7
ईसु, लोक के ए सबु गोट के सांगी सरायलार पाचे, कपरनहूम सहरे गला। 2 हांय सहरे, गोटोक, पलटनर मुकिया रला; आवरी हांय, जांके जोन कमेया के कुबे मया करते रला; हांय कमेया कुबे बेमार होयीकरी मोरबा अमता होयी रला। 3 हांय पलटन मुकिया, ईसुर इसाब ने सुनके, ईसु आसीकरी मोर कमेया के अचा करी देवो बोली एहूदीमनर कोनी कोनी सियानमन के, ईसु लगे गुहारबा काजे पोटायला। 4 तेबे हांयमन ईसु लगे आसीकरी हांके कुबे गुहारलाय आवरीए “ऐ मुकिया तोर सायता पायबार लइक आय; 5 कसनबलले, हांय हांमर लोक के मया करूवाय आवरी हांयची हांमर काजे गोटोक पारतना-गुड़ी बांदी देला आचे।” बोललाय 6 तेबे ईसु तिकर संगे गला; आवरी हांय तार गर लग अमरबाके, पलटनर मुकिया तार संगर लोक के ईसु लगे पोटायला आवरी “ए परबु, मोर गरे आयबा काजे तकलिस ना हो, कसन बलले, तुय मोर गरे आयबार, अतक लइकर मुंय न आंय; 7 एतारी लागी, मुंय तोर लगे आयबार बले लइकर आपन के ना समजली; मातर गोटोक गोट बोली देस; तेबे मोर कमेया अचा होयी जायसी। 8 आवरी तुय बोलले, असनी होयसी बोली मुंय जानी; कसन बलले, मंुय बले दुसरर हक आची, आवरी मोर तले सिपईमन आचेत। मुंय गोटोक के ‘जा’ बोलले हांय जाउआय; आवरी दुसर के ‘आव’ बलले हांय आयसी; आवरी मोर कमेया के एके कर बालले हांय, हांयटाके करसी“ बोली सांगबा काजे बोलला। 9 एके सुनीकरी ईसु अचरित होयला आवरी हांय आपना पीटी-पीटी आयते रला लोकर-रासी के दकीकरी बोलला, मुंय तोमके सांगबी आची, इसरायेल ने बले मुंय अमता बिसबास करबा लोक के ना दकली आची। 10 तेबे पलटन मुकिया पोटाय रला लोक गरे बाहड़ीकरी, कमेया चेंग-चेंगा होयलाटाके दकलाय। 11 हांतार पाचे ईसु, नाईन बोलबा गोटोक सहरे गला; तार संगे हांतार चेलामन आवरी कुबे लोक गलाय। 12 ईसुु, सहरर कपाट लगे अमरलादाय, लोक, गोटोक मोड़ी के बोंयीकरी आनते रलाय, जोन हांतार आयार गोटकी पिला रला; आवरी हांय बायले रांडी रला। आवरी सहरर कुबे लोक हांय बायलेर संगे रलाय। 13 ताके दकीकरी, परबु के तार काजे जीव दुकला आवरी ताके बोलला, “ना कांद।” 14 पाचे ईसु, लगे जायीकरी टरंडी के चिंयला आवरी बोयला लोक टेबलाय; आवरी हांय बोलला, “ए जुवान, मुंय तोके बोलबी आची, ऊट।” 15 तेबे, हांय मोरला, माने उटी बसला आवरी गोटायके मुरायला; पाचे हांय ताके हांतार आया के सोपी देला। 16 अड़किदाय, सबु लोक के डर चेपायला; आवरी हांयमन महाप्रूर जय-जय करी बोललाय, “हांमर मंजिगता गोटोक बड़े अंतरजानी आयला आचे! आवरी “महाप्रू, आपनार लोक, हांमके, सायता करबा काजे आयला आचे।“ 17 ईसु करला ए गोट, सबु एहूदा ने आवरी आलीपालीर सबु परगन ने गोरी होयला। 18 ए सबु होयला गोटमन के, एहूना बपतिस्मा देबा बितार चेलामन जायीकरी एहूना के सांगलाय। तेबे हांय आपना चेलामन ले दुय लोक के हाग-देयीकरी बोलला, 19 तोमी परबु लगे जायीकरी “आयबा बिता तुय आस नोयले हांमी कोनी दुसरर बाट दकबाराय?“ बोली पोचारबा काजे पोटायला। 20 तेबे हांयमनईसु लगे आसीकरी, “आयबा बिता तुय आस नोयले हामी कोनी दुसरर बाट दकबारआय ? बोली पोचारबा काजे एहूना बपतिस्मा देबा बीता हामके तोर लगे पोटायला आचे।“ बोली बोललाय। 21 अडकिदाय, ईसु कुबे लोक के तिकर बेमार ले, दुका-सुका ले आवरी बूत दरला तानले, चुकचुका करला आवरी कुबे काना लोक के आकी दकायला। 22 आवरी हांय तिकर उतारे बोलला, “तोमी जायीकरी दकलाटा आवरी सुनलाटा के एहूना के सांगा। काना लोक दकबा आत, कोड़िया लोक हिड़बा आत, बड़े - रोग ने रला लोक चुकचुका होयबा आत, बइरामन सुनबा आत, मोरला लोक जीव पड़बा आत, आवरी गरीब लोक नंगत गोट के सुनबा आत; 23 आवरी मोर लागी, जोन आपनार बिसबास के पने हाने जायके ना देये, हांय बाइमानी आय। 24 एहूना पोटायला लोक गलार पाचे, ईसु एहूनार इसाब ने लोक लगे गोटायके मुरायला, “तोमी चिमचाम-बाटा ने कायटाके दकके जायी रलास ? काय लेहरा ले हालबा लाटा के दकके जायी रलास ? 25 नोयले काय दकके जायी रलास ? काय गुलगुला पटई पींदला माने के दकके जायी रलास ? चकमक पटई पींदीकरी सवकारर-जीवना जीयबा लोक, राजार गरे रऊवात। 26 नोयले काय क दकके जायी रलास ? काय अंतरजानी बिता के ? हव, मुंय तोमके बोलबी आची, अंतरजानी बिता ले बले एहूना बड़े आय। 27 “दका, मुंय आपना दूत के चोर चोमे पोटायबी, हांय तोर चोमे जायीकरी तोर बाट के तियार करसी“ बोली दरम सासतर ने लिकलारटा एतार इसाबनेची आय। 28 मुंय तोमके बोलबी आची, बायलेमन तानले जलमला लोक ले, एहूना ले बड़े कोनी नु आत। तेबले बले, महाप्रूर राज ने, जोन हिनसता आय, हांय एहूना ले बले बड़े आय।” 29 तेबे एहुनार सिकया के सुनला सबु लोक आवरी पटी दरूमन, तार लगले बपतिस्मा दरलाय आवरी महाप्रू के सत बिता आय बोली मानलाय। 30 मातर, परीसीमन आवरी सासतर-पंडीतमन आपना काजे, महाप्रूर मन-करलाटाके बाकनलाय आवरी एहूना ले बपतिस्मा ना दरलाय। 31 एके बोलीकरी ईसु बोलला, “मुंय ए जुगर लोक के, काहार संगे कटारबी ? हांयमन काहार असन आत ? 32 हांयमन हाटे बसीकरी एक दुसर के दकीकरी, “हांमी तोमर काजे मोहरी पुकलु, तोमी ना नाचलास; हांमी ओपारलु, तोमी ना कांदलास।“ बोली बोलबा पिला-टोकी असन आत। 33 एके मुंय एतारी काजे सांगबी आची, कसनबलले, एहूना बपतिस्मा देबा बिता, रोटी ना कायबा माने आवरी रस ना पीयबा माने असन आयबाके तोमी, “ताके बूत दरला आचे बोली बोललास।” 34 मातर मुनुसर-बेटा मुंय, कायबा पीयबा बिता असन आयली; तेबे तोमी, ‘दका ए माने, कावरा आवरी मतवार, पटी दरबा लोक आवरी पापीमनर संगवारी आय बोली बोलबा आस!’ 35 तेबले बले महाप्रू के मानबा लोक, तार गियान सत आय बोली मानबा आत। 36 गोटोक परीसी, ईसु के आपना संगे कायबा काजे हाग-देला तेबे हांय, परीसी गरे जायीकरी कायबा काजे बसला। 37 हांय सहरे, गोटोक पापी बायले, ईसु परीसीर गरे कायबा काजे बसला आचे बोलते सुनी करी, कुबे माहरग पोकना बोतल ताने बासना तेल के आनला; 38 आवरी ईसुर पीटी बाटे हांतार गोड़ लगे टिया होयीकरी, कांदी कांदी तार आंसु संगे हांतार गोड़ के बिजायीकरी, तार बाल संगे पोचके मुरायला; आवरी हंातार गोड़ के चुमला आवरी हांयताने बासना तेल के गसला। 39 तेबे, ईसु के हाग-देयी रला परीसी एके दकीकरी, “ए माने अंतरजानी होयीरले, हांके चिंयबा बिती कोन आय, कमता बायले आय आवरी ए पापी बायले आय बोलते जानता“ बोली आपना मने बिचार करला। 40 एके जानीकरी ईसु ताके बोलला, “ए सिमान, मुंय तोके गोटोक गोट संागबार आय। “तेबे हांय “ए गुरू, संागा।“ बोलला। 41 तेबे ईसु बोलला, “कोनी लागा देवु बिता लगे, दुय लोक लागा लागी रलाय; गोटोक पांच सव चांदिर रूपया आवरी दुसर पचार चांदिर रूपया। 42 हांयमन लागा चुटके ना सकबाके, लागा देवु हांय दुनोर तानले, लागा देवु के कोन कुबे मया करसी ?“ 43 तेबे सिमोन बोलला, “मोर इसाब ने, जांहार कुबे लगा मापी होयला, हांयची कुबे मया करसी“ तेबे ईसु, “तुय सते सांगलीस“ बोलला; 44 आवरी ईसु हांय बायले बाटे दकीकरी सिमोन के बोलला, “काय तुय ए बायले के दकबी आस ? मुंय तोर गरे आयली, तुय मोर गोड़ दोयबा काजे पानी बले ना देलीस; मातर ए मोर गोड़ के आंसु ले बिलायीकरी आपनार बाल संगे पोचला। 45 तुय मोके ना चुमलीस; मातर मुय आयलादाय ले ए मोर गोड़ के चुमबार न चाड़े। 46 तुय मोर मुंडे तेल ना लगायलीस; मातर ए मोर गोड़े बासना तेल के रोकायला। 47 एतारी काजे मुंय तोके बोलबी आची, एतार करला कुबे पाप मापी होयला। तेबे, ए कुबे मया करला; मातर जांहार किंडिक मापी होयला, हांय किंडिक मया करसी।“ 48 पाचे हांय, बायले के बोलला, “तोर सबु पाप मापी होयला।“ 49 तेबे हांतार संगे कायके बसी रला लोक, “ए माने पापीमन के बले मापी करसी आचे; ए कोन आय?“ बोली एक दुसर संगे कुसमुसके मुरायलाय। 50 मातर ईसु, बायले के दकीकरी, “तोर बिसवास तोके बचायला आचे; तुय असतिर ने जा“ बोली बोलला।