17
छय दीनर पाचे यीशु पतरस आवरी याकूब आवरी तार भाई यूहन्ना के संगे नेला, आवरी तिके चीम चाम कोनी डेंग डोंगरी ने नेला | 2 हांय थाने तीकर छमे हांय छाया माया होयला, आवरी तार मुह बेर असन चमक ला आवरी तार फटीई दीया असन उजर होयला | 3 आवरी मुसा आवरी एलिय्याह तार संगे गोटायबा दाय तिके दका देला | 4 "ए थानले पतरस यीशु ले बलला "" हे परभू हामर ये थाने रबार अच्छा आय | अगर तोर इच्छा आचे तो मय ये थाने तीन टा मांडो बनायबी ;गोटक तोर काजे , गोटक मुसा काजे,आवरी गोटक एलिय्याह काजे |”" 5 हांय बलतेही रये की गोटकउजर बादरी तीकरउपरे छांयला, आवरी हांय बादरी ले ए सब्द निकर ला: “ऐ मोर खुदर बेटा आय, जोन ले मय हरीक आची: एतार सूना |” 6 चेला मन ऐ सूनी करी मुंहर बल ने घसर लाय आवरी डर लाय | 7 यीशु लगे आई करी तिके छींयला आवरी बलला, “ उठ ना डर |” 8 तेबे हांय मन आपनार आंखी उठाय करी आवरी यीशु के छाड़ी आवरी काकी ना दकला | 9 जेबे हांय मन डोंगरी ले उतर ते रयेत तेबे यीशु तिके आगेया देला, “जेबे तक मानेर बेटा मरला थानले जीव ना उठे, तेबे तक जोन बले तोमी दखला आस काकी ना बला |” 10 ऐ थानले तार चेला मन ताके पचार लाय, “ आवरी शास्त्री मन कसन बलुआत की एलिय्याहर आगे आयबार जरुरी आय ?” 11 हांय उतर देला, एलिय्याह जरुर आयसी, आवरी सबू तीज के सुदरायसी | 12 मातर मय तोमके बलबी आची की एलिय्याह आयला आचे, आवरी लोग मन ताके ना चीताय लाय; मातर जसन चायला असनी ची तार संगे होयला | येई रिती ले मानेर बेटा पने तार हाथ ले दुःख उठाय बाय |” 13 तेबे चेला मन समझ लाय की हांय हामार ले यूहन्नार बपतिस्मा देबा मनर हिसाब ने बलला आचे | 14 जेबे हांय मन भीड़ लगे पहुच लाय, तेबे गोटक माने तार लगे आयला, आवरी मांडी टेकी करी बलला, 15 “ ऐ परभु, मोर बेटार उपरे दया कर! कसन की ताके मिर्गी आउआय, आवरी हांय खुबे दुःख उठाऊ आय; आवरी घन घन जोय ने आवरी घन घन पानी ने घसरू आय | 16 मय ताके तोर चेला मन लगे आनी रंई, मातर ताके अच्छा ना करके सकलाय |” 17 यीशु उतर देला, “ ऐ अविश्वासी मन आवरी डिठाहा लोग मन, मय कबे तक तोमर संगे रऊं आं ? कबे तक तोमर सयबी ? ताके ईति मोर लगे आना |” 18 तेबे यीशु भुत आत्मा के डाटला, आवरी हांय तार ले नीकरी गला ; आवरी पीला हाय समया ने अच्छा होयला | 19 तेबे चेला मन गोटक होई करी यीशु लगे जाई बलला,हामी ताके कसन ने निकरायके ना सकू? 20 हांय की तिके बलला अनपनार विश्वासर गटिर कारन,कसन की मैं तमके सते बलबी आचे, अगर तमर विशवास राईर बिजार बराबर आचे,तेबे एके डोंगरी ले बलके सकास,एतार तान ले गुची करी आंय ताने जा,तेबे आंय जायसी,आवरी कोनी गोट तमर काजे असमबव ना होयके सके | 21 [मातर ये जाती बिना पराथना ले आवरी उपास ले ना निकरेत |]” 22 जेबे हांय मन गलील ने रहेत,तेबे यीशु तिके बलला, “मानेर बेटा माने मनर हाथ ले दरा पड़सी; 23 हांय मन ताके मार बाय,आवरी हांय तीन दिन ने जीव उटसी |”एताने हांय मन खुबे निरास होयलाय | 24 जेबे हांय मन कफरनहुमने पंचलाय,तेबे मंदिरर उसिल करबा बिता मन पतरस लगे आसी करी पचार लाय, “काय तमर गुरु मंदिरर उसिल ना देये?” 25 हांय बलला, हां देऊ आय |” जेबे हांय घरे आयला, तेबे यीशु तार पचार बार ले आगे बलला, “हे शमौन, तुई काय सोचबी आस? धरतीर राजा उसिल आवरी भेट कांर ले दरू आय?” 26 पतरस ताके बलला, “गहेर ले |” यीशु ताके बलला, “तेबे बेटा बाचलास | 27 तेबे एइकाजे की हामी तिके टोकर ना देबार आय, तुई नदी कटा जाई गरी पकाव, आवरी जोन माछ आगे काऊ आय, ताके दर; तार मुं उगाड़ ले ही गोटक सिका मिरसी, ताके दरी करी मोर आवरी अपनार बदला ने तिके देयी देस |”