दरसण 19

मेमणिया गो ब्या

1 आ सारी बाता गै बाद सुरग में मैं एक बुलंद

आवाज सुणी, हालेलुया, मुकती, मेमा अर ताकत म्हारै प्रभु परमेसर कनै है।

2 ईंखातर कै बांगो न्याय सच्चो

अर सई है। मोटी बेस्या लुगाई नै सजा मिली है

झिकी सारी दुनिया नै अण कुकरम ऊं गुमराह कर रखी ही।

बिंगै द्वारा बहायड़ै खून गो बदळो

बी बिऊं लेईजैगो।

3 बा फेर केयो, हालेलुया। अर हमेसा हमेसा खातर बिंगै बळण गो धुंओ उठतो रेवेगो।

4 अर चौबीस बुड़ा अर च्यार जीमता प्राणी परमेसर झिका सिंघासन पर बैठया हा बा माथो टेकगे प्रणाम करयो अर आराधना करता केयो, इयां ई होवै, हालेलुया।

5 जद सिंघासन ऊं आ आवाज सुणाई देयी कै,

“थे सारा झिका दास हो चायै छोटा है

या मोटा अर बाऊं डरो हो, परमेसर गी बडाई करो।”

6 फेर मनै भीड़ गो सोर सुणाई दियो। आ बोळै पाणी अर जबरदस्त गरजना गी तरियां सब्द सुणीज्यो हो। हालेलुया। म्हारो सकती मान परमेसर राज करण लागरयो है।

7 आओ आपां खुस होवां

अर परमेसर गी बडाई करां

क्यूंकै मेंमणै गै ब्या गो टेम आ'ग्यो है

अर बिंगी बीनणी नै आपणै आपनै तैयार कर राखी है।

8 पेरण खातर बिनै आच्छी किसम गी साफ

अर चमकती मलमल देएड़ी है।

ई आच्छी किसम गो मतलब है

पवितर लोगा गा धारमिकता गा काम है।

9 अर बण केयो, लिखो बे आसिस पायेड़ा लोग है झिका नै मेमणै गै ब्या में नूतेड़ा है। बण मनै ओ बी केयो, आ परमेसर गी केयेड़ी साची बात है।

10 अर मैं बिंगै पगा पड़गै बिंगी आराधना करी जद बण मनै केयो, देख इयां ना कर। क्यूंकै मैं तेरै अर तेरै भाईया बरगो हूं झिका कनै गवाई है। बा तरियां एक दास हूं। सिरफ परमेसर गी आराधना कर। क्यूंकै यीसू मसी गी गवाई परमेसर गी बात गी आत्मा है।

धोळे घोड़ै गो सवार

11 अर मैं सुरग खुलो देख्यो अर बिमै मैं एक धोळो घोड़ो देख्यो झिकै पर कोई बैठयो हो। बो बिस्वास लायक अर सच्चो कुहावै है। बो धारमिकता न्याय अर युद्ध करै है। 12 बिंगी आंखा आग गी लपटा गी तरियां ही अर बिंगै सिर पर भोतसा मुकुट हा। बांगै माथे पर एक नाम लिखेड़ो हो, झिकै नै बिंगै सिवाय ओर कोई कोनी जाणै हो। 13 बण हिस्या कपड़ा पेर राख्या झिका खून में डबोयेड़ा हा, बिंगो नाम परमेसर गो बचन हो। 14 सुरग गी सेनावा, धोळे घोड़ा पर धोळा साफ अर बड़िया किसम गी मलमल पेरेड़ी मेमणै गै लारै लारै जाण लागरया। 15 मेमणै गै मूं माखर तेज तलवार निकळै ही झिकी ऊं बो देसा गै लोगा नै मारतो हो। बो बांगै उपर लोह गै राज दंड ऊं राज करेगो। बो सरवसकतिमान परमेसर गै गुसे गी जलन गी दारू गै कुण्ड में अंगूर रोंदिजैगा। 16 बिंगै जांघ अर गाबा पर एक नाम लिखेड़ो हो, राजावां गो राजा अर प्रभुवां गो प्रभु।

17 फेर मैं सुरग में एक सुरगदूत नै सूरज पर खड़यो देख्यो। बण बुलद आवाज में चालगे आसमान में उड़ण आलै पंछिया ऊं केयो, “आज्यो अर म्हान परमेसर गै भोज में भेळा होवां। 18 जिऊं थे राजावां, प्रधाना, ताकतवर लोगा, घोड़ा बांगै आसवारा अर सारी तरियां गा लोग आजाद गुलाम, छोटा अर मोटा गो मांस खा सको।”

19 फेर मैं दुनिया गै राजावा अर बांगी सेनावां नै घोड़ै पर बैठ्यो आदमी अर बिंगी सेना ऊं लड़ण खातर भेळा देख्या। 20 बि पसू अर झूठै बात बताण आळा नै झिको बिंगै सामणै निसान दिखावंतो बिनै पकड़ लियो। ओ निसान बो बानै धोखो देवंतो हो। झिका बि पसू गो निसान ले राख्यो हो। अर झिका मूरती गी आराधना करता हा। बा दोना नै गंधक ऊं जगती आग जीमता फेंकता दिया। 21 बाकी बेचेड़ै लोगा नै घोड़ै पर बैठयै आदमी गै मू ऊं निकळती तलवार ऊं खत्म कर दिया अर बांगै मांस ऊं सारा पंछी धाप ग्या।