता र आय | 17 आवरी कोनि हातार इच्छा ने चलबा काजे चाहांयसी आचे तो हाय ये उपदेश र बारे ने जानसी की हाय महा परभु र बाटले आय की आपनार बाटले आय | 18 जोन आपना बाटले काई बलुआय, हाय आपनार ची बढाई चाहाऊआय: मातर जोन आपनार पटायबा बितार बढाई चाहाउआय हाई सते आय, आवरी हाके अधरम नियाय | 19 काय मूसा तोमके नियम ना देला ? तेबे बले तोमि मन ले कोनी नियम ने ना चलास | तोमि काय काजे मोके मारबा काजे चाहाय बास ?” 20 लोक मन जवाब देलाय, “तोर उपरे भुत आत्मा आचे | कोन तोके मारबार काजे चाहायसी आचे ?” 21 यीशु तिके जवाब देला, “मुय गोटक काम करली, आवरी तोमि सबू आचरित होयबास| 22 इ काजे मूसा तोमके खतना र आज्ञा देला आचे ( ये नाई की हाय मूसा र बाटले आय मातर बाप दादा ले चलते आयसी आचे ), आवरी तोमि सबत र दिने मुनूक र खतना करुआस| 23 जड़दाय सबत र दिने मुनूक र खतना करा जाऊ आय जसन की मूसा र कानून र आगया टली ना जाओ, तेबे तोमि मोर उपरे काय काजे इ काजे रिस होऊआस की मुय सबत र दिने गोटक मुनूक के छुक छुका ले अच्छा करली | 24 मुह दकिकरी निआव ना करा, मातर ठीक ठीक निआय करा |” 25 तेबे कतक येरुस्लेम ने रबा लोक बलके मुराय लाय, “काय ये हाई नुआय जाके मारबा र कोशिश करा जायसी आचे ? 26 मातर दका, हाय तो खुल्ला खुल्ला गोटायसी आचे आवरी कोनी ताके काय ची ना बलेत | काय मुखिया मन सत सत के जानलात की ये मसि आय ? 27 एके तो हामी जानू की ये कोन ति र आय: मातर मसि जड़दाय आयसी तो कोनी ना जानेत की हाय कोनति र आय |” 28 तेबे यीशु मंदिर ने उपदेश दबा दाय बलला, “तोमि मोके जानस, आवरी ये बले जानस की मुय कोनति र आय | मुय तो आपना ले ना आसली आची, मातर मोके पटायबा बिता सते आय, हाके तोमि ना जनास | 29 मुय ताके जानी कसन बलले मुय हातार बाट ले आय आवरी हाय ची मोके पटायला आचे |” 30 ए उपरे हायमन हाके धरबार चायलाय, तेबे बले कोनी हातार उपरे हाथ ना डाललाय कसन बलले तार बेरा एब ले ना आई रये | 31 फेर बले भीड़ थान ले खूबे असन लोक हातार उपरे बिसवास करलाय, आवरी बलके मुरायलाय, “मसि जड़दाय आयसी तेबे काय एतार ले खूबे चीन चमत्कार दकायसी जोन ए दकाय रये ?” 32 फरिशी मन लोक के तिकर बारे ने ये गोट लुकाय लुकाय करते सुनलाय; आवरी बड़े याजक आवरी फरिशी मन हाके धरबा काजे पलटन पटायला | 33 ये थाने यीशु बल ला, “मुय खिनिक बेर ले आवरी तोमर संगे आची, तेबे आपना पटायबा बिता लगे जयते जीबी | 34 तोमि मोके दकबास , मातर ना पा आस; आवरी जोन थाने मुय आची, हाय थाने तोमि ना आसके सकास |” 35 ये थाने यहूदी मन एक दुसर के बल लाय, “ये कोन ति जायसी आचे की हामी एके ना पाऊ ? काय ये तिकर लगे जाउआय जोन यूनानी मन ने जतखत होई करी रबात, आवरी यूनानी मन के बले उपदेश देउआय ? 36 ए काय गोट आय जोन हाय बलला, की मोके डगरायबास मातर ना पास,आवरी जोन थाने मुय आची हाय थाने तोमि ना आसके सकास’ ?” 37 परब र सरला दिने, जोन छोम र दिन आय, यीशु ठिया होयला आवरी कोलार होई करी बलला, “अगर कोनि पियासा आचोत तो मोर लगे आसोत आवरी पियोत | 38 जोन मोर उपरे बिसवास करसी, जसन पवित्र शास्त्र ने आयला आचे, “तिकर हिरदय ले जीवन र पानी र नदी बोई निकारसी’|” 39 हाय ये बचन पवित्र आत्मार बारे ने बलला, जाके हातार उपरे बिसवास करबा बिता पाय बार रये; जसन की आत्मा एबे ले ना उतरी रये, कसन की यीशु एबे ले आपना महिमा के न पहुचाय रये | 40 तेबे भीड़ ले कोनि कोनि ये गोट सुनिकरी बललाय, “सते ए हाई अगम गियानी आय |” 41 दुसर बल लाय, “ये मसि आय |” मातर कोनि बल लाय, “कायकाजे ? काय मसि गलील ले आयसी ? 42 काय पवित्र शास्त्र ने ये ना आयला की मसि दाउद र बस ले आवरी बेतलहम गाव ले आयसी, जोन थाने दाउद राजा रये?” 43 इ काजे हातार लागी लोक मन भीतरे फूट होयला | 44 हायमन ने कतक हाके धरायबार चाहायते रओत, मातर कोनि हातार उपरे हाथ डाल के ना सकलाय | 45 तेबे पुलिस मन बड़े मुखिया मन आवरी फरिशी मन लगे बहाडलाय; हायमन तिके बललाय, “तोमि कायकाजे हाके ना आनलास?” 46 पुलिस मन जवाब देलाय, “कोनि मुनूक केबी असन गोट मन ना गोटाय रये |” 47 फरिशी मन ताके जवाब देलाय, “काय तोमि बले भरमाय गला आस ? 48 काय मुखिया मन नोयले फरिशी मन ले कोनि बले तार उपरे विस्वास ना करलाय ? 49 मातर ये लोक जोन नियम के ना जानेत, शापित आत |” 50 निकुदेमुस, जोन आगे हातार लगे आई रये आवरी हाय मन ले गोटक रये, तिकर ले बलला, 51 “काय हामर नियम कोनि मुनूक के,जड़दाय ले आगे हातार सुनिकरी जनि ना रओ की हायकाय करुआय,दोषी ठेबुआय ?” 52 हायमन हाके जवाब देलाय, “काय तूय बले गलील र आस ? डगराव आवरी दक की गलील ले कोनि अगम गियानदका ना देओ |” 53 [ तेबे सबू लोक आपना आपना घरे गलाय |