यीसू मसी गै खास चेलै यहूदा गो लिखेड़ो खत
यहूदा गी ओर ऊं निमस्कार
1
1 हे भाईयो अर भेनों, थानै परमेसर चुण्या है अर प्रेम करै अर यीसू मसी बचा राख्या है। थानै निमस्कार।
मैं यहूदा, झिको यीसू गो दास अर याकूब गो भाई हूं। ओ खत मैं थानै लिखूं हूं।
2 थानै परमेसर गी दया, सांती अर प्रेम मिलै। आमीन।
झूठै लोगां पर परमेसर गी सजा
3 हे भाईयो अर भेनों, मैं हमेसा आई कोसिस करूं कै मैं थानै बि मुकती गै बारे में लिखूं झिकी आपणै सारै खातर है तो मैं थानै ओ समझणो जरूरी समझ्यो कै बि बिस्वास में बडता जाओ झिको पवितर लोग आपां नै परमेसर एकर ई दियो है।
4 क्यूंकै आपणै बिचाळै हिस्या भोतसा झूठा गुरू लोग होळै सी घुस ग्या है झिका गै बारे में पेलां ई पवितर सासतर में लिखेड़ो है अर बानै सजा मिलसी।a ऐ धोखेबाज लोग आपणै परमेसर गी किरपा नै, लुचपन में बदळ दय अर प्रभु यीसू मसी नै मानण ऊं इनकार करै।
5 थे बि बात नै याद करो कै जद परमेसर इसराएल गी मिनख गी पीढी नै मिस्र देस गी गुलामी ऊं छुड़ाया हा अर बामूं केई लोगा परमेसर पर बिस्वास कोनी करयो तो बानै खत्म कर दिया हा।b
6 अर मैं थानै बा सुरगदूतां गै बारे में बी बताऊं झिका आपगै हक गै पद नै कोनी संभाळ गै राख्या अर बिनै छोड़गे भाजग्या। जद बानै परमेसर न्याय आळै दिन तांई अंधेरी कोठड़ी में सदा खातर बांद गै छोड़ दिया कै न्याय गै दिन आनै सजा मिलै।c
7 अर बियां ई सदोम अर अमोरा सैहरां अर बिंगै आसै पासै गै सैहरां गा लोग बेबीचार में पड़ग्या।d बानै बी परमेसर ना बुझण आळी आग में झोक दिया जिऊं दूसरै नै बी आऊं सबक मिलै।
8 इंया ई ऐ झूठा गुरू लोग है झिका बांगी तरियां कुकरम में फसगे आपगी देह नै खराब करै। अर प्रभु गी ताकत नै इतो म्हत्व कोनी देवै अर सुरग गी मेमा गै दूतां गै खिलाफ बोलै है।
9 थानै याद होणो कै मीकाईल सुरगदूत झिको सारै सुरगदूता गो मुखिया है। बण मूसा गी ल्हास खातर सैतान ऊं जीरै करी कै आ ल्हास ले जाण गो हक किंगो है। जद बी बो सैतान नै आच्छो माड़ो कोनी बोल्यो, पण बण इतो ईं केयो कै,
“प्रभु ईं तनै सजा देवै।e”
10 पण ऐ मिनख तो झिकी बात जाणै ई कोनी, बिंगै बारे में आपगी मरजी ऊं बोलै। अणबोल जानवरां गी तरियां है झिका गै मन में आवै बो ई बोलै। आ बुरी बाता गी बजह ऊं बांगो नास हो'सी।
11 आंगै सागै बुरो हो'सी। ऐ लोग मिनख कैनf गी तरियां बुराई लारै चाल पड़या। अर ऐ धन गै लालच में भाई बिलाम गी तरियां करै है।g अर भाई कोरह गी तरियां बिरोध कर'गे नास होवै है।h
12 ऐ लोग थारै सागै भोज में भेळा होवै। पण ऐ बेसरम होगे आपगो पेट भरै। ऐ तो बिना पाणी गै बादळा बरगा है झिका ऊं कोई आस कोनी। अर पून ऊं उड़ता रेवै। ऐ बि दरखता गी तरियां है झिकै गै आपगी रूत में बी फळ कोनी लागै अर आखर में बिनै पटणो ओ ई पड़ै।
13 ऐ लोग आपगै बुरे करमा गी गंदगी खिंडावै जियां तूफान में समुन्दर झाग खिंडावै। ऐ लोग तारां गी तरियां है झिका इनै बिनै फिरता रेवै आनै एक दिन नरक गै दरड़ै में पटकिजैगा। थे आ लोगा ऊं दूर रेईयो।
14 आ मिनख गै बारै में हानोक झिको आदम गी सांतवी पीढी गी बात करी कै,
“देखो प्रभु आपगै लाखू पवितर लोगा सागै आवैगो।”
15 अर बो बा दुस्ट लोगा नै बांगै कुकरमा गै कारण सजा देसी अर बा कठोर बाता खातर बी झिकी बा प्रभु गै बारै में केयी है।
16 क्यूंकै ऐ लोग बड़ बड़ाण आळा, दूसरा पर दोस डूंडण आळा, लालसा गा गुलाम अर आपगै मू ऊं घमण्ड गी बातां बोलण आळा अर आपगो फायदो खातर दूसरा नै देखगे बड़ाई बोलण आळा लोग है।
बिस्वास में मजबूत रेण गी चेतावनी
17 हे मेरा प्यारा भाईयो अर भेनों, थे आ बाता नै ना भूलियो झिकी आपां नै आपणै प्रभु यीसू मसी गै खास चेला पेलां केई।
18 कै अंत गै दिना में हिस्या बी लोग आसी झिका प्रभु अर बिंगै लोगा गी मजाक उड़ासी अर परमेसर नै ना मानण आळा लोग आपगी मन मरजी करसी।i
19 ऐ बे लोग हो'सी झिका थारै में फूट गेरी। ऐ पवितर आत्मा गो केणो ना मानणा आळा अर सांसारिक लोग हो'सी।
20 पण हे प्यारो, थे बिस्वास गी बि पवितर नीम पर तकड़ा रेगे पवितर आत्मा गी ताकत ऊं पराथना करता रेवो।
21 अर आपणै आपनै परमेसर गै प्रेम में बणाये राखो अर प्रभु यीसू मसी गै बि दिन नै अडिकता रेवो झिकै दिन बो थानै दया कर'गे अनन्त जीवन दयगो।
22 अर झिका ईं बात पर बेम करै बा पर दया करो।
23 झिको आग गै खतरे में है थे बा लोगा नै ईं आग ऊं बचा ल्यो। अर भोतां पर भय गै सागै दया राखो पण बा गाबा ऊं घिरणा करो झिका पर सरीर गी बजह ऊं कलंक लागेड़ो है।
आसिस बचन
24-25 प्रभु यीसू मसी गी बजह ऊं आपां नै बचावण आळै परमेसर गी जे-जेकार होवै। एक परमेसर ई है झिको थानै बचा सकै अर थारै पापा नै धो सकै। अर बो थानै आपगी हजूरी अर मेमा में राजी करगै निरदोस खड़या कर सकै। जुगा जुगा ऊं लेगे अब तांई मेमा, मान, ताकत अर हक परमेसर गो ई है अर इंया ई सदा रेवै। आमीन।