दरसण 17

मोटी बेस्या

1 बा सातां सुरगदूता मूं एक मनै आ'गे केयो कै, आओ झिकी मोटी बेस्या लुगाई झिकी बोलै पाणी पर बैठी है मैं बिंगै दण्ड नै तनै दिखाऊंगा। 2 इंगै सागै दुनिया गै राजावां कुकर्म करयो हो। अर दुनिया गा लोग इंगै सागै कुकर्म गी दारू में मतवाळा हो'ग्या हा।

3 इंगै बाद बो सुरगदूत मनै पवितर आत्मा में जंगळ में लेग्यो। बठै मैं सात सिर अर दस सींग आळै एक लाल जानवर नै देख्यो। ओ पसू ऊं निन्दा गै नामा ढकेड़ो हो अर ईं पर एक लुगाई बैठी ही। 4 अण लुगाई बेजणी अर लाल रंग गा गाबा पेर राख्या अर हीरै मोती अर सोनै ऊं सजेड़ी ही। इंगै हात में एक सोनै गो कटोरो हो, झिको घिनोणी चीजा अर कुकर्म गी गंदगी ऊं भरेड़ो हो। 5 अर बिंगै माथे पर ओ भेद भरेड़ो नाम लिखेड़ो हो, मोटै बेबिलोण, बेस्यावां अर धरती गी घिनोणी चिजां गी मां।

6 मैं बिनै पवितर लोगा अर यीसू गै गवाहा गो खून पीगे मतवाली होयड़ी देखी। बिनै देखगे मैं हेरानी ऊं भरग्यो।

7 बण सुरगदूत मनै केयो, तनै हेरानी क्यूं होवै? मैं सात सिर अर बि सींग आळै जानवर अर बि पर बैठी ओरत गै भेद नै तेरै पर परगट करूंगा। 8 झिको पसू तू देख्यो है बो पेला हो। पण अब कोनी है बो अथाग कुण्ड मूं निकळ गै बिनास में पड़ ज्यगो। दुनिया गी सरुआत ऊं तमाम लोग झिका गा नाम जीवन गी किताब में कोनी लिखेड़ा है ईं जानवर झिको पेला हो, अब कोनी पण आण आलो है बिनै देखगे अचंभो करेगा।

9 अठै बुद्धी गी बात है झिका सात सिर है बे सात पहाड़ झिका पर बा ओरत बैठी है। 10 बे सात राजा बी है झिका में पांचा गो राज खत्म हो'ग्यो है। एक राज करण लागरयो है अर एक अजे तांई आयो कोनी है। जद बो आवैगो तो थोड़े टेम खातर जरूर बण्यो रेवेगो। 11 बो जानवर झिको पेला हो अब कोनी है। बो खुद आठवो राजा है। हालाकी बो साता मूं एक है झिको नास होण आळो है।

12 अर दस सींग झिका तू देख्या हा बे दस राजा है। झिका नै अजे तांई राज कोनी मिल्यो। पण आ राजावां नै बी पसू सागै एक घंटै राज करण गो हक मिलेगा। 13 आ राजावां गो एक ईं मकसद है बे आपगी ताकत अर हक बी पसू नै दयगा। 14 बे सारा मेमणै ऊं लड़ेगा पण मेमणो बानै जीत ल्यगो। बो ई प्रभुआं गो प्रभु अर राजावां गो राजा है। झिको मेमणै गै सागै है बानै चुणेड़ो अर बिस्वास लायक केईजै है।

15 जद सुरगदूत मनै केयो कै झिकै पाणी पर तू बी बेस्या लुगाई नै बैठी देखी है अर बा भीड़ न्यारै न्यारै देस अर न्यारी न्यारी भासा गै लोगा गी है। 16 झिकै दस सींगा अर जानवर नै तू देख्या हा, बे अर पसू रळगे बि बेबीचारी लुगाई ऊं नफरत कर'गे बिनै बरबाद कर दयगा। बे बिनै खा ज्यगा अर बाळ दयगा। 17 परमेसर आपगो मकसद पूरो करण खातर बानै एक मन दियो, कै जद तांई परमेसर गी केयेड़ी बात पूरी ना हो'ज्य जद तांई बि पसू नै आपगी हकुमत गो हक सूंप दय। 18 आ लुगाई झिकी नै तू देखी ही बो मोटो नगर है झिको ईं दुनिया गै राजावां पर राज करै है।