6
गोटोक सुसतायबा दिनं, ईसु बेड़ा बाटले जायते रलादाय, हांतार चेलामन केड़ के टुटायकरी हाते रमंदी-रमंदीकरी बिजा के कायते रलाय। 2 एके दकीकरी कतक परीसीमन बोललाय, ‘‘तोमी काय काजे असन बूता करबा आस, जाके सुसतायबा दिने करबार नगत नु आय?" 3 तेबे ईसु तार उतारे बोलला, ‘‘ दाऊद आवरी तार संगे रला लोक बूके रलादाय, हांय कर लाटाके काय तोमी दरम सासतर ने केबे ना पड़ला आस?" 4 हांय महाप्रूर गरे जायीकरी ओबगो महाप्रूर पूजारीमनर कायबा काजे चेगायलार रोटील के कायला आवरी तार संगवारीमन के पने देलाः,। 5 आवरी ईसु तीके बोलला, ‘‘मुनुसर-बेटा मुंय, सुसतायबा दिनर बले परबु आंय"। 6 पाचे, आवरी गोटोक सुसतायबा दिने, ईसु पारीतना-गुडी ताने जायीकारी सिकायते रला, हायताने बुजनी हात सुकलार गोटोक माने रला। 7 अडकिदाय, सासतर-पंडीतमन आवरी परीसीमन हांके दोस लगायबा काजे, सुसतायबा दिने, हांय ताके अचा करसी कसन बोलते दकते रलाय। 8 मातर ईसु तिकर बिचार के जानीकरी हांय सुकला हात माने के, ‘‘उटीकरी मंजिगता टिया हो" बोललाः, तेबे हाय उटीकरी टिंया होयला। 9 तेबे ईसु तीके बोलला, ‘‘मुंय तोमके पोचारबी आची, सुसतायबा दिने, काय करबार नुकु आय? नुकु करबार नोयले अडरा करबार, जीव के बाचायबार नुकु आय नोयले मोरायबार नुकु आय? 10 तेबे हांय सबु बाटे तीके दकीकरी हांय माने के ‘‘तोर हात के लोमाव" बोलला। तेबे हांय लोमायलाः, आवरी तार हात चेंगचेंगा होयला। 11 मातर परीसीमन आवरी सासतर-पंडीतमन रिसे होयलाय आवरी ईसु के कमता करबार आय बोलीकरी एक दुसर संगे गोट-बात करलाय। 12 . हांय दिनमनने, ईसु होंगरी ताने पारतना करबा काजे गला, आवरी राती गुला महाप्रू लगे पारतना करते रला। 13 दुसर दिने सकरिया पायबाके, हांय आपनार चेलामन के हाग देला आवरी हांयमन तानले बारा जन के बाचला। आवरी तीके अपोसतलमन बोलीकरी नांव देला। 14 आवरी हांयमन एमन आतः सिमोन (जांके ईसु, पतरस नांव देयी रला), हातार भाई अंदरियास, आवरी एकूब, एहुना पिलिपुस, बरतुलमय। 15 मती, तोमा, हलपईर बेटा एकूब, आवरी जेलोतेस बोलाय होयबा सिमोन। 16 . एकूबर बेटा एहूदा, आवरी एहूदा इसकरियोती, जोन ईसु के दराय देबा बिता होयला। 17 पाचे, ईसु तिकर संके डोंगरी तानले उतरीकरी ओसार बाटा ने दिया होयला। अडकिदाय, तार दुसर कुबे चेलामन आवरी एल्सलेम से आवरी एहुदार सबु बाट ले आवरी बड़े तरई रेटर सूर, सयदा सहर तानले आसी रला कुबे लोग-रासी हायताने रलाय। 18 हांयमन ईसुर गोट सुनबा काजे आावरी आपना बेमार ले चेग चेगा होयबा काजे आसी रलाय; आवरी ओसुद आतमा बाटले ड़ड पायला लोक बले आसीकरी चुंकचुका होयलाय; 19 आवरी सबु लोक हांके चीयबा काजे मन करलाय। कसनबलले हांतार बितर ले सामरत निकारीकरी हांयमन सबु के चुकचुका करते रला। 20 अडकिदाय, ईसु आपना चेलामन के दकीकरी बोलला, "गरीब रबा तोमी सबु बाइगमानी आस; कसनबलले महाप्रू-राजा तोमर होयसी। 21 एबे बुके रबा तोमी बाइगमनी आस; कसनबलले तोमी सबु के पूरते पायबास। ;;ऐबे कांदबा तोमी बाइगमनी आस; कसनबललेे तोमी हांसबास। 22 आवरी मुनुसर-बेटा मोर लागी ने, लोक तोमके कयर होयी बाकनीकरी तोमर इजित दरी तोमके अड़रा आस बोलादाय, तोमी बाइ्रगमनी आस। 23 लोक तोमके असन करबा दिने, तोमी हरिक-उदिम हुवा; कसनबलले सरग ने तोमी काजे एतार पालटा मिरसी। आवरी तिकरी दादी-पुरकामन बले, करलाय। 24 मातर सवकार रबा तोमके महाप्रू डंड देयसी; कसनबलले तोमी सबु के बोगीकरी सरायलास। 25 आवरी सबु के पालया तोमके महाप्रू डंड देयसी; कसनबलले तोमी बूके रबास। एबे हांसबा तोमके महाप्रू डंड देयसी ; कसलबलले, तोमी ओपारीकरी कांदबास। 26 आवरी सबु लोक तोमके अचा माने आय बोलाबादाय तोमके महाप्रू डंड देयसी; कसनबलले तिकर दादी पुरकामन, पंदी अंतरजानीमन के बले अचा लोक आत बोली बोललाय। 27 मातर मुंय, मोर गोट के सुनबा लोक तोमी सबु के बोलबी आची, तोमर सतरूमन के मया करा, तोमके कयर करबा लोक के दरम करा, 28 तोमके सरापबा लोक के बर दियास; आवरी तोमर हिनसता करबा लोक काजे पारतना करा। 29 जोन तोर गोटोक गाले तापड़ मारसी, तार लगे दुसर गाल के बले दकाय देस; आवरी जोन तोर चोंगा के नेयसी, ताके तोर कुड़वा के बले नेयके देस। 30 तोर लग ले मांगबा सबु लोक के तुई देस आवरी कोनी तोर जमक के नेयले हांय ताके हांतार लग ले ना मांग। 31 दुसर लोक तोमके काय करबार आय बोली तोमी मन-करबा आस; हांयचीटा के तोमी बले दुसर के करा। 32 आवरी तोमके मया करबा लोककची तोमी मया करले, तोमके काय लाब आय? पापी लोग आपना के मया करबा लोक के मया करबा आत। 33 आवरी तोमके धरम करबा लोककेची तोमी धरम करले, तोमके काय लाब आय? कसनबलले पापीमन बले असनीची करबा आत। 34 आवरी तोमके बाहडाय देयसी बोली सत करी तोमी लागा देयले, तोमर काय लाब आय ? कसनबलले, देलाटा सबु आवरी मिरसी बोलीकरी पापीमन बले दुसर पापीमन के लागा देबाआत। 35 मातर तोमर सतरू के मया करा, धरम करा देलाटा आवरी मिलसी बोलीकरी आसा, न रले बले लागा दियास; तेबे तोमके बड़े ईनाम मिरसी, आवरी तोमी सते महाप्रूर पिला-झिला आस बोलीकरी लोक जानबाय; कसनबलले हांय गुन ना गायबा लोक, आवरी अडरा लोक ऊपरे बले दया दकायसी आचे। 36 जसन तोमर सरगर बाबा दया दकासी आचे आसनी तोमी बले दया दकाहा। 37 आवरी दुसर लोक के दोसी ना टेबाहा; तेबे महाप्रूर ’ बले तोमके दोसी ना टेबाये। दुसर लोक के महाप्रू पालटा दरो बोली ना बोला; तेबे महाप्रू बले तोमर पालटा ना दरे। दुसर लोक के मापी करा; तेबे महाप्रूर बले तोमके मापी करसी। 38 आवरी दुसर लोक के दियास, तेबे महाप्रूर बले तोमके देयसी महाप्रू चापी चापी आवरी हालाय हालायकरी उचरोतले आचा नापीकरी तोमर कोरे रोकायसी। कसनबलले जोन नाप ने तोमी नापबास, हांयची नाम ले महाप्रू बले तेमर काजे नापसी। 39 आसनी बोलीकरी, ईसु तीके गोटोक सिकानी-कावनी के संागलाः " काय गोटोक काना माने दुसर काना माने के बाट दकायके सके? नाई असन करले दुनांे कोदरा ने गरसबाय। 40 कोनी चेला आपाना गुरू ले बड़े नु आय; मातर हांय सबु बाटर गियान के सिकलार पाचे आपनार गुरू असन होयसीं 41 काय काजे तुय आपना भाईर आकीर किटका के दकबी आस; मातर निजर आकीर कोटला के लेक ना करबीयास ? 42 तोर निजर आकीर कोटला के ना दकीकरी, कसनकरी तुय तोर भाई के ’ए बाइ, टेब तोर आकीर कीटका के निकराय देबी’ बोली सागके सकबीस। ए कपटी, आगे तोर निजर आकी तानले कोटला के निकराव; तेबे पाचे जोन किटका तोर भाईर आकी ने गला आच,हांयटाके नंगतत दकीकरी निकरायके सकबीस। 43 कोनी अचा गच, अडरा पाक ना देये; आवरी कोनी अडरा गच, अचा पाक ना देये। 44 सबु गच के तार पाक ले चितायके होयसी; कसनबलले लोक, काटा-लाटा तानले डुमर ना टुटायेत, आवरी बोरी बुटा ले अंगर न टुटायेत,। 45 असनी अचा लोक आपना मने सोंगायला नंगत गदिया ले, नंगत गोट के निकरायबाय; आवरी असनी अडरा लोक आपना मने सांेगायला अडरा गदिया ले अडरा गोट के निकरायबाय। कसनबलले, मने बरला गोट टोडें निकरूवाय। 46 तोमी मोर बोलबाटाके ना दरबा आस; तेबे काय कोज मोके ’परबु, परबु बोलबा आस ? 47 मोर लगे आसीकरी मोर गोटक के सुनीकरी तार असन करबा लोक काहार असन मत बोलीकरी मुंय। तोमके दकायबीः 48 मन पोकना ऊपरे कुबे गड़ीयां ले पाया कोड़ीकरी तार ऊपरे गर बांदला लोक असन आत; आवरी पूर आसीकरी, पानी हांय गरर ऊपरे टटाय होयलार पाचे पने, हांय गर के हालायके ना सकला। कसनबलले, हांयमन गर के चमकट ले बांदी रलाय। 49 मातर मोर गोट के सुनीकरी असनी ना कर बा लोक, बाली ऊपरे पाया कोड़ीकरी गर बांदला लोक असन आत; जड़कदाय पूर हांय गरर ऊपरे टटाय होयला; तेबे तुरते हांय गर बसड़ला आवरी चुकरे रूनचुन होयी गला।“