दरसण 21

नुए सुरग अर नुई धरती

1 फेर मैं नुए सुरग अर धरती नै देखी। पेलो सुरग अर धरती खत्म हो'ग्या हा। अर समर्द बी कोनी दिख्यो। 2 फेर मैं नुए यरुसलेम नै सुरग ऊं परमेसर कनू तरता देख्यो। बो इंया लागै हो जिया एक बीनणी आपगै पती खातर सिंगार कर राख्यो होवै। 3 फेर मैं सुरग ऊं आवंती बुल्द आवाज नै सुणी कै, देखो, परमेसर गो निवास लोगा गै बिचाळै है अर बे बांगै सागै रेवैगा अर बे बांगा लोग हो'सी। परमेसर खुद बांगै सागै रेवेगो अर बांगा परमेसर होवैगा। 4 परमेसर बांगी आंखा गा सारा आंसू पूछ दयगा। इंगै बाद मोत, दुख अर रोणो कोनी होवैगो, दर्द बी खत्म होज्य'गो, क्यूंकै पुराणी बाता बीत ज्यगी।

5 सिंघासन पर बैठयै केयो, देखो मैं सारी बाता नै नुई कर दयूं। बण मनै केयो, ओ लिख ले क्यूंकै ऐ बाता सच्ची अर मानण गै लायक है।

6 फेर बण केयो, “पूरो होयो। मैं आल्फा अर ओमेगा, सरुआत अर अंत में ईं हूं। झिको तीसो है। बिनै मैं जीवन गै सोतै मूं मुफ्त पाणी दयूंगा। 7 झिको जीतेगो बो बि चीजा गो वारिस हो'सी में बिंगो परमेसर होस्यूं अर बो मेरो बेटो होवैगो। 8 कायर, अबिस्वासी, दुस्ट, हत्यारो, बेबीचार, जादुगरो, मूरतिपूजण आळा अर झूठा गो हिसो बी झील में होवैगो झिकी आग अर गंधक ऊं जगती रेवै आ दूसरी मोत है।”

नुओ यरुसलेम

9 सात सुरगदूत मूं एक झिकै कनै आखरी साल गै मुसीबता गा भरेड़ा सात कटोरा हा। बण मनै आ'गे केयो, “अठै आ तनै मेमणै गी बीनणी दिखाऊंगा।” 10 जद बो मनै पवितर आत्मा में एक मोटै अर ऊंचै पहाड़ पर लेग्यो। अर मैं एक मोटै सैहर पवितर यरुसलेम नै सुरग मूं परमेसर गी तरफ ऊं बिंगी मेमा ऊं भरेड़ो उतरता देख्यो। 11 परमेसर गी मेमा बिमै ही। बिंगी रोसनी भोत सै किमती पथर गी तरियां, यसब गी तरियां साफ ही। 12 ईं सैहर गी मोटी अर ऊंची कंदा में बारा दरवाजा हा। आ बारा दरवाजा पर बारा सुरगदूत हा। आ दरवाजा पर इसराएल गै बारा गोतरां गो नाम लिखेड़ो हो। 13 पूरब दिसा कानी तीन दरवाजा, उतर कानी तीन दरवाजा दिखणाद कानी तीन अर पस्चिम कानी तीन दरवाजा हा। 14 ईं सैहर गै कंदा गा बारा नीवां ही। ईं पर मेमणै गै बारा खास चेला गो नाम लिखेड़ो हो।

15 झिको मेरूं बात करै हो बी कनै, दरवाजा अर कंद नापण खातर सोनै गो गज हो। 16 सैहर चोकोर अकार गो हो। बिंगी लंबाई, चोड़ाई एक बरगी ही। बण बि गज ऊं सैहर नै नाप्यो झिको बारा हजार पलांग ही। इंगी लम्बाई, चोड़ाई अर ऊंचाई एकसी ही। 17 जद बण कंद नै नापी तो बण छ फूट मोटी पाई। 18 कंद यसब गी बणेड़ी ही अर सैहर साफ कांच गी तरियां सुद्ध सोनै गो हो। 19 बि सैहर गी नींव गा पथर सारी तरियां गै किमती पथरा ऊं सजेड़ा हा। नीव गो पेलो पथर यसब दूसरो नीलम, तीसरो एकटीक, चोथा मरकत। 20 पांचवो गोमेद, छटो माणिक्य, सात्वों पतिमणी। आठवों पेरोज, नोवों पुखराज, दसवों लहसनिया, ग्यारवों धूमकान्त अर बारवो चनद्रकान्त हो। 21 बारा फाटक बारा मोती गा हा। हरेक फाटक एक एक मोती गो बणेड़ो हो। सैहर गी सड़क परदेसी सीसै गी तरियां सुद्ध सोनै गी ही।

22 मैं बि सैहर में कोई मिन्दर कोनी देख्यो। क्यूंकै बठै परमेसर अर मेमणो ईं मिन्दर हा। 23 बठै चांद सूरज गी रोसनी गी लोड़ कोनी ही। क्यूंकै परमेसर गी रोसनी गी मोजूदगी ऊं बो रोसनी ऊं भरेड़ो हो। अर मेमणो बिंगो दियो हो। 24 झिकै देसा गै लोगा उद्धार पायो है, बे बांगी रोसनी में चालेगा अर दुनिया गा राजा आपगै प्रताप नै बिमै ल्यावेगा। 25 बिंगा फाटक दिन में कदी बंद कोनी हो'सी क्यूंकै बठै रात कोनी होवैगी। 26 बे देसा गी सान अर इज्जत नै बिमै ल्यावेगा। 27 कोई तरियां गी गंदी चीज इमै आ कोनी सकैगी। अर ना असुद्ध अर झूठ बोलण आळा आवैगा। सिरफ बे ई आवैगा झिका गो नाम जीवन गी किताब में लिखेड़ो है।