दरसण 18

बेबिलोण गो अंत

1 इंगै बाद मैं एक ओर सुरगदूत नै सुरग ऊं उतरता देख्यो झिकै गै कनै मोटो हक हो। बिंगै प्रकास ऊं धरती चमकण लागगी। 2 जद बण बुलंद आवाज में केयो,

महा नगर बाबुक ढेह ग्यो, ढेह ग्यो।

बो ओपरिया गो सारी तरियां गी गंदी आत्मावा गो अर माड़ी अर घिनोणै पंछिया गो टिकाणो बणग्यो।

3 क्यूंकै बिंगी बेबीचार गी भयानक दारूं सारै देसा पी ली।

ईं दुनिया गै सारै राजावां बिंगै सागै कुकर्म करयो है।

अर बिंगै भोग विलास गी बजह ऊं बोपारी अमीर हो'ग्यो है।

4 फेर मैं सुरग ऊं एक आवाज नै ओ केवंता सुण्यो कै है मेरा लोगो बि नगर मूं निकळ ज्याओ। जिऊं थे बिंगा अपराधी ना बण सको अर बि पर आण आळी बिपतिया ऊं बच ज्यो।

5 क्यूंकै बिंगा अपराध सुरग तांई पोंच ग्या है

अर परमेसर बिंगै गळत कामा नै याद करया है।

6 जिंया बण थारै सागै करयो है, बिंया ई थे बिंगै सागै करो

अर बिंगै कामा गै हिसाब बिनै दुगणो बदळो दयो।

झिकै कटोरै ऊं बण उडेळयो है।

बिंगै बदळै बिंगै कटोरै में दुगणो दयो।

7 जिती बण आप आपनै इज्जत दी है आपगो जीवन सुखबिलास में बितायो है।

बि बिती में बिनै पीड़ा अर दुख दयो। क्यूंकै बो आपगै मन में केवै कै, मैं राणी गी तरियां बैठी हूं

अर सुहागन होण गै कारण

मनै कदी कीं दुख कोनी होवैगो।

8 ईंखातर एक दिन में बि पर बिपतिया आ पड़ैगी

अर ऐ हो'सी मोत, विलाप

अर अकाळ अर बा आग में भस्म हो'ज्यगी।

क्यूंकै न्याय करण आळो प्रभु परमेसर भोत ताकत आळो है।

9 ईं दुनिया गै झिकै राजावा बि सागै कुकर्म करयो है अर बिंगै सागै सुख विलाप करयो है अर बे बिंगै बळण गो धुंओ देखगे बि खातर रेवैगा अर विलाप करेगा। 10 अर बिंगी पीड़ा गी बजह ऊं बे डरगे दूर खड़या केवेगा, हाय, हाय मोटा सैहर बाबुल। ताकत आळा सैहर। एक पल में ई तनै सजा मिलगी।

11 ईं दुनिया गा राजा बि खातर रोवेगा अर दुख करेगा। क्यूंकै बांगो कोई कीं बी माल कोनी खरीदैगो। 12 सोनो, चांदी, किमती पथर, मोती, बडिया मलमल, बेजणी कपड़ा, रेसम, लाल कपड़ा, हरेक तरियां गी लकड़ी, हाती दांत गी बणायेड़ी चीजा, मेंगी लकड़ी, पीतळ, लोह अर मारबळ गी चीजा। 13 दाळ चीनी, ईतर, सुरमाळी चीजा, लोवन, दारू, तेळ, आच्छी किसम गो आटो, जानवर, भेड़ घोड़ा, रथ, लोगा गी देह अर आत्मा।

14 झिकी आच्छी चिजां गी कामना थारी आत्मा करती रेई है, बा थानै कोनी मिल पाई। थारी विलासता अर सान थारूं जावंती रेई। अर थे बिनै कदी कोनी देखोगा। 15 झिका बोपारी बिंगी बजह अमीर बण्या हा, बे बिंगी पीड़ा गै डर ऊं भोत दूर खड़या बिलख बिलख गै रेवैगा। 16 बे केवेगा, हाय। हाय। बो मोटो सैहर झिको बड़िया मलमल बेजणी लाल कपड़ा, सोनै, किमती पथरा अर मोतिया ऊं सजेड़ो हो।

17 बिंगी एक पल में ईं सारी धन संपती गायब होगी।

जहाज गो हरेक कपतान अर बिंगा सवार, मलाह झिका समुद्र में बोपार करै बे सारा दूर खड़या रेया।

18 जद लोगा बिंगै बळण गो धुंओ देख्यो तो चिलागे केवेगा, कै कोई ई सैहर ऊं मोटो सैहर है। 19 बा आपगै सिर में रेत गेरता ऊंची आवाज में रोवंता बिलखता केयो हाय। हाय। बो मोटो सैहर जठै पाणी आळै जहाज गा मालिक, बि लुगाई गै धन ऊं अमीर बणग्या गा क्यूंकै एक पल में बा बर्बाद हो'ग्यो।

20 हे सुरग, पवितर लोगो अर परमेसर गी बात बताण आळो

थे ईं बात ऊं खुस होओ क्यूंकै परमेसर बिनै सजा दी।

21 जद एक ताकतवार सुरगदूत एक चाकी गै पथर गी तरियां एक मोटै पथर गै चक्कै गै समुनदर में रेड़ गै केयो, “ईं तरियां बो मोटो सैहर बाबुल भोत फेंकिजै गा, जिऊं बिंगो नाम निसान ई मिट ज्यगो।”

22 “बीण बजाण आळो, गीत गाण आळो,

बंसरी बजाण आळो

अर तुरही फूंकण आळा गी आवाज

फेर कदी तेरै में सुणाई कोनी देसी।

चाकी चालण गी आवाज तेरै में कदी कोनी सुणेगी

अर कोई बी काम करण आळो आदमी तेरै में कोनी लादोगो।

23 अर ना ईं तेरै में कदी दियै गो चानणो दिखेगो

अर बीन बीनणी गी आवाज कदी तेरै में कोनी सुणाई देवैगी।

दुनिया गा मोटा लोग

अर सारै देसा गा बोपारी तेरै जादू टूणै ऊं भरमाएड़ा हा।

24 ईं धरती पर झिका लोग मारिज्या हा बांगो पवितर लोगा गो

अर परमेसर गी बात बताण आळा गो खून तेरै में मिल्यो हो।”