15
सकरेया पायते ची अड़की ची दाय बड़े याजक मन, जुना लोक मन;आवरी शास्त्री मन आवरी सबू बड़े सबा ने विचार करी यीशु के बांदाय लाय, आवरी हांके नेई करी पिलातुस र हाते सोपी देलाय |' 2 पिलातुस ताके पुछला, “काय तूय येहुदीयों मनर राजा आस ?” हांय ताके जबाब देला, “तूय खुदे ची बलबी आस |” 3 बड़े याजक हांके खुबे गोत र दोष लगायते रयेत | 4 पीलातुस ताके आवरी पचारला, काय तूय काई जबाब ना देईस, दक ये मन तोके कतक गोट र दोस लगायबा आत 5 यीशु आउरी काई जबाब ना देला;ए लग ले की पिलातुस के खुबे चकीत लागला | 6 पिलातुस हांय परब ने कोनी गोटक बंदी के जोनके हांय मन मया करते रयेत, तिकर काचे छाड़ी देयते रये | 7 बरबा नाव र गोटक मुनूक बलवा करबा लोक संगे बंदी रला, जोन मन के बलवा ने हतेया करी रला | 8 आऊरी भीड़ उपरे जाई करी हांय के बिनती करके धरला, की जसन तुय आमर काजे करते आयलि आस आसनी ची कर | 9 पिलातुस हांय मनके जबाब देला, “काय तमी चाहू आस की मुय तोमर काजे युहूदी मनर राजा के छाड़ी देबी ?” 10 कसन की ये जानते रये की बड़े याजक हांके कल-कल थान ले धराय रये| 11 मातर बड़े याजक लोक के चेगायला की हांय बरबा ची के हांतार काजे छाड़ी दियास | 12 हांय सूनी करी पिलातुस तिके आउर पचारला, “ तेबे जोन के तमी युहूदी मनर राजा बलूआस, हांके मुय काय कंरू आय ? ” 13 हांय मन आऊरी चीचायलाय, “ हांके कुरूस ने चेगाहां !” 14 पिलातुस तिके बलला, “ कसन, ये काय गलत करला आचे ?”मातर हांय मन आऊरी चीचाय लाय, “ हांके कुरूस ने चेगाहा !” 15 तेबे पिलातुस भीड़ के हरीक करबार मन ले, बरबा के तिकर काचे छाड़ी देला, आऊरी यीशु के कोड़ा ने माराय करी सोपी देला की कुरूस ने चेगाया जाओ | 16 सेना ताके गुफा भीतरे र दुआर ने नेलाय जोन पीरिटोयुम बलाय होऊ आय, आवरी सबू पलटन के हाग देई आनलाय | 17 तेबे हांय मन ताके बेन्जनी फटई पिनाय लाय आवरी काटा र मुकूट गुती करी तार मुंडे सोंगाय लाय, 18 आवरी ये बली करी ताके जुआर करके मुराय लाय, “ हे यहूदी मन र राजा, जुआर !” 19 . हांय मन तार मुंडे सरकंडे मारी, आवरी हांके थुकी, आवरी मांडी खुटा देई ताके जुआर करते रयेत | 20 जेबे हांय मन तार निदा करी सराय लाय, तो तार थान ले बेन्जनी फटई निकराय करी तार ची फटई पिन्दाय लाय; आवरी तेबे हांके कुरूस ने चेगाय बा काचे बाहरे नेलाय | 21 सिकन्दर आवरी रुफुसर बुआ शमोन, गोटक कुरेनी मुनूक, जोन गाँव ले आयते रला हांय बाटले निकरला ; हांय मन ताके बेगार ने धरलाय की तार कुरूस के उठाय नेओं | 22 हांय यीशु के गुलगुता नांव र जगा ने, जाहार अरत खोपड़ी र जगा आय, आनलाय | 23 हांयती ताके मुरर मिसाय ला दाख रस देयके मुराय लाय, मातर हांय ना धरला | 24 तेबे हांय मन ताके कुरूस ने चेगाय लाय आवरी तार फटई ने चिटटी मन सोंगाय करी, की काके काय मिरसी, हांय के बाट लाय | 25 आवरी गोटक पाहार दीन चेगी आयला, तेबे हांय मन ताके कुरूस ने चेगाय लाय | 26 "आवरी तार दोस पतर लिकी करी तार उपरे लगाय देलाय की ""यहूदी मनर राजा"" |" 27 हांय मन तार संगे दुय झन चोर, गोटक के उजा बाटे आवरी गोटक के डेबरी बाटे कुरूस ने चेगाय लाय | 28 [ तेबे पबितर शासतर र हांय बचन की हांय पापी मन संगे गेना गला, पूरा होयला |] 29 आवरी बाटे बाट जिबा लोक मुंडी हलाय हलाय करी आवरी ये बली करी तार निदा करते रयेत, “हां ! मंदीर के टूटाय बा बिता, आवरी तिन दीन ने बनाय बा बिता ! 30 कुरूस ले उतरी करी आपना के बाचाव |” 31 असनी ची बड़े याजक बले, शासतरी मन संगे, एक दुसर ले हांसी करी बलते रयेत, “ये दुसर के बाचाय ला, मातर कूद के बाचाय के ना सकला | 32 इस्राएल र राजा, मसीह, अबर कुरूस ले उतरी आव की हांमी द्की करी विश्वास करबू |” आवरी जोन तार संगे कुरूस मन ने चेगाया जाई रयेत, हांय मन बले ताके निदा करते रयेत | 33 पेज खाई पाहार होयबा के सबू देश ने अंधार होयला, आवरी संझ बेरा ले रये | 34 संझ बेरा यीशु खुबे चीचाय करी बलला, “इलोई, इलोई, लमा शबक्तनी ?”जाहार अरत ये आय, “हे मोर माहा परभु, हे मोर माहा परभु तुय मोके कसन छाड़ी देलीस ?” 35 जोन लगे ठीआ उठी रयेत, हांय मन ले कोनी कोनी ये सूनी करी बललाय, “दका, हांय एलिय्याह के हाग देयसी आचे |” 36 आवरी एकला पराय करी स्पंज के सिरका ने बुडाय ला, आवरी लाटी ने सोंगाय करी चुपराय ला आवरी बलला, “ठेबा, दकबू, एलिय्याह ताके उतराय के आयसी की नाई |” 37 तेबे यीशु खुबे चीचाय करी जीव छाड़ी देला | 38 आवरी मंदीर र परदा ऊपर ले तलले फाटी करी दुय गोंदा होयला | 39 जोन राका रऊ तार छमे ठीआ रये, जेबे ताके असन कोल्हार होई जीव छाड़बा दाय दकलाय, तो हसय बलला, “सत्ते ये मुनूक, माहा परभु र बेटा रला!” 40 कतक बायले मन बले दूर ले दकते रयेत:हांय मन ने मरियम मगदलीनी, शुरु याकूब आवरी योसेस र आया मरियम, आवरी सलोमी रये | 41 जेबे हांय गलील ने रये तो ये तार पीटी होयते रये आवरी तार सेवा करबार आय; आवरी दुसरा खुबे बायले मन बले रयेत, जोन तार संगे यरुशेलम ने आई रयेत | 42 जेबे अंधार होयला तो ई काचे की तिआर र दीन रये, जोन सब्त र एक दीन पईले होऊ आय, 43 अरिमतीया ने रबा बिता युसुफ आयला, जोन माहा सभा र सदस्य रये आवरी खुद बले माहा परभु र राज र बाट दकते रये | हांय दम करी पिलातुस र लगे गला आवरी यीशु र गागर के मांगला | 44 पिलातुस के चकित लागला की हांय अतक झटके मरला; आवरी हांय राका रऊ के हाग देई करी पचारला, “काय हांके मरी करी बेरा होयला ?” 45 जेबे हांय राका रऊ र लागी हाल जानला, तो गागर युसूफ के मांगी देला | 46 तेबे हांय मल मल र गोटक चदर घेनला, आवरी गागर के उतराय करी हांय चदर ने गुडाय ला, आवरी गोटक कबर ने जोन पकना डेंगे कोड लार रला, आवरी कबर र बाटे गोटक पकना टेकी देला | 47 मरियम मगदलीनी आवरी योसेस र आया मरियम दकते रये की हांय कोनती आचे |