यीसू मसी गै खास चेलै यहूदा गो लिखेड़ो खत
ईं खत गै बारै में
ओ खत यहूदा गै नाम ऊं जाणिजै झिको यीसू गो भाई अर याकूब गो भाई हो। याकूब पेलै दिनां गी बिस्वासी मण्डली गो एक अगुओ हो। ईं खत में कोई गाम या सैहर गै बारे में कोनी लिखेड़ो कै ओ खत किसै बिस्वासियों नै लिख्यो है। पण ओ खत बा लोगां नै लिखेड़ो है झिका गी बिस्वासी मण्डली में झूठो परचार करण आळा लोग घुस ग्या हा। बे लोग यीसू नै प्रभु कोनी मानता अर परमेसर गै खिलाफ झूठी बाता लोगां नै सिखावंता। इंया लागै ईं खत नै पढण आळा यहुदी मिनख हा। ओ खत यीसू गै जन्म ऊं 70 साल बाद लिखेड़ो है।
यहूदा गै ईं खत में बा सगळा लोगा नै चेतायो हो झिका यीसू गै बारे में झूठी सीख लोगा नै देवै अर खुद यीसू गा भगत बतावै। यहूदा आपगी बात नै सई साबित करण खातर पुराणै नेम विधान गी बाता गी साख बी आपगै ईं खत में लेवै। ईं खत गी भोत सी बाता, पतरस गै लिखेड़ै दूसरै खत ऊं मिलै है। ईं खत में परमेसर गै सुरगदूतां गै बारे में, झूठै गुरुआ नै चेताण गी बारे में (यहूदा 4; 2 पतरस 2:1) अर सदोम अर अमोरा सैहरां गै बुराईयां गै बारै बी बतावै।
रूप रेखा
यहूदा गी ओर ऊं निमस्कार1,2
झूठै लोगां पर परमेसर गी सजा3-16
बिस्वास में मजबूत रेण गी चेतावनी17-23
आसिस बचन 24-25