हजार साल गो राज
20
1 फेर मैं सुरग उतरता एक ओर सुरगदूत नै देख्यो, झिकै गै कनै अथाग कुंड गी चाबी अर मोटी सांकळ ही।
2 बण अजगर बि पुराणै सांप नै झिको मोटो सैतान है बिनै एक हजार साल खातर बांद दियो।
3 बण बिनै अथाग कुंड में ताळो लगागे उपर एक मोअर लगा दी जिऊं हजार साला तांई लोगा नै भरमा ना सकै। बिंगै बाद बिनै थोड़ी देर खातर आजाद करीजैगो।
4 फेर मैं सिंघासन अर बां पर बैठयै लोगा नै देख्या बानै लोगा गो न्याय करण गो अर सजा देण गो हक देयडो हो। फेर मैं बा लोगा गी आत्मावां नै देखी। झिका गा सिर यीसू गी गवाई देण गी बजह ऊं अर परमेसर गै बचन गै कारण धड़ ऊं न्यारा करेड़ा हा। बा पसू या मूरती गी पूजा कोनी करी ही। अर ना ईं आपगै माथे पर बांगो निसान लगायो हो। बे जीमता होगे मसी सागै एक हजार साल तांई राज करता रेया।
5 बाकी लोग जद तांई जीमता ना होया जद तांई एक हजार साल खत्म कोनी होया। ओ पेलो जी उठणो हो।
6 आसिस पायेड़ो अर पवितर आदमी बो है झिको पेलै जी उठण में सामिल होवैगो, हिस्यै लोगा पर दूसरी मोत गो हक कोनी हो'सी, पण बे परमेसर अर मसी गा याजक हो'सी। अर एक हजार साल तांई बांगै सागै राज करेगा।
सैतान गो अंत
7 जद एक हजार साल पूरा हो'ज्यगा जद सैतान नै केद ऊं आजादी मिल ज्यगी।
8 बो युद्ध खातर गोग मगोग अर धरती गै चयारूं मेर गै तमाम देसा नै भेळा करण गै बाद में धोखो दयगो। बांगी गिणती अणगिणत होवैगी।
9 बे धरती गी सारी दिसावा ऊं निकळगे प्यारै सैहर अर पवितर लोगा गी जिग्या नै च्यारूंमेर ऊं घेर ल्यगा। जद सुरग ऊं परमेसर गी ओर ऊं आग निकळेगी। अर ईं सेना नै भस्म कर दयगी।
10 अर सैतान झिकै बानै धोखै में राखतो हो बो आग अर गंधक गी झील में रेड़ीज्येगो, जठै बो पसू अर झूठा बात बोलण आळा हा। बठै बे दिन रात अर हमेसा हमेसा खातर पीड़ा में तड़फता रेवैगा।
मोटो सिंघासन अर नुई धरती
11 फेर मैं एक धोळो सिंघासन अर बि पर बैठयै नै देख्यो। बिंगै सामणू धरती आकास भाज खड़या होया। अर बानै कठैई जिग्या कोनी मिली।
12 अर फेर मैं छोटा मोटा झिका मर चुक्या हा, बानै सिंघासन सामै खड़या देख्या अर जद किताबा खोलिजी अर बिंगै बाद जीवन गी किताब खोलीजैगी अर बांगो न्याय बांगै कामा गै आधार पर होयो झिका गो लेखो ई किताब में हो।
13-14 समुनदर बा मरेड़ा नै उगळ दिया झिका बिमै हा। मोत अर कबर आप में समायड़ै मरेड़ै लोगा नै उगळ दिया। आ दूसरी मोत है।
15 झिकै गो नाम जीवन गी किताब में ना मिल्यो, बिनै आग गी झील में फेंकिज्यो।